Lil e Galaćanurenđe 6
6
Svakonese te ćera šukaripe
1Phralalen thaj phejalen, te arakhlja pe khoni ano nesavo greh, tumen save živin palo vodstvo e Duxoso, pomožin lese te iril pe ko pravo drom, al ćeren gova krotko. Thaj arakh tut te ma pere i tu ano iskušenje. 2Inđaren o pharipe jekh avereso, thaj gija ka pheren o zakon e Hristeso. 3Te khoni tumendar dol gođi kaj si khoni – a naj khanči – korkoro pes xoxavol. 4Dži jekh trubul te ispituil pe buća thaj tegani šaj avol barikano korkoro pesa. Al ma te uporedil pe averencar. 5Golese so dži jekh trubul te inđarol o odgovornost tare kova so ćerol. 6Kova savo sikljol e Devlese Lafura, trubul sa po šukaripe te ulavol pe učiteljesa.
7Ma xoxaven korkore tumen: E Devlesa khoni našti marol muj! Golese, o manuš ka ćidol gova so sejisada. 8Kova savo udovoljil pe telose, taro telo ka ćidol propast. Al kova savo udovoljil e Duxose, taro Duxo ka ćidol džuvdipe bizo meripe. 9Ma te umorin tumen te ćeren šukaripe, golese so te ni odustanisadam, ka ćida i žetva ano pravo vreme. 10Golese, gija, dok isi amen prilika, te ćera šukaripe savorenđe, al posebno e phralenđe thaj e phejenđe ano pačajipe.
Na obrezanje, nego nevo manuš
11Dićhen save bare slovurencar pisisadem tumenđe mingre vastesa! 12Kola save manđen te ćeren pe barikane palo telo, čhuven tumen te obrezin tumen. Al von gova ćeren samo te ma aven progonime bašo krsto e Hristeso. 13Ni von korkore save si obrezime ni ićaren pe ko Zakon. Al manđen te obrezin tumen, te bi čhudena baripe tumare telurencar. 14A me, Devla arakh, te hvalima khančesa, sem e krstosa amare Gospodeso e Isuseso e Hristeso. Pale leste o sveto si čhuto ko krsto baše mande, a me bašo sveto. 15Golese, naj bitno dal si o manuš obrezimo il naj. Kova so si amenđe bitno si e Devleso nevo stvorenje. 16O mir thaj o milosrđe savorenđe save ićarenpe pe kava pravilo thaj e Devleso Izrael – sa e Devlese manušencar.
17Od akana khoni ma te ćerol manđe problemura golese so inđarav ožiljkura taro trpipe bašo Isus pe mingro telo.
18Phralalen thaj phejalen! O milost amare Gospodeso e Isuseso e Hristeso nek avol tumare duxosa. Amin.
