1. Samuilo 1
1
E Samuileso bijandipe
1Sasa jekh manuš kaso alav sasa Elkana, čhavo e Jerohameso, unuko e Elihuso, paraunuko e Tohuso thaj čukununuko e Cufoso. Vov sasa andaro Ramatajim-Sofim, ke Efremese bregura, a bešlo ano Efremeso krajo. 2Sasa le duj romnja, i Ana thaj i Penina. E Penina sesa čhave, a e Ana ni sesa čhave.
3O Elkana dži jekh berš džala andaro piro foro ano Šilo, odori te perol ke koča thaj te dol žrtva e GOSPODESE pe vojske. Gothe e duj čhave e Elijase, o Hofni thaj o Pinhas, sesa e GOSPODESE sveštenikura. 4Gova đive kana bi anola e žrtva, o Elkana bi dola po jekh kotor mas pe romnjaće e Peninaće thaj sa laće čhavenđe thaj e čhejenđe, 5a e Anaće bi dola duj droma pobut, golese so manglja la. Al laće o GOSPOD ni dija te aven la čhave.#1,5 Ano original ačhol: “O GOSPOD phanglja lako vođi.” Isto gova ačhol thaj ano šovto stiho. 6A sar o GOSPOD ni dija čhaven e Anaće, laći suparnica i Penina stalno marola laće muj golese. 7Gija sasa andaro berš ano berš. Kana god bi džana ano Ćher e GOSPODESO, i Penina bi gija marola muj e Anaće sa dži kaj ne bi rovljarola la, pa gija i Ana naštine ni mangro te xal.
8Lako rom o Elkana bi tegani pučola la: “Ano, sose rove? Sose ni xa? Sose si žalno ćo ilo? Naj li sem tuće me po važno nego li deš čhave?”
9Jekh drom, pale gova so xalje thaj pilje ano Šilo, i Ana uštili.
A o svešteniko o Eli bešola ki pi stolica pašo vudar e GOSPODESE hrameso.
10Gija phađe ilesa, i Ana molisajli e GOSPODESE dži kaj žalno ruja 11thaj xalja sovli vaćarindoj: “GOSPODE pe vojske, te čače dikhljan pe mingro pharipe thaj de tut gođi mandar, tari ćiri sluškinja, te ni bistardan man thaj ako de man murše čhave, me ka dav le tuće, GOSPODE, baše sa o džuvdipe. Lese i čhuri ni ka naćhol prekalo šoro.”
12Voj but vreme molisajli anglo GOSPOD, a o Eli dikhlja la ano muj. 13Voj molisajli ane peste, samo laće vušta mrdina pe, al lako glaso ni šundilo. Golese o Eli dija gođi kaj si mati, 14thaj phenda laće: “Dži kana ka ave mati? Ačhav tut tari mol.”
15Tegani i Ana vaćarda: “Naj gova, gospodarona, nego si mo ilo phago. Ni piljem ni mol ni zuralo pijipe. O pharipe andaro mo ilo ikaldem anglo GOSPOD. 16Ma dikh pe mande, pe ćiri sluškinja, sar pi bilačhi džuvli. Molisaljem kate baši mi bari muka thaj žal.”
17A o Eli phenda laće: “Dža ano mir thaj o Dol e Izraeleso te dol tut gova so rodijan lestar.”
18I Ana phenda: “Nek me, ćiri sluškinja, arakhav milost ane ćire jakha.”
Pale gova voj đeli pe dromesa thaj lija zala te xal, a lako muj ni sasa vadži žalno.
19Theara đive avile rano ki sabalin, poklonisajle e GOSPODESE, thaj irisajle ćhere ani Rama. O Elkan suta pe romnjasa e Anasa, a o GOSPOD uslišisada laći molitva. 20I Ana ačhili khamni thaj kana avilo o vreme, bijanda čhave. Dija le alav Samuilo#1,20 Samuilo (jevrejski Šemuel) si jevrejsko izraz savo značil: “O Dol šunda.” Kava alav verovatno šaj i te značil: “E Devleso alav.” vaćarindoj: “Golese so rodijem le taro GOSPOD.”
I Ana dol e Samuile e Devlese
21Tegani, kana o Elkana đelo pe familijasa te dol žrtva e GOSPODESE baše gova berš thaj te ćeren kova so xalje sovli, 22i Ana ni đeli lesa, nego vaćarda pe romese: “Kana ka ačhavav e čhavore tari čuči, ka inđarav le thaj ka sikavav le e GOSPODESE, thaj o čhavoro ka ačhol gothe ane sa po džuvdipe.”
23Lako rom o Elkana vaćarda laće: “Ćer sar so de gođi kaj si emšukar. Ačh ćhere dži kaj ni ačhave le tari čuči. Nek o GOSPOD pherol piro obećanje.”
Gija voj ačhili ćhere te dol čuči pe čhave sa dži kaj ni ačhavol te dol le čuči. 24A kana ačhada te dol le čuči, inđarda le, gija cikne, ano Ćher e GOSPODESO ano Šilo. Lija pesa guruve tare trin berš, deš kila aro thaj jekh morčhi mol.
25Kana čhinde e terne guruve, e čhavore ande ko svešteniko o Eli, 26a i Ana phenda lese: “Xav man sovli pe tute, gospodarona, me sem koja džuvli savi ačhili kate paše tute thaj molisajli e GOSPODESE! 27Molisadem baše kava čhavoro, thaj o GOSPOD dija man kova so lestar rodijem. 28Golese akana dav le e GOSPODESE – ka avol e GOSPODESO ane sa po džuvdipe.”
Tegani gothe poklonisajle e GOSPODESE.
Currently Selected:
1. Samuilo 1: GSP
Highlight
Copy
Compare
Share
Want to have your highlights saved across all your devices? Sign up or sign in
