Rimljanenđe 15

Ćeren lačhipe averenđe a na korkoro tumenđe

1Amen save sam zurale ando paćipe, udžile sam te pomognisaras okolenđe save si slabe ando paćipe, a na te korkoro pešće ugodisaras. 2Svako amendar trubul te ugodil pire pašutnešće palo lesko lačhipe thaj te šaj barjol ando paćipe. 3Kaj ni o Hristo či ugodilas pešće, nego sago kaj si ramome ando Sveto lil: “Pe mande peline e uvrede okolenđe save vređonas tut.” 4A so sas majsigo ande nakhli vrjama ramome ando Sveto lil, ramome si pale amari pouka, te kroz o strpljenje thaj kroz e uteha savo del o Sveto lil avel men nada.

5A o Del savo del strpljenje thaj uteha, neka del tumen te aven složne maškar tumende, dok sledin e Hriste Isuse. 6Gajda jeće dušava ando jek glaso šaj slavisaras e Devles thaj e Dade amare Gospodesko e Isuse Hristosko.

7Zato prihvatin jek avres sago kaj o Hristo prihvatisarda tumen, pe Devlešći slava. 8Kaj, phenav tumenđe: O Hristos postanisardas sluga e Židovenđe te sikavel kaj si o Del verno thaj te potvrdil o obećanja dino e pradadenđe 9thaj te okola save naj Židovurja slavin e Devle zbog lesko milosrđe, sago kaj si ramome ando Sveto lil:

“Zato hvaliva tut maškar okola save naj Židovurja

thaj đilabava hvalospeve ćire alavešće.”

10Thaj još phenel:

“Veselin tumen, manušalen save naj sen Židovurja, lešće themeja.”

11Thaj još:

“Hvalin e Gospode, sa tumen save naj sen Židovurja;

neka sa e thema slavin les.”

12Thaj još o prorok Isaija phenel:

“Pojavila pe o potomko e Jesejesko,

okova savo uštela te vladil pe okola save naj Židovurja;

ande leste okola save naj Židovurja uzdinape.”

13A o Del kastar avel e nada neka pherel tumare ile svako bahtasa thaj e mirosa ando paćipe, te e Sveto Duhošće silava avel tumen nada ando izobilje.

O Pavle si sluga okolenđe save naj Židovurja

14Phralalen mungralen, me sem uverime, kaj vi korkoro sen pherde lačhipe, kaj si tumen sa o džanglipe savo si tumenđe potrebno te šaj sikaven jek avres. 15Ipak, pale varesave stvarja – te dav tumen pe lende gođi – majodlučno ramosardem zbog e milost savi o Del dija man 16te avav sluga e Hristosko Isusesko maškar okola save naj Židovurja. Me služiv sago rašaj gajda kaj propovediv e Devlešći Bahtali nevimata, te okola save naj Židovurja aven e Devlešće prihvatljivo žrtva, posvetime e Sveto Duhosa.

17Zato sem ponosno ando Hristo Isus pe okova so odnosil pe po Del. 18Khančesa aver či usudiv man te hvaliv man osim okolesa so o Hristo kroz mungro propovedanje thaj kroz mungre dela ćerda te aven poslušne e Devlešće okola save naj Židovurja. 19Vo godova ćerda kroz e sila e znakonenca thaj e čudenca, e Devlešće Duhošće silava. Gajda kaj katar o Jerusalim, pa sa dži ke Ilirika propovedivas pe sa e thana e Bahtali nevimata palo Hristo. 20Ali uvek trudivas man te na propovediv e Bahtali nevimata okote kaj si o Hristo već pindžardo, te na zidov pe avresko temelj, 21nego, sago kaj si ramome ando Sveto lil:

“Dićhena les okola savenđe pale leste nas mothodo

thaj haćarena okola save či ašundine.”

O Pavle si namera te posetil o Rimo

22Zbog godova but data semas sprečime te avav tumende. 23Ali akana, završisardem mungri bući ande akala thana, a već but brša zurale kamav te avav tumende. 24Zato avava tumende kana džava ande Španija. Nadiv man, naime, kaj kana džava po drom kaj avava tumende thaj okote pomožina manđe pe mungro drom, pošto majsigo dži varekaj uživisarav ando tumaro društvo.

25A akana džav ando Jerusalim te okote posluživ e Devlešće manušenđe. 26Kaj e khanđirja ande Makedonija thaj ande Ahaja saste ileja odlučisardine te ćiden pomoć pale okola kaj si čore maškar e Devlešće manuša ando Jerusalim. 27Ej, odlučisardine, a vi udžile si lenđe. Kaj ako okola save naj Židovurja postanisardine učesnikurja ande lengo duhovno lačhipe, udžile si te služin lenđe ande lenđe telesne potrebe. 28Čim predaiv lenđe godola love thaj gajda dovršiv lengo lačho delo, teljarava ande Španija thaj usput avava tumende. 29Džanav kaj anava pherdo Hristosko blagoslov kana avava tumende.

30Dav tumen solah, phralalen, amare Gospodeja e Isuse Hristosa thaj ande ljubav savi dija tumen o Sveto Duho te borin tumen manca gajda te molin e Devle pale mande. 31Molin tumen te o Del lel man sama katar e nepokorne ande Judeja thaj te e Devlešće manuša ando Jerusalim lačhe prihvatin e pomoć savi anav lenđe. 32Gajda, ako si e Devlešći volja, šaj te avav tumende e bahtasa thaj te odmoriv man tumenca. 33Neka o Del e mirosko avel savorenca tumenca. Amin.

Currently Selected:

Rimljanenđe 15: RČB

Highlight

Copy