Otkrivenje 11

O duj svedoci

1Tegani dobinđum i trska slično e štapese saveja merini pe, i ine maje phendo: “Ušti hem izmerin e Devlesoro hram hem o žrtveniko hem džen okolen kola ano leste perena ko kočija anglo Devel. 2Ali ma merin o boro e hramesoro savoi avri, adalese soi dindo e avere nacijenđe, kola ka gazinen upri Sveto diz sarandu duj masek. 3A me ka bičhalav mle duje svedokonen, urjavde ano neudobna šeja zako žaliba te prorokujinen adala hiljadu dušelu šovardeš dive.”

4Oni duj masline hem duj svećnjaci save terđovena anglo Gospodari e phuvjakoro. 5Te neko mangela te ćerel lenđe bišukaripe, i jag ikljola taro lengoro muj hem hala lengere neprijateljen. Te neko mangela te ćerel lenđe bišukaripe, ađahar mora te ovel mudardo. 6Olen isi vlast te phanden o nebo te na perel bršim zako vreme kad prorokujinena. A isi len hem vlast o panja te ćeren ano rat hem i phuv te khuven svakona nevoljaja, kad god adava mangena.

7Kad ka završinen pumaro svedočiba, protiv olende ka marel pe i Zver savi ikljola tari Beskrajno rupa. Oj ka pobedini len hem ka mudari len. 8Olengere telija ka pašljon ki ulica e bara dizjakiri, savi duhovno vičini pe Sodoma hem Egipat, kaj hem lengoro Gospod inele čhivdo ko krsto. 9Trin tekvaš dive o manuša taro sa o nacije, plemija, čhibja hem narodija ka dikhen lengere telija hem naka muken lengere telija te oven čhivde ano grobo. 10Okola kola živinena ki phuv ka radujinen pe hem ka slavinen lengiri propast hem ka bičhalen darija jekh averese, adalese so adala duj proroci mučinde len.

11Ali palo trin tekvaš dive, e Devlesoro dah savo dela dživdipe đerdinđa ano proroci, i on terdine pumenđe ko pre hem bari dar uklinđa okolen kola dikhena len ine.

12Tegani šunde zoralo glaso taro nebo sar vaćeri lenđe: “Aven akari upre!”

I on anglo jaćha pumare neprijateljengere upro oblako legardile ko nebo.

13I ko adava momenti ulo baro zemljotres hem dešto kotor e dizjakoro ulo uništime. Taro zemljotres mudardile efta hiljade manuša. Avera darandile, i dinde slava e Devlese kovai ano nebo.

14I dujto nevolja nakhli. Ače, sig avela i trito.

I eftato truba

15O eftato anđeo phudinđa i truba, hem ko nebo šundile zorale glasija save vaćerde:

“O carstvo e svetosoro ulo carstvo amare Gospodesoro

hem lesere Hristesoro.

Ov ka vladini zauvek!”

16A o bišu štar starešine, kola bešena ko pumare prestolja anglo Devel, pele mujeja đi phuv hem pokloninde pe e Devlese, 17vaćerindoj:

“Zahvalinaja će, Gospode Devla, kova sa šaj,

kova injan hem kova injanle,

so leljan to baro zoralipe

hem leljan te vladine!

18O narodija holjande,

hem ali ti holi

hem o vreme te sudini pe e mulenđe.

Alo o vreme te nagradine te slugen e prorokonen,

hem te manušen, hem okolen kola darana te anavestar, e tikoren hem e baren,

hem te uništine okolen kola uništinena i phuv!”

19Tegani phravdilo e Devlesoro hram ko nebo, hem ano leste mothovđa pe o Kovčeg oto lesoro savez. Tegani khuvde o munje, i grmljavina, o gromija, ulo zemljotres hem lelja te perel bari kukudi.

Currently Selected:

Otkrivenje 11: RAB

Highlight

Copy

Compare