Filimon 1
1
E Pavlesoro pozdrav
1Pisinava me o Pavle, kova injum ano phandlipe zbog o Hrist Isus, hem o phral o Timotej, amare šukare amalese hem saradnikose e Filimonese, 2hem e phenjaće e Apfijaće, hem e Arhipese, kovai amaro saborco zako Hrist, hem sa e khanđirjaće koja čedela pe e Filimonese ano čher:
3Milost tumenđe hem mir e Devlestar, amare Dadestar, hem e Gospodestar e Isuse Hristestar.
E Pavlesiri zahvalno molitva
4Uvek zahvalinava mle Devlese kad molinava tuće Filimone, 5adalese so šunava zako to mangipe sa e Devlesere manušenđe hem zaki ti vera ano Gospod Isus. 6Molinav man zako amaro zajedništvo savo isi amen ani vera te anel će po baro haljojba oto svako šukaripe savo isi amen ano Hrist. 7Adalese so to mangipe but radujinđa man hem hrabrinđa man, adalese so tu, phrala, osvežinđan o vile e Devlesere manušengere.
E Pavlesiri molba zako Onisim
8Adalese, iako ano Hrist tromam te naredinav će so valjani te ćere, 9zbog o mangipe najangle zamolinava tut, esavko savo injum, me o phuro Pavle, a akana hem ano phandlipe zbog o Hrist: 10molinava tut mle čhavese e Onisimese, kase ano phandlipe uljum duhovno dad. 11Ov tuće angleder na inele korisno, a akanai korisno#1,11 korisno O anav “Onisim” značini “korisno”. hem tuće hem maje. 12Bičhalava le palal kora tute, ole, kovai mlo vilo. 13Mangljum te ačhol kora mande, te šaj tuće ko than te kandel man đikote injum phandlo ano lancija zbog o evanđelje, 14ali na mangljum ništa te ćerav, a tu te na pristanine, te na ćere akava šukar delo adalese so injan terime, nego adalese so isi tut šukar volja. 15Šaj hem adalese inele hari cidime tutar, te šaj ov te ovel klo zauvek 16hem na više sar robo, nego sar više oto robo – sar volime phral. Ovi maje but manglo, a kobor li više tuće, na samo sar manuš nego hem sar phral ano Gospod.
17Adalese, te man dikheja sar saradniko, primin le sar man. 18A te ćerđa će nesavo bišukaripe ili te avela će nešto, me adava lava upra mande. 19Me, o Pavle, pisinava akava mle vasteja: ka platinav će sa so ov avela će. Te na phenav kobor tu maje aveja zako to duhovno dživdipe. 20Oja, phrala, te ovel man tutar korist ano Gospod. Osvežin mlo vilo ano Hrist! 21Pisinava će akava adalese so injum uverime ani ti poslušnost, adalese so džanav da ka ćere hem više adalestar so rodava.
22Hem pana akava, spremin maje i soba sojbnase, adalese so nadinav man da o Devel ka irini man tumende zbog tumare molitve.
Poslednja pozdravija
23Pozdravinena tut o Epafras, kovai mancar ano phandlipe zbog o Hrist Isus, 24hem mle saradnici o Marko, o Aristarh, o Dimas hem o Luka.
25I milost e Gospodesiri e Isuse Hristesiri tumare duhoja.
Currently Selected:
Filimon 1: RAB
Highlight
Copy
Compare
Share
Want to have your highlights saved across all your devices? Sign up or sign in
