Jevrejenđe 5

1Adalese so svako prvosvešteniko birini pe maškaro manuša hem čhivela pe te zastupini e manušen anglo Devel, te anel darija hem žrtve zako grehija. 2Hem korkore ole isi bizoralipa hem adalese šaj te ovel nežno premalo okolende kolai ano bidžandipe hem ani zabluda. 3Adalese ov mora te del žrtve hem zako grehija e narodosere hem zako ple grehija. 4Niko na dinđa pese adaja čast te ovel ani adaja služba, nego o Devel vičini le, sar so vičinđa hem e Aarone. 5Ađahar ni o Hrist korkoro pese na dinđa adaja čast te ovel Prvosvešteniko, nego čhivđa le o Devel kova phenđa lese:

“Tu injan mlo Čhavo,

avdive uljum će Dad.”

6Ađahar hem ko aver than phenela:

“Tu injan zauvek svešteniko

palo redo e Melhisedekesoro.”

7Zako vreme kad o Isus živinđa ki phuv, o molitve hem o molbe bare glasoja hem asvencar anđa anglo Devel kova šaj ine te spasini le oto meriba. I adalese so inele pokorno, o Devel uslišinđa le. 8Iako inele e Devlesoro Čhavo, siklilo te ovel poslušno taro adava so patinđa. 9A kad ulo savršeno, ulo izvor oto večno spasenje sarijenđe kolai lese poslušna 10hem o Devel proglasinđa le zako Prvosvešteniko palo redo e Melhisedekesoro.

Te ovel pe zrela sledbenici e Isusesere

11Adalestar šaj pana but so te vaćera, ali pharoi te objasnini pe, adalese so uljen lenja te šunen. 12I so đi akana već valjanđen te oven učitelja, palem valjani neko te sikaj tumen o osnovna sikaviba e Devlesere. Pana valjani tumenđe thud, a na o zoralo hajba. 13Adalese so, ko pana parvari pe thudeja, na haljola o sikaviba oti pravednost, adalese soi pana čhavoro. 14A o zoralo hajbai zako zrela manuša, kola zbog pumaro zrelo stanje isi len sposobnost te razlikujinen o šukaripe hem o bišukaripe.

Currently Selected:

Jevrejenđe 5: RAB

Highlight

Copy

Compare