Jevrejenđe 10
10
E Hristesiri žrtvai prinosime jekhvar zauvek
1O Zakoni samo senka oto šukar stvarija save avena – ali na hem lengoro pravo oblik. I adalese nane moguće istone žrtvencar, save ponovinena pe berš palo berš te usavršini okolen kola avena koro Devel. 2Te šaj ine o Zakoni te ćerel len savršena, onda naka den pe više ine žrtve. A okola kola slavinena e Devle ka oven ine očistime jekhvar zauvek hem naka osetinen pe ine kriva zako pumare grehija. 3Ali, o žrtve svako berš samo podsetinena upro grehija, 4adalese so o rat e guruvengoro hem e buznjengoro našti nikad te cidel o grehija.
5Adalese o Hrist, kad alo ko akava sveto, phenđa:
“Na mangljan o žrtve hem o prinosija,
nego pripreminđan maje telo.
6Na injanle zadovoljno e žrtvencar save tharena pe,
ni avere žrtvencar zako greh.
7Tegani phenđum: ‘Ače, avava,
te izvršinav ti volja, Devla,
adalese soi ađahar pisime mandar ano Sveto lil.’ ”
8Prvo phenđa: “Na mangljan o žrtve hem o prinosija” hem “na injanle zadovoljno e žrtvencar save tharena pe, ni avere žrtvencar zako greh”, iako o Zakoni rodela on te prinosinen pe. 9Palo adava phenđa: “Ače, avava te izvršinav ti volja.” Adaleja o Devel čhinaj o prvo prinosiba e žrtvengoro sar te šaj uspostavini o dujto prinosiba. 10O Isus Hrist inele poslušno e Devlesere voljaće: prinosinđa plo telo sar žrtva jekhvar zauvek hem ađahar ćerđa amen te ova sveta.
11Svako svešteniko taro dive ko dive ćerela pli služba anglo Devel. Bizo ačhojba prinosini istone žrtven, save nikad našti te ciden o grehija. 12A o Hrist jekhvar dinđa pes zako grehija hem zauvek beštino ko počasno than, oti desno strana e Devlesiri. 13Ov pana taro adava vreme adžićeri lesere neprijatelja te oven čhivde talo lesere pre. 14Adalese so, ov jekha žrtvaja zauvek anđa đi ko savršenstvo okolen kolai posvetime.
15A hem o Sveto Duho svedočini amenđe adalestar kad phenela:
16“Akavai o savez savo ka phandav olencar, palo adava vreme, vaćeri o Gospod:
ka čhivav mle zakonja ano lengere vile,
hem ka pisinav len ano lengere mislija.”
17Hem:
“Naka setinav man više oto lengere grehija
hem oto lengere bezakonja.”
18A kadi o grehija oprostime, na prinosinena pe više žrtve.
Poziv ki istrajnost
19I adalese, phraljalen, isi amen sa i sloboda te đerdina ki Svetinja upreder o svetinje prekalo rat e Isusesoro, 20kova phravđa amenđe nevo hem dživdo drom maškari zavesa – ple teloja. 21I adalese so isi amen baro Svešteniko kova vladini upreder o čher e Devlesoro, 22te ava anglo Devel čačikane vileja hem veraja savi pherdi pouzdanje, adalese soi amare vile očistime oti bišukar savest, a o telija thovde čistone panjeja. 23Adalese zorale te ićera amen upri nada savi ispovedinaja, adalese soi verno Okova kova dinđa amen obećanje. 24Te pazina ko adava te hrabrina jekh avere ko mothojba mangipe hem šukar delja. 25Ma te ačhava amare zajednička sastanci, sar so nesaven isi običaj, nego hrabrinen jekh avere. Akava ćeren but po više sar dikhena da avela o dive e Gospodesoro.
26Adalese so, te namerno grešinaja palo adava so pendžarđam o čačipe, onda nane više aver žrtva savi ka cidel o greh, 27nego ačhola samo o darutno adžićeriba o Sudo hem i bari jag savi sa ka uništini e Devlesere protivnikonen. 28Ko odbacini e Mojsijasoro zakoni, bizi milost mudari pe palo svedočiba e duje ili trine svedokonengoro. 29Zamislinen kobor po bari kazna ka zaslužini okova kova pregazini e Devlesere Čhave hem smatrini dai nečisto o rat oto savez savejai posvetime, hem ko vređini e Duho oti milost! 30Adalese so, amen džana Okole kova phenđa: “I osvetai mli, me ka irinav”, hem: “O Gospod ka sudini ple narodose.” 31Strašnoi te perel pe ko vasta e dživde Devlese!
32Setinen tumen e anglune divendar, kad, palo adava so injenle prosvetlime, nakhavđen but nevolje hem patnje. 33Nesavo puti javno injenle vređime hem marde, a nesavo puti pomožinđen averenđe kola isto adava nakhavde. 34Tumen učestvujinđen ano patiba okolengoro kolai phandle, hem radosno prihvatinđen kad ki sila lelje tumendar sa so ine tumen, adalese so džanđen da ani večnost isi tumen nešto soi po šukar hem trajno.
35Adalese ma odbacinen tumaro pouzdanje savo anela bari nagrada. 36Adalese so, valjani tumenđe istrajnost te ćeren e Devlesiri volja hem te priminen okova so obećinđa. 37Adalese so:
“Pana hari, pana samo hari,
pa ka avel Okova kova valjani te avel,
hem naka kasnini.
38A mlo pravedniko ka živini oti vera,
a te cidinđa pe,
naka ovav zadovoljno oleja.”
39Ali, amen na injam okolendar kola cidena pe, pa properena, nego injam okolendar kolen isi vera hem kolai spasime.
Currently Selected:
Jevrejenđe 10: RAB
Highlight
Copy
Compare
Share
Want to have your highlights saved across all your devices? Sign up or sign in
