Galatenđe 5

I slobodai ano Hrist

1O Hrist oslobodinđa amen te živina ani sloboda. Adalese oven istrajna ano late hem ma palem muken tumen ano jaram oto robujiba.

2Ače, me, o Pavle, phenava tumenđe: te obrezinđen tumen, o Hrist naka ovel tumenđe oti nisavi korist. 3Hem palem upozorinava svakone manuše kova mangela te obrezini pe: te obrezinđa pe, dužnoi te ićeri sa o Zakoni. 4Cidinđen tumen e Hristestar, tumen kola mangena te opravdinen tumen e Zakoneja; otpeljen oti milost e Devlesiri. 5Ali amen, prekalo Duho, adžićeraja o opravdanje pali vera savese nadinaja amen. 6Adalese so, ano Hrist Isus na vredini ni obreziba ni biobreziba, nego i vera savi mothoj pe prekalo mangipe.

7Šukar prastandiljen. Ko ačhavđa tumen adalestar te oven poslušna e čačipnase? 8Esavko uveriba protiv o čačipe na avela e Devlestar kova vičinđa tumen. 9Sar so phenena: “Oto hari kvasco sa o humer uštela.” 10Me injum uverime zako tumenđe ano Gospod da naka mislinen averčhane. A ko zbunini tumen, ka ovel zako adava kaznime e Devlestar, ko god te ovel adava. 11Ali te me, phraljalen, pana propovedinava oto obreziba, sose pana injum progonime? Te čače propovedinava oto obreziba, naka ovav ine progonime, adalese so adava propovediba, savo nane e Hristesere krstestar, naka ovel lenđe ine nisavi prepreka. 12O, so bi mangava ine adala kola zbuninena tumen, te čhinen pumendar sa tele!

O delja e telosere hem o plod e Duhosoro

13Tumen injen vičime te oven slobodna, phraljalen. Samo, ma te ovel tumari sloboda izgovor te udovoljinen tumare telosere požudenđe, nego ano mangipe služinen jekh averese. 14Adalese so, sa o Zakoni pherđola ani jekh naredba: “Volin te pašutne sar korkore tut.” 15Ali, te maškara tumende kicinena tumen hem hana tumen, pazinen te na uništinen jekh avere.

16Phenava tumenđe: živinen palo Duho, i naka udovoljinen tumare telosere požudenđe. 17Adalese so o telo mangela okova so protivini pe e Duhose, a o Duho mangela okova so protivini pe e telose. Akala duj protivinena pe jekh averese, i adalese tumen na ćerena okova so mangena. 18Ali, te injen legarde e Duhostar, na injen talo Zakoni.

19A o delja e teloserei pendžarutne: o blud, i nečistota, o nemoralno živiba, 20o idolopoklonstvo, o mađije, o neprijateljstvija, o kavge, i ljubomora, o holjaniba, o sebična ambicije, o razdorja, o podele, 21i zavist, o mačojba, o perverzna slavlja hem slična stvarija. Angleder so phenđum tumenđe, adava palem akana phenava: okola kola ćerena esavke stvarija naka nasledinen o carstvo e Devlesoro.

22A o plod e Duhosoroi o mangipe, i radost, o mir, i strpljivost, i ljubaznost, o šukaripe, i vernost, 23i krotkost hem i samokontrola, hem protiv akalende nane zakoni. 24Okola kola pripadinena e Hriste Isusese pumaro telo čhivde ko krsto lesere željencar hem požudencar. 25Te živinaja palo Duho, onda hajde te živina sar so o Duho mangela amendar. 26Ma te ova umislime, ma te izazivina jekh avere hem ma te ova ljubomorna jekh upro avereste.

Currently Selected:

Galatenđe 5: RAB

Highlight

Copy

Compare