Efežanenđe 5
5
1I adalese, dikhen te oven sar o Devel, adalese so injen lesere volime čhave. 2Živinen ano mangipe, sar so o Hrist zavolinđa amen, i korkoro pes dinđa zako amenđe sar mirisno prinos hem žrtva e Devlese.
3O blud hem svako nečistota, ili pohlepa te na pominen pe maškara tumende – sar so dolikujini e Devlesere manušenđe. 4Ni lađutne lafija, ni dilino vaćeriba, ni prosta šale, adalese so adava na dolikujini tumenđe. Umesto adava zahvalinen e Devlese. 5Adalese so, akava šukar te džanen: nijekhe bludniko, nečistone ili pohlepniko – soi isto sar hem o idolopokloniko – nane nasledstvo ano Carstvo e Hristesoro hem e Devlesoro. 6Ma muken niko te hovaj tumen čuče lafencar. Adalese so, zbog adava e Devlesiri holi avela upro neposlušna manuša. 7Adalese ma te ovel tumen ništa olencar!
8Adalese so, angleder injenle tomina, a akana injen svetlost ano Gospod. Živinen sar čhave e svetlosere. 9Adalese soi o plod oto svetlost sa soi šukar, pravedno hem čačikano. 10Istražujinen soi šukar anglo Gospod. 11Ma oven saučesnici okolengere kola ćerena o beskorisna delja e tominakere. Umesto adava ikalen ko svetlost adala delja. 12Adalese so, lađavoi čak hem te vaćeri pe adalestar so on garavde ćerena. 13A sa so ikali pe ko svetlost, dičhola, 14adalese so sa so ikali pe ko svetlost, ovela svetlost. Adalese phenela pe:
“Ušti, tu kova soveja,
ušti taro mule,
hem o Hrist ka osvetlini tut.”
15Adalese, pazinen sar živinena: na sar o nerazumna, nego sar o mudra. 16Šukar koristinen o vreme, adalese soi akala dive bišukar. 17Adalese ma oven nerazumna, nego haljoven soi i volja e Gospodesiri. 18Ma mačon oti mol, savi legari ano nemoralno živiba, nego pherđoven e Svetone Duhoja. 19Jekh averese vaćeren psalmija, zahvalna đilja hem duhovna đilja. Đilaben hem slavinen e Gospode sa tumare vileja. 20Uvek zahvalinen zako sa e Devlese hem e Dadese ano anav amare Gospodesoro e Isuse Hristesoro.
21Pokorinen tumen jekh averese ani dar anglo Hrist.
O romnja hem o roma
22O romnja te pokorinen pe pumare romenđe sar e Gospodese. 23Adalese soi o rom šero e romnjaće sar soi o Hrist šero e Khanđirjaće, ple telose, kasoroi Spasitelji. 24I sar so i Khanđiri pokorini pe e Hristese, ađahar hem o romnja ano sa te pokorinen pe pumare romenđe.
25Romalen, volinen tumare romnjen sar so hem o Hrist volinđa i Khanđiri, hem dinđa plo dživdipe zako olaće, 26te posvetini la, čistindoj ola ađahar so thovđa la ano pani lafeja, 27te ikali angla peste i Khanđiri ani pherdi slava, bizi mana hem bizi mrlja, ili bizo avera nedostaci, te ovel sveto hem bizi greška. 28Ađahar hem o roma dužnai te volinen pumare romnjen sar pumaro telo. Ko volini pla romnja, korkoro pes volini. 29Adalese so, niko nikad na mrzinđa plo telo, nego parvari le hem brinini pe olestar, sar so hem o Hrist e Khanđirjatar. 30Adalese so, amen injam o udovija lesere telostar. 31Sar so pisini ano Sveto lil: “Adalese o manuš ka ačhaj pe dade hem pe daja hem ka ovel jekh pe romnjaja, hem on duj ka oven jekh telo.” 32Akavai bari tajna, ali me adava vaćerava tumenđe e Hristestar hem e Khanđirjatar. 33Ađahar svako tumendar te volini pla romnja sar korkore pes, a i romni te poštujini ple rome.
Currently Selected:
Efežanenđe 5: RAB
Highlight
Copy
Compare
Share
Want to have your highlights saved across all your devices? Sign up or sign in
