2. Korinćanenđe 6
6
1Sar e Devlesere saradnici, molinaja tumen te na len uzalud e Devlesiri milost. 2Adalese so Devel phenela:
“Šunđum tut ano pravo vreme,
hem pomožinđum će ko dive oto spasenje.”
Ače, akanai o pravo vreme. Akanai o dive oto spasenje!
E Pavlesere nevolje
3Nikase nisave prepreke na čhivaja, sar te na arakhi niko zamerka amara službaće. 4Nego, ano sa mothovaja amen sar e Devlesere sluge: ani bari istrajnost, ano nevolje, ano čororipe, ano pharipe, 5dok marena amen, ano phandlipe, ano pobune, ano phare buća, ano bisovavne raća, ano bokhalipe, 6ani čistota, ano džandipe, ani strpljivost, ano šukaripe, ano Sveto Duho, ano čačikano mangipe, 7ano čačikano Lafi, hem ano zoralipe e Devlesoro. Isi amen i pravednost sar amaro oružje, zako napad hem zaki odbrana. 8Služinaja e Devlese bilo o manuša te poštujinen amen ili te mrzinen amen; bilo te vaćeren amendar šukar ili bišukar. Vaćeraja o čačipe, ali phenena amenđe da injam hovavne. 9Injam sar okola kolen na pendžarena, iako šukar džanen amen; stalno injam anglo meriba, ali, ače, pana injam dživde. Injam kaznime, ali na injam mudarde. 10Injam tužna, a palem uvek radosna; injam čorore, a palem buten ćerđam barvalen; nane amen ništa, a palem isi amen sa.
11Phravdeste vaćerđam tumenđe, Korinćanalen; amaro viloi širom phravdo tumenđe. 12Amaro vilo nane phandlo tumenđe, ali tumaro viloi phandlo amenđe. 13Vaćerava tumenđe sar mle čhavenđe, phraven tumare vile amenđe sar so amen phravđam amare vile tumenđe!
Hram e dživde Devlesoro
14Ma vucinen isto jaram e nevernikonencar. Adalese so, i pravednost hem o bezakonje na džana zajedno. O svetlost hem i tomina nane len ništa zajedničko. 15Ano soste o Hrist složini pe e Sotoneja#6,15 Sotoneja Ko grčki terđola “Veliar” soi jekh oto anava e Sotonesere.? Ili so isi zajedničko e verniko hem e neverniko? 16Hem savo dogovor isi maškaro e Devlesoro hram hem o idolja? Adalese so, amen injam o hram e dživde Devlesoro, baš sar so o Devel phenđa:
“Me ka živinav ano lende hem ka phirav maškaro lende;
me ka ovav lengoro Devel, a on ka oven mlo narodo.”
17Adalese,
“Ciden tumen olendar!
Odvojinen tumen! – vaćeri o Gospod.
Ma pipinen ništa soi nečisto,
hem me ka priminav tumen.
18Me ka ovav tumaro Dad,
a tumen ka oven mle čhave hem čhaja
– vaćeri o Gospod kova sa šaj.”
Currently Selected:
2. Korinćanenđe 6: RAB
Highlight
Copy
Compare
Share
Want to have your highlights saved across all your devices? Sign up or sign in
