1. Timotej 5
5
E udovicendar
1E purane manuše ma ukorin strogo, nego vaćer lese sar dadese, e ternenđe sar phraljenđe, 2e purane romnjenđe sar dajenđe, a e ternjenđe sar phenjenđe, ani sa i čistota.
3Poštujin e udovicen kolen nane ko te dikhel. 4Ali, te e udovica isi čhave ili unukija, najangle on nek sikljoven te mothoven pobožnost dikhindoj pumare čherutnen hem ađahar te irinen pumare dadenđe hem dajenđe, adalese soi adava šukar anglo Devel. 5A i đuvli kojai čače udovica hem nane ko te dikhel la, čhivđa pli nada ano Devel, hem dive hem rat terđola ano moliba hem ano rodiba. 6A okoja koja živini raspusno, već muli iakoi dživdi. 7Vaćer lenđe sa adava, te oven bizi mana. 8A te neko na dikhela pla familija, najangle ple čherutnen, adava odrekninđa pe oti vera hem po bišukari e nevernikostar.
9Ano popis oto udovice šaj te čhivel pe okoja koja nane po terni taro šovardeš berš, kola inele jekh rom. 10Oj valjani te ovel pendžardi palo šukar delja, te barjarđa čhaven, te inele gostoljubivo, te thovđa o pre e Devlesere manušengere, te pomožinđa okolenđe kola ine ani nevolja, te posvetinđa pe zako svako šukar delo.
11E terne udovicen ma čhiv ko popis, adalese so kad i požuda cidela len e Hristestar, mangena te den pe. 12Ađahar upra peste anena osuda, adalese so phagle pumaro angluno dindo lafi e Devlese. 13Sem adalestar soi lenjiva, siklile te džan oto čher ko čher, hem na samo soi lenjiva, nego hem ogovorinena hem mešinena pe kaj nane lengiri buti, vaćerindoj so na valjani. 14Adalese mangava o terne udovice te den pe, te bijanen čhaven, te dikhen pumaro čher, te na den than e neprijateljese zako prigovor. 15Adalese so, nesave već cidinde pe e veratar hem džele palo Sotoni.
16Te nesava vernica isi udovice kolen dikhela, nek ćerel ađahar, te na perel o pharipe upri khanđiri, te šaj i khanđiri te pomožini e udovicen kolen čače nane ko te dikhel.
E starešinendar
17O starešine kola šukar vodinena i khanđiri zaslužinena duplo čast, najangle okola kola propovedinena hem sikavena. 18Adalese so o Sveto lil vaćeri: “Ma phand o muj e guruvesoro sar te na hal kad ćerela buti e điveja” hem “O bućarno zaslužini pli plata.” 19Ma prihvatin i tužba protiv o starešina, sem kad isi duj ili trin svedoci. 20Okolen kola grešinena ukorin anglo sarijende, te šaj averen te ovel dar te grešinen.
21Rodava tutar anglo Devel, anglo Hrist Isus hem anglo izabirime anđelja te ićere tut ko sa akava bizo predrasude hem te na ićere nekasiri strana.
22Ma siđar te rukopoložine nekas. Ma te ovel tut ništa averengere grehencar; dikh te ačhove čisto.
23Ma više pi samo pani, le pohari hem mol zako to želuco hem zako adava so but puti injan namborme.
24Nesave manušengere grehija dičhovena, hem angleder olendar džana ko sudo e Devlesoro. A isi hem okola kasere grehija ka dičhoven ko sudo. 25Ađahar, hem e manušengere šukar delja dičhovena, a hem kad na dičhovena, našti te ačhoven garavde.
Currently Selected:
1. Timotej 5: RAB
Highlight
Copy
Compare
Share
Want to have your highlights saved across all your devices? Sign up or sign in
