1. Korinćanenđe 11

1Dikhen tumen upra mande sar so hem me dikhava man upro Hrist.

O đuvlja valjani te učharen pumaro šero

2Hvalinava tumen so ano sa setinena tumen mandar hem so ićerena o sikaviba ađahar sar so predinđum len tumenđe.

3Ali mangava te džanen dai o Hrist šero svakone muršese, dai o murš šero e romnjaće hem dai o Devel šero e Hristese. 4Svako murš kova molini pe ili prorokujini učharde šereja, lađari plo šero. 5Hem svako đuvli koja molini pe ili prorokujini bizo te učhari plo šero, lađari plo šero, adalese so adavai isto sar kadi lakoro šero muravdo. 6Adalese so, te i đuvli na učhari plo šero, nek šišini pe. Ali adalese soi lađavo e đuvljaće te šišini pe ili te muraj pe, nek učhari plo šero. 7O murš na valjani te učhari plo šero adalese soi ov e Devlesiri slika hem lesiri slava, a i đuvli e muršesiri slava. 8Adalese so, o murš nane ćerdo e đuvljatar, nego i đuvli e muršestar. 9Hem nane o murš stvorime zbog i đuvli, negoi i đuvli zbog o murš. 10Zbog adava, a hem zbog o anđelja, e đuvlja mora te ovel znako pese ko šero dai tali vlast.

11Ali, ano Gospod, niti i đuvli nezavisno e muršestar, niti o murš nezavisno e đuvljatar. 12Adalese so, sar soi i đuvli ćerdi e muršestar, ađahar hem o murš bijanđola prekali đuvli, a sa adava avela e Devlestar. 13Korkore odlučinen: dolikujini li e đuvljaće te molini pe bizo učhardo šero? 14Na li korkori i priroda sikaj tumen dai lađavo zako murš te ovel le bare bala, 15a te i đuvli isi la bare bala, dai adava laće ki slava? Adalese so, o balai laće dinde sar šamija.

16Nesave manuša mangena te raspravinen pe akalestar, ali amen nane esavko adeti niti ađahar ćerena e Devlesere khanđirja.

I Gospodnjo večera

17Ano akala uputstvija, save akana dava tumen, našti te hvalinav tumen, adalese so tumare sastanci na džana ko bolje, nego ko gore. 18Najangle, šunava da maškara tumende isi podele kad čedena tumen sar Khanđiri, so hem verujinava ko nešto adalestar. 19A hem valjani te oven podele maškara tumende sar te dičhol koi u pravu. 20Adalese, kad čedena tumen, tumen na hana i Gospodnjo večera, 21adalese so, svako tumendar hala pli večera, bizo te delini la averencar, pa ađahar jekh ačhola bokhalo, dok aver čak hem mačola. 22Nane tumen li čher, adari te han hem te pijen? Ili potceninena e Devlesiri khanđiri hem lađarena okolen kolen nane? So te phenav tumenđe? Te pohvalinav tumen? Ko akava našti te pohvalinav tumen.

23Adalese so, me priminđum o sikaviba e Gospodestar savo hem tumenđe predinđum: o Gospod Isus adaja rat kad inele izdajime lelja o maro 24hem, zahvalindoj e Devlese, phaglja le hem phenđa: “Akavai mlo telo savo dela pe tumenđe. Ćeren akava te setinen tumen mandar.” 25Ađahar lelja hem i čaša e moljaja pali večera hem phenđa: “Akajai čaša oto nevo savez ano mlo rat. Kad god olatar pijena, ćeren adava te setinen tumen mandar.” 26Adalese so, kad god hana akava maro hem pijena oti akaja čaša, e Gospodesoro meriba mothovena dok ov na avela.

27Adalese ko nedostojno hala o maro e Gospodesoro ili pijela oti čaša e Gospodesiri, ka ovel krivo zako greh protiv o telo hem o rat e Gospodesoro. 28Nek svako ispitujini korkoro pes angleder nego so hala o maro hem pijela oti čaša. 29Adalese so, ko hala hem pijela, a na poštujini e Gospodesoro telo, hala hem pijela pese ki osuda. 30Adalese isi but bizorale hem namborme maškara tumende, a but hem mule. 31Ali, kad bi korkore amen ispitujinaja, naka ovel amenđe ine sudime. 32A kad sudini amenđe o Gospod, ov vaspitujini amen te na ova osudime e svetoja.

33Adalese, mle phraljalen, kad čedena tumen te han e Gospodesiri večera, adžićeren jekh avere. 34Tei neko bokhalo, nek hal čhere, te na aven tali e Devlesiri osuda kad čedena tumen.

A so tičini pe oto aver stvarija, ka dav tumen uputstvija kad ka avav.

Currently Selected:

1. Korinćanenđe 11: RAB

Highlight

Copy

Compare