Zechariah 11
11
1 Lebanon, huugea oo haitoga,
gai de ahi ga dudu ai oo cedar!
2Denga cypress, goodou tangi see,
go hiidinga denga cedar gu baakuu,
denga manu ssomo mahamaha gu oha!
Denga oak o Bashan, goodou oo ma gi tangi;
go hiidinga denga manu ssomo gu sele!
3Hagalaangona adu de tangi o de gau hagaloosi ssiibi;
go hiidinga denga mommee iai helii gu oha!
Hagalaangona adu de tangi o denga laiono;
go hiidinga gu deai donu manu ssomo i Jordan!
Luu dangada hagaloosi
4E hagadaba Tagi Maolunga dogu Maadua: “Hagaloosia ange denga ssiibi gu baba ange laa e daa gi maakau. 5Dangada e hagao ina gilaadeu e daa gilaadeu ga maakau, gai gilaadeu tee hagaduasala. Dangada e hagao ina gi daha denga ssiibi e hagataba, ‘Duuhia Tagi Maolunga, au gu se dangada lava.’ Olaadeu dangada hagaloosi e dee lodo aaloha ange donu gi gilaadeu. 6Au e dee lodo aloha ange naa gi dangada o de henua, go Tagi Maolunga e hagataba. Au e dugu ange naa dangada gi olaadeu hodooligi ma dangada e paa ange gi gilaadeu gi vaivai haia gilaadeu. Gai gilaadeu e oha naa de henua, gai au e dee hagaola naa donu dahi gilaadeu.”
7Gai de gau e hagao ina denga ssiibi ne hai au gi hagaloosia ange denga ssiibi gu baba ange laa e daa gi maakau. Gai au ne hai e lua dogo; au ne hagaingoo ange dahi go de Abodonu, gai dahi go de Buni, gai au ga tilo ange ai de hagabuulingaa ssiibi. 8Gai au ne daa ga maakau de gau hagaloosi dogodolu laa i e dahi malama. Au tee maua de golomagi ogu lodo i gilaadeu, gai gilaadeu ne kino i de au. 9Gai au ne hagadaba, “Au gu dee hagaloosi adu goodou. Tangada gu dai magau gi magau, gai tangada e daia gi magau gi daia gi magau. Gai dangada e doe gi hagadau daia donu huu gilaadeu.”
10Gai au ne kave gee naa dogu dogo e hagaingoo ange laa go de Abodonu ga hhadi lua, ma de oha de hagatoo donu hagaheloongoi aagu ne hai madali denga huaahenua alodahi. 11De hagatoo donu hagaheloongoi ne oha i de laangi laa, gai denga ssiibi ne duasala ina laa ne daumada ina agu hegau gu iloo bolo muna laa nii Tagi Maolunga.
12Gai au ne hai ange gi gilaadeu, “Noo e danuaa mai i oodou daha, gai goodou gaamai dogu hagaoanga; gai noo e deai, gai goodou dugua donu huu.” Deelaa ai, gilaadeu ne hagao mai au i e matolu shekel#11.12 30 shekel e bei se 12 ounce. selevaa.#Mat 26.15 #Mat 27.9-10
13Gai Tagi Maolunga ne hai mai gi de au, “Magaa ange selevaa naa gi tangada hai gumedi hadu” — go de hagaoanga laumalie ne hagao ai au! Gai au ne kave de matolu shekel selevaa laa ga maga ange gi tangada hai gumedi hadu i lo te hale o Tagi Maolunga.
14Gai au ne hhadi hogi de lua dogo e hagaingoo ange laa go de Buni, gi dee buni Judah ma Israel.
15Gai Tagi Maolunga ne hai mai gi de au, “Ahe ange gaavee tuulanga o tangada hagaloosi e deai laa ono haigamaiana. 16Tilo, au e hagasula age naa dahi dangada hagaloosi i honga de henua, gai ia e dee anga ange donu gi delaadeu dai maakau, be go de ssala gilaadeu gu dee maaleva laa, be go de hagaieiangi gilaadeu gu lagolagohia, aabe go de haangai gilaadeu e mmahi olaadeu angaanga; aagai ia e daa denga ssiibi pedi ga gai, ma de aau olaadeu dabuvae.
17E vakaa naa tangada hagaloosi deai ono haigamaiana,
go de ia ne dilia de hagabuulingaa ssiibi!
De gadilaasa gi duudia dono lima ma dono ganomada madau!
Dono lima masui gi magau,
dono ganomada madau gi dee gide!”
Currently Selected:
Zechariah 11: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
