Mark 7

Dahulinga ma agoago a denga dubuna madagidagi

(Mat 15.1-9)

1Gai hanu Pharisee ma dangada sisi mai i Jerusalem ne hagabuni mai gi daho Iesu, 2gai gilaadeu gu gidee hanu ana dangada agoago e dee gilimalali olaadeu lima, e bei e dee hhui olaadeu lima e gaimee ai. 3(Go hiidinga denga Pharisee ma de gau Ssuu alodahi e dee gaimee donu noo tigi hhui olaadeu lima. Gilaadeu e daohi tahulinga a olaadeu dubuna madagidagi; 4de masavaa olaadeu e aahe mai ai i de mommee hagao mee, gai gilaadeu e dee gaimee noo tigi hhui olaadeu lima. E lagolago ange dahulinga alaadeu e daohi bei de hai e hhui ai denga ubu, ma ssaa, ma gumedi copper aama mommee e nnoho ai e gaimee.)

5Gai denga Pharisee ma de gau sisi ne ssili ange gi Iesu, “Gu aha au dangada agoago gu dee daudali ai naa i tahulinga a denga dubuna madagidagi? Gilaadeu e dee hhui olaadeu lima i mua delaadeu gaimee.”

6Gai ia ga hai ange gi gilaadeu, “E heohi donu muna a Isaiah ne tala laa i oodou dagodo, goodou e daahangadia dangada, bei de hai gu sisi ai laa,

‘De huaadangada nei e hagadubu au i olaadeu ngudu,

aagai olaadeu lodo e mmao gee donu i de au;

7e deai haigamaiana delaadeu daumaha mai gi de au.

Gilaadeu e agoago hainga a dangada

e dagodo be go muna a de Maadua.’ #Isa 29.13

8Goodou gu tili muna a de Maadua, gai ga daohi dahulinga a dangada.”

9Iesu ne hai ange hogi gi gilaadeu, “Goodou e heiangi donu i de tili muna a de Maadua, gi maua ai e goodou i de hai hegau i oodou dahulinga. 10Go hiidinga Moses ne hagadaba, ‘Hagadubu ina doo damana ma doo dinana,’ gai ‘Tangada e hagangadi mee ina dono damana aabe go dono dinana e daa donu gi magau.’ #Exo 20.12; 21.17; Lev 20.9; Deut 5.16 11Aagai goodou e hagataba, ‘Noo tangada e hai ange gi dono damana be go dono dinana, “Mee e heohi i dagu gaavadu gi de goe gu ni Corban” (e bei gu sigidaumaha ange gi de Maadua), 12deenei ai, goodou gu dee dugu ange dangada gi balea ange dono damana aabe go dono dinana.’ 13Goodou gu hai gi deai haigamaiana muna a de Maadua i oodou dahulinga e daohi. Gai e lagolago ange donu mee bee nei oodou e hai.”

Mee e haia ga dee gilimalali tangada

(Mat 15.10-20)

14Aagai Iesu ga hagahi ange hogi dangada gi loomai gi ono daha, ga hai ange gi gilaadeu, “Goodou nnoho mai hagalaangona agu muna, ma de hai gi tonu ange goodou aagena. 15E dee go mee a tangada e hhao gi lo tono ngudu e haia ga dee gilimalali ia, aagai go mee e ssao mai i lodo o tangada e haia ga dee gilimalali ia. [16Be goai e hanu ono dalinga e hagallongo ai, gai ia gi hagalaangona!]” #7.16 Hanu beebaa Greek ange laa e dee dagodo ai de gubu nei.

17Gai ga hano gee huu Iesu i daho dangada ga ahe gi de hale, aagai ana dangada agoago ga loomai ga ssili ange gi de ia de hagadoonunga o de mee hagasengasenga laa. 18Gai Iesu ne ssili ange gi gilaadeu, “E aha, goodou tigi tonu ange naa donu hogi? Goodou e dee iloo bolo mee e hhao gi lodo o tangada, e dee maua i de hai gi dee gilimalali ia, 19go hiidinga e dee ulu gi ono lodo, aagai e hulo gi lo te dinae, ga lava ga ssao ga hulo?” (Iesu ne tala muna nei, e hagaago mai ai bolo gai alodahi e gilimalali.)

20Iesu ne hai ange hogi gi gilaadeu, “Go mee e ssao mai i lodo o tangada e haia ga dee gilimalali ia. 21Go hiidinga mee e ssao mai i lodo o tangada, go denga maanadu baubau, ma de hai be se manu, ma de gaiaa, ma de daa tangada gi magau, ma de gaiaa de bodu o tangada, 22ma de nnoo hagamau mee, ma de baubau laumalie, ma de hadu muna, ma dahulinga hakino gee, ma de magiaa, ma de hai samu, ma de lodo maolunga, aama de lodo senga. 23Go mee baubau nei alodahi e ssao mai i lodo o tangada e haia ga dee gilimalali ia.”

De gai o de hahine Syrophoenicia

(Mat 15.21-28)

24Iesu ne hano gee hogi i kilaa ga hano gi de ungaamee go Tyre.#7.24 Hanu beebaa Greek ange laa e hagapuni ange aama Sidon. Gai ia ne hano ga noho i dahi hale i kilaa; gai ia tee lodo gi iloo e dangada, aagai ia tee maua i de mmuni i dangada. 25Gai tee mmule donu gai dahi hahine, e dahi laa ana damaa hine gu iai de hagasaalunga baubau, gu langona longo o Iesu, gai ia ne humai ga hagabaguu gi lalo i gaogao luoono vae. 26De hine nei se hine Greek ne haanau i Syrophoenicia. Gai ia ne dangidangi ange gi Iesu gi haia gi hano gee de hagasaalunga baubau i daho dana damaa hine.

27Iesu ne hai ange gi de ia, “Haangai ina ange denga dama i mua, go hiidinga e dee heohi de kave gai a denga dama e tili ange gi denga gaaduu.”

28Aagai de hine laa ne hai ange gi Iesu, “Tagi Maolunga, e heohi donu au muna, gai denga gaaduu i lalo teebele e gai hogi amuamu mee e too iho i teebele o denga dama!”

29Gai Iesu ga hai ange gi de hine laa, “Go hiidinga o au muna, hannoo; de hagasaalunga baubau gu hano gee mai i daho dau damaa hine!”

30Gai ga ahe huu de hine laa gi dono hale, gai ia gu gidee dana damaa hine e dagodo i honga dono moenga, gai de hagasaalunga baubau gu hano gee mai i ono daha.

Taane longo duli ma de lau de alelo

31Iesu ne hano gee hogi i Tyre ga hano laa Sidon e hano iho ai gi de Vai o Galilee, i de ungaamee o Decapolis.#7.31 Decapolis e bei de madaangahulu aduhale. 32Gai hanu dangada ne gaamai gi de ia dahi daane longoduli ma de lau dono alelo, ga dangidangi ange ia gi dugua ange dono lima gi ono elunga.

33Gai ia ga kave gee taane laa mai i daho dangada soa laa, gai ia ga velo ange dono madannia gi lodo luoono dalinga, ma de saavale ange gi lo tono lima ga poo ange ai de alelo o taane laa. 34Gai ia ga galo age gi de langi ga manava i lunga, ga hai ange gi de ia, “Ephphatha,” e bei “Gi maahuge!” 35Gai luu dalinga o taane laa gu maahuge, dono alelo gu madala gai ia gu maua i de basa gi danuaa.

36Gai Iesu ne tala hagasoe ange gi dangada gilaadeu gi dee daalaa mee laa. Gai gilaadeu ga kii ange donu de hulo ga tala mee laa. 37Gai dangada gu llele mouli mmao, ga hagataba, “Mee alodahi a taane nei e hai e danuaa. Ia gu hai donu hogi gilaadeu e longoduli gi langona, gai gilaadeu e dee pasa gu pasa!”

Currently Selected:

Mark 7: DBD

Highlight

Copy

Compare