Matthew 9

De hagaieiangi a Iesu taane balagelage

(Mark 2.1-12; Luke 5.17-26)

1Gai Iesu ne gage i de boose e hano gi de baasi gee de vai, gi dono aduhale donu. 2Gai tilo, hanu dangada ne saabai mai gi Iesu dahi daane balagelage i honga dono moenga. Gai de masavaa huu a Iesu ne gidee ai olaadeu kai, gai ia ga hai ange gi taane balagelage laa, “Dagu dama, koe gi lodo mmahi, gu maatala oo haisala.”

3Gai hanu dangada sisi i kilaa ne hagataba i olaadeu magavaa, “Taane nei e hagangadi mee de Maadua!”

4Aagai Iesu gu iloo e ia alaadeu maanadu, gai ia ga hai ange, “Gu aha goodou gu maanadu baubau ai naa i oodou lodo? 5Dee hee de mee e hai ngaohie: go de hai ange, ‘Gu maatala oo haisala,’ aabe go de hai ange, ‘Hidi age seesee hannoo’? 6Aagai mee nei ne hai gi iloo ai e goodou, bolo Tama a Tangada e dahi donu ono sauaa i henua i lalo e degi ange ai gi haisala.” Gai ia ga hai ange gi taane balagelage laa, “Hidi age, sabaia doo moenga hannoo gi doo hale!” 7Aagai taane laa ga hidi age ga hano gi dono hale. 8Gai dangada alodahi ne gidee laa mee laa gu maatagu mmao, gai gilaadeu ga tuhi de Maadua ne gaavange laa ssauaa laumalie laa gi dangada.

De hagahi a Iesu Matthew

(Mark 2.13-17; Luke 5.27-32)

9Gai ga hano gee huu Iesu i kilaa, gai ia gu gidee dahi daane e noho i de mommee hagabudu taagisese, dono ingoo go Matthew. Gai Iesu ga hai ange gi de ia, “Daudali mai i de au.” Gai Matthew ga hidi age ga daudali ange i de ia.

10De masavaa o Iesu ne hakaogao ai ma e gaimee i de hale o Matthew, gai ne soa hogi dangada e hagabudulia taagisese, ma de gau baubau ne loomai ga gaimee madali gilaadeu ma ana dangada agoago.#Luke 15.1-2 11Gai ga gidee huu e denga Pharisee, gai gilaadeu ga ssili ange gi ana dangada agoago, “Gu aha gu gaimee ai naa doodou dangada agoago madali de gau e hagabudulia taagisese ma de gau baubau?”

12Aagai ga langona huu e Iesu alaadeu muna, gai ia ga hai ange gi gilaadeu, “E dee go dangada e dee mmagi e ssala tangada hai magi, aagai go gilaadeu e mmagi e saalaa ia. 13Goodou hulo haia gi iloo e goodou de hagadoonunga o muna a de Beebaa Dabu e hai ange laa, ‘Au e lodo i de degi, e dee go ssigidaumaha.’ #Mat 12.7; Hos 6.6 Go hiidinga au tee humai e hagahi gilaadeu e heohi, aagai go gilaadeu e haisala.”

De ssili dagodo o de hagahiigai

(Mark 2.18-22; Luke 5.33-39)

14Gai dangada agoago a John ne loomai hogi ga ssili ange gi Iesu, “Gu aha gimaadeu ma denga Pharisee e dee modu ai nei de hagahiikai, aagai au dangada agoago e dee hagahiikai?”

15Iesu ne ssili ange gi gilaadeu, “E maua e gilaadeu ne saalaa i taonga hagahai bodu gi hinangalosaa, i de masavaa o taane gu dai hagahai bodu e noho ai i olaadeu daha? Gai e loomai naa donu laangi e kave gee ai taane gu dai hagahai bodu i olaadeu daha, gai gilaadeu ga hagahiikai ai.

16E deai donu dangada e bonodia ange de malo duai i dahi bido malo hoou, go hiidinga de hono hoou laa e ssae naa de malo duai laa, gai gu kii ange de laumalie de mommee e masae. 17E deai hogi dangada e hagasahulia ange uvaini hoou gi lodo gili manu duai. Noo e hai mee nei, gai denga gili manu laa gu maoha gai uvaini laa gu moumou. Aagai uvaini hoou e hagasahu ange gi lodo gili manu hoou, gai luu mee nei ngaadahi gu maua i de doange gi danuaa.”

Tamaa hine a dahi dagi ma de hine magi dodo

(Mark 5.21-43; Luke 8.40-56)

18De masavaa a Iesu e tala ange ai mee nei gi dangada, gai dahi dagi ne humai ga duuduli i ono mada i mua, ga hai ange, “Dagu damaa hine se goodo magau donu huu; aagai koe humai dugua ange doo lima gi ono elunga gi mouli age ai ia.” 19Gai Iesu ne hidi age ga hano madali taane laa, gai ana dangada agoago ne hulo madali ia.

20Gai e dahi hahine ne magi dodo i e madaangahulu ma lua ngadau, ne humai gi ono dua ga poo ange huga o dono malo. 21Go hiidinga ia ne hagadaba i ono lodo, “Noo au e poo ange dono malo, gai au e ieiangi donu.”

22Aagai Iesu ne huli dua ga gidee e ia de hine laa, gai ia ga hai ange, “Dagu damaa hine, hagamaamaane ina oo lodo, doo gai gu hagaieiangi goe.” De masavaa laa donu huu gai de hine laa gu ieiangi.

23Gai ga dae huu Iesu gi de hale o tagi laa, gai ia gu gidee dangada e hagadangidangi i denga flute, gai dangada soa gu hellumi, 24gai ia ga hai ange gi gilaadeu, “Goodou ssao gi haho, de gauligi hahine nei tigi magau, ia e seni donu huu.” Aagai dangada ga kada i de ia. 25Gai ga lava huu i dana hai de gau soa laa gi hulo gi duaahaho, gai ia ga ulu gi lodo ga poo de lima o de gauligi hahine laa, gai ia gu mouli age. 26Aagai longo o de hegau laa gu dele i de ungaamee laa alodahi.

De hagaieiangi a Iesu e dogolua daane dee kide

27De masavaa o Iesu ne seesee ai e hano gee mai i kilaa, gai e dogolua daane dee kide ne daudali ange i de ia, ma de hevaalogi ga hai ange, “Tama a David, lodo aloha mai gi gimaau!”

28Gai de masavaa o Iesu ne ulu ai gi lo te hale, gai luu daane dee kide laa gu loomai gi ono daha, gai Iesu ga ssili ange gi gilaau, “Gooluu e hagadonusia bolo au e maua i de hai de hegau nei?”

Gilaau ne hai ange gi de ia, “Uaa, de Ia Aamua!”

29Gai Iesu ga poo ange olaau ganomada ga hai ange, “E hai adu gi gooluu gi bei ooluu kai!” 30Gai olaau ganomada gu kide. Gai Iesu ne hai ange gi gilaau, “Gooluu e dee tala ange gi dahi dagodo o de mee nei.” 31Aagai luu daane laa ne hulo ga hagadele ono longo i de henua laa alodahi.

De hagaieiangi a Iesu taane lau de alelo

32De masavaa olaadeu ne ssao ai e hulo, gai hanu dangada ne dagi mai hogi gi Iesu dahi daane lau de alelo, go hiidinga de hagasaalunga baubau e noho i ono daha. 33Gai ga hano gee huu de hagasaalunga baubau mai i daho taane laa, gai ia gu basa; gai dangada alodahi gu llele mouli ga hagataba, “Tigi ai donu mee bee nei ne gidee i magavaa o de gau Israel.”

34Aagai denga Pharisee ne hai ange, “Taane nei e hai gi hulo gee denga hagasaalunga baubau i ssauaa o tagi o denga hagasaalunga baubau.” #9.34 Hanu beebaa Greek ange laa e dee dagodo ai de gubu nei. #Mat 10.25; 12.24; Mark 3.22; Luke 11.15

Gu laumalie tau gai, gu sogoisi de gau hai hegau

35Gai Iesu ne hagadaga i denga aduhale ma mommee nnoho hugadoo, ga agoago i denga synagogue ga tala de longo danuaa o de nohoanga hodooligi o de langi, ma de hagaieiangi denga hagadaagangaa magi ma baageaa alodahi.#Mat 4.23; Mark 1.39; Luke 4.44 36De masavaa a Iesu ne gidee ai dangada soa, gai ia gu lodo aloha i gilaadeu, go hiidinga gilaadeu e dee nnoho paba gai e maoha saele, bei dagodo o denga ssiibi e deai laa selaadeu dangada hagaloosi.#Num 27.17; 1 Ki 22.17; 2 Ch 18.16; Ezk 34.5; Mark 6.34 37Aagai ia ga hai ange gi ana dangada agoago, “Gu laumalie mmao tau gai, gai gu sogoisi de gau hai hegau.#Luke 10.2 38Deenei ai, goodou dangidangi ange gi de Ia Aamua o tau gai, ia gi haia gi hulo de gau hai hegau gi dana dau gai.”

Currently Selected:

Matthew 9: DBD

Highlight

Copy

Compare