Matthew 6

Abodonu ange gi de gau hagaau aloha

1“Goodou kana dagidiiloo gi dee haia e goodou denga hegau danuaa gi gidee ai e dangada. Noo goodou e hai mee nei, gai e deai donu oodou hagaoanga mai i daho doodou Damana i de langi laa.#Mat 23.5

2Deenei ai, noo goodou gu gaavange hanu mee gi tangada e duasala, aagai goodou gi dee ilihia denga trumpet i mua, bei dagodo hegau a dangada e daahangadia dangada, i denga synagogue ma honga denga haiava, gi duuhia ai e dangada gilaadeu. Ni muna abodonu aagu e hai adu nei gi goodou, gilaadeu gu lava donu i de kave olaadeu hagaoanga. 3Aagai de masavaa naa huu oodou e gaavange ai dahi mee gi tangada gu duasala laa, gai goodou haia gi dee iloo e doo lima masui mee a doo lima madau gu hai, 4gi dee iloo ai e dangada oodou mee gu ngadi gaavange. Aagai doodou Damana e gidee laa mee e dee gidee ga hagao adu ai goodou.#6.4 ga hagao adu ai goodou: hanu beebaa Greek ange laa e hagapuni ange i madamada o dangada. E bei ai de gubu e 6 ma 18.

Agoago i dagodo o talodalo

(Luke 11.2-4)

5“Gai de masavaa naa huu oodou e dalodalo ai, aagai goodou gi dee ago ange i gilaadeu e daahangadia dangada! Gilaadeu e llodo e tuu e dalodalo i denga synagogue ma dege o denga haiava, gi gidee ai e dangada alaadeu hegau. Ni muna abodonu aagu e hai adu nei gi goodou, gilaadeu gu lava donu i de kave olaadeu hagaoanga.#Luke 18.10-14 6Gai noo goodou gu dalodalo, aagai goodou ulu gi lodo oodou aabi, ga pono de haitoga, aagai goodou ga dalodalo ange gi doodou Damana e dee gidee laa. Gai doodou Damana e gidee laa mee e dee gidee ga hagao adu goodou. 7Goodou aude ngadi daalaa hanu muna lagolago i doodou masavaa e dalodalo ai, bei de hai o denga Gentile e dalodalo ai. Gilaadeu e maanadu bolo de Maadua e hagallongo alaadeu dalodalo noo gilaadeu e hagalloa alaadeu dalodalo. 8Goodou aude ago ange i gilaadeu, go hiidinga doodou Damana e lava donu i dana iloo oodou mee e duasala ai, i mua doodou dangidangi ange gi de ia.

9Gai deenei doodou hai e dalodalo ai:

‘Demaadeu Damana i de langi laa,

gi dabu doo ingoo;

10gi humai doo nohoanga hodooligi;

gai gi hai oo lodo i henua i lalo,

bei de hai e hai ai laa i de langi.

11Koe gaamai gai e danuaa mai gi gimaadeu ailaa nei.

12Gai daalaa omaadeu haisala

bei demaadeu tala haisala olaadeu e haisala mai gi gimaadeu.

13Gai gi dee dagia ange gimaadeu gi de hagatale,

aagai hagaola ina gimaadeu mai i de ia baubau laa.’ #6.13 Hanu beebaa Greek ange laa e hagapuni ange, Niiou de nohoanga hodooligi ma ssauaa aama de mahamaha, ga hano ai e dee ngado mai. Amen.

14Go hiidinga noo goodou e degi ange gi haisala o dangada, aagai doodou Damana i de langi laa e degi adu hogi gi goodou.#Mark 11.25-26 15Gai noo goodou e dee degi ange gi haisala o dangada, aagai doodou Damana i de langi e dee degi adu hogi gi oodou haisala.

Agoago i dagodo o de hagahiigai

16“Noo goodou e hagahiikai, gai goodou gi dee haia gi dagodo hagaaloha oodou mada, bei dagodo olaadeu e daahangadia dangada. Gilaadeu e hai gi dagodo hagaaloha olaadeu mada, gi gidee ai e dangada bolo gilaadeu e hagahiikai. Ni muna abodonu aagu e hai adu nei gi goodou, gilaadeu gu lava donu i de kave olaadeu hagaoanga. 17Gai noo goodou gu hagahiikai, aagai goodou hagasulu ina oodou biho ga hhui oodou mada, 18gi dee gidee ai e dangada bolo goodou e hagahiikai, aagai doodou Damana e dee gidee laa. Gai doodou Damana e gidee laa mee e dee gidee ga hagao adu ai goodou.

De lava i de langi

(Luke 12.33-34)

19“Goodou gi dee hagaduulia oodou goloa hagamogomogo i henua i lalo, go de mommee e gaina ai e de goa ma de hongagelegele baalanga, aama de gaiaadia e de gau gaiaa.#Jms 5.2-3 20Aagai hagaduulia oodou goloa hagamogomogo i de langi, go de mommee e deai goa iai ma tee hongagelegele baalanga, aagai de gau gaiaa e dee maua i de ulu e gaiaa. 21Go hiidinga go hee naa huu iai oodou goloa hagamogomogo, gai go kilaa hogi iai oodou lodo.

De laama o de angaanga

(Luke 11.34-36)

22“De ganomada go de laama donu o de angaanga. Deenei ai, noo e danuaa luoo ganomada, gai doo angaanga alodahi e maalama; 23gai noo e baubau luoo ganomada, gai doo angaanga alodahi gu gohu. Aagai noo gu hagagohu de maalama i oo lodo, gai gu kona donu de laumalie de gohu!

De Maadua ma oo goloa

(Luke 16.13)

24“E deai donu se dangada e maua i de hai hegau ange gi e dogolua dangada aamua; go hiidinga ia e kino naa i dahi gai e aloha i de ia ange laa, aabe ia e hagapigi ange naa gi dahi gai ga hagangadi mee de ia ange laa. Goodou e dee maua hogi i de hai hegau ange gi de Maadua ma sseene.#6.24 sseene: de Beebaa Greek e hai ange Mammon.

Goodou aude manavasaa

(Luke 12.22-31)

25“Deenei ai, au e hai adu gi goodou, goodou aude manavasaa i oodou mouli, ma oodou mee e gai, be go oodou mee e unu, aabe gi manavasaa i oodou angaanga, ma oodou mee e kahu ai. E aha, e dee hagamogomogo ange de mouli o tangada i denga gai, gai de angaanga e hagamogomogo ange i malo e kahu ai? 26Goodou kalo ange diiloo denga manu llele: gilaadeu e dee doo, be hagihagi, aabe hagabudu alaadeu gai i mommee doange; aagai doodou Damana i de langi laa e haangai ange gilaadeu. Gai goodou e kii ange donu i de hagamogomogo i denga manu nei. 27Gai goai i oodou magavaa e maua i de hagapuni ange dahi aoaa e hagalooloa ai dono mouli, i dana maanadu ga manavasaa ai?

28Aagai gu aha goodou gu manavasaa ai naa i oodou mee e kahu ai? Goodou kalo ange diiloo de hai o denga lilii i lo te duu malaelae e ssomo ai. Gilaadeu e dee hai hegau aabe e llanga olaadeu malo, 29gai au e hai adu gi goodou, Solomon ma dono mahamaha alodahi tee gahu hagadanuaa donu bei denga manu nei.#1 Ki 10.4-7; 2 Ch 9.3-6 30Aagai noo de Maadua e hakahu danuaa denga helii i lo te duu malaelae, go mee e ssomo laa ailaa nei, gai daiao gu tili ange gi lo te ahi, aagai e dee kii ange naa donu dana hakahu goodou — goodou de gau vaaligiligi oodou kai?

31Deenei ai, goodou gi dee manavasaa gi hagataba, ‘Ni aha amaadeu e gai? Gai ni aha amaadeu e unu? Gai ni aha omaadeu e kahu ai?’ 32Aanei mee a denga Gentile e hagaduu ngae ma e ssala, gai doodou Damana i de langi e iloo oodou mee alodahi e duasala ai. 33Aagai goodou saalaa i mua nei de nohoanga hodooligi o de Maadua ma dono heohi, gai mee nei alodahi e gaavadu naa donu gi goodou. 34Deenei ai, goodou gi dee manavasaa ange gi daiao, go hiidinga daiao e hanu naa hogi mee hagamanavasaa iai. Denga laangi alodahi e hanu hugadoo hai ngadaa iai.

Currently Selected:

Matthew 6: DBD

Highlight

Copy

Compare