Luke 2

De haanau o Iesu

(Mat 1.18-25)

1Laangi laa gai Caesar Augustus ne hagailoo bolo dangada alodahi i henua i lalo e sisi olaadeu ingoo. 2Deenei tahi hanonga ne sisi ai ingoo o dangada, go de masavaa o Quirinius e goobenaa ai i Syria. 3Aagai dangada alodahi gu hulo e sisi olaadeu ingoo i olaadeu aduhale donu.

4Gai Joseph ne humai hogi i de aduhale go Nazareth i Galilee e hano gi Judea, gi de aduhale o David, e hagaingoo ange laa go Bethlehem, go hiidinga ia se dangada de aamuli o David, 5e sisi ai dono ingoo madali Mary, dono hagababa, gai Mary gu hai dama. 6Gai de masavaa olaau e nnoho ai i kilaa, gai gu dae dono masavaa e haanau ai. 7Gai ia ga haanau dana dama daane madua, ga saabini i de malo saabini ga hagadagodo i de mommee gaimee o denga manu, go hiidinga gu deai selaadeu mommee i de hale gaainga.

De gau hagaloosi ssiibi ma de gau de langi

8Gai e hanu hogi dangada hagaloosi ssiibi i de henua laa e nnoho i de mommee malaelae ma e hagaloosi ai alaadeu ssiibi i de boo laa. 9Gai tangada de langi o Tagi Maolunga ga hakide ange gi gilaadeu, gai de mahamaha o Tagi Maolunga gu hagamaalama gilaadeu, gai gilaadeu gu maatagu mmao. 10Gai tangada de langi ga hai ange gi gilaadeu, “Goodou aude maatagu! Tilo, au ne gaamai gi goodou dahi longo danuaa ma de hagamalangilangi ange gi dangada alodahi. 11Anailaa nei gai gu haanau i de aduhale o David doodou Dangada Hagaola, go Klisdo Tagi Maolunga. 12Gai deenei de hagailonga adu gi goodou: goodou e gidee naa dahi gaagaa e saabini i de malo saabini ma e hagadagodo i lo te mommee gaimee o denga manu.”

13De masavaa laa donu huu, gai gu hagabuni mai de gau de langi soa mmao gi daho tangada de langi laa. Gai gilaadeu ga tuhi de Maadua, ga hagataba,

14“Duuhia de Maadua i de mommee maolunga mmao,

gai de baba gi dagodo i henua i lalo,

i daho dangada oona e malangilangi ai!”

15Gai ga aahe huu de gau de langi laa gi de langi, gai de gau hagaloosi ssiibi ga pasa i olaadeu magavaa ga hagataba, “Gidaadeu ga hulo gi Bethlehem e tilo ai mee a Tagi Maolunga gu hagaago mai nei bolo gu hai i kilaa.”

16Gai gilaadeu ne hagamoolau ga hulo gi kilaa, gai gilaadeu gu gidee Mary ma Joseph, aama de gaagaa e hagadagodo laa i de mommee gaimee o denga manu. 17Gai ga gidee huu e gilaadeu ia, gai gilaadeu ga tala mee a tangada de langi gu tala ange laa gi gilaadeu, i dagodo o tamaa gauligi laa. 18Gai dangada alodahi ne langona mee laa gu llele mouli i mee a de gau hagaloosi ssiibi ne tala ange gi gilaadeu. 19Aagai Mary ne daohi ma de hagasaele mee nei alodahi i ono lodo. 20Gai de gau hagaloosi ssiibi ne aahe gi delaadeu mommee, ga tuhi de mahamaha o de Maadua, i hiidinga o mee alodahi alaadeu ne langona ma de gidee, bei de hai gu tala ange ai gi gilaadeu.

De gaamai o Iesu gi de temple

21Gai dua huu de valu laangi, go de masavaa ne tuu dagaholiage ai tamaa gauligi, gai ia gu hagaingoo ange go Iesu, go de ingoo a tangada de langi ne gaavange laa gi de ia i mua dono hagadili i lo te mommee o denga dama.#Lev 12.3; Luke 1.31

22Gai ga dae mai huu de masavaa e hai ai tahulinga o de hagagilimalali, bei dagodo de hainga a Moses, gai Mary ma Joseph ga kave tamaa gauligi gi Jerusalem gi mada luu mada o Tagi Maolunga,#Lev 12.6-8 23bei de hai gu sisi ai laa i de hainga a Tagi Maolunga, e hai ange: “Denga dama daane maatua alodahi e hagabinga bolo gu hagadabu ange gi Tagi Maolunga.” #Exo 13.2, 12; 13.15 24Gai gilaadeu ne hulo hogi e hai dahi ssigidaumaha bei de hai gu sisi ai laa i de hainga a Tagi Maolunga, “e lua manu kono, aabe e lua pigeon gauligi.”

25Gai e dahi daane i Jerusalem, dono ingoo go Simeon, ia se daane heohi ma de hai lodo o de Maadua, ia ne tali de hagaola o de gau Israel, gai de Hagasaalunga Dabu e noho i ono daha. 26Gai de Hagasaalunga Dabu ne hagaago ange gi de ia bolo ia e dee magau ga dae ai gi dana gidee de Klisdo mai i daho Tagi Maolunga gu lava laa i de hagatoo donu. 27De Hagasaalunga ⌊Dabu⌋ ne hagangalue hogi ono lodo ia gi hano gi de temple. Gai de masavaa huu a luu maadua o Iesu ne gaamai ai tamaa gauligi e hai ange gi de ia mee gu sisi laa i de hainga, 28gai Simeon ga saabai age tamaa gauligi ga tuhi de Maadua ga hagadaba:

29“Tagi Maolunga, dugua mai au, doo dangada hai hegau, gi magau i de baba,

bei dau hai gu hagatoo donu ai.

30Go hiidinga luoogu mada gu gidee dau hagaola,

31aau gu hagadabena laa i madamada o dangada alodahi,

32ia se maalama e hagaago ange ai gi denga Gentile,

ma de hagamahamaha ai oo dangada go de gau Israel.” #Isa 42.6; 49.6; 52.10

33Gai luu maadua o Iesu gu llele mouli i muna a Simeon ne tala ai ono dagodo. 34Gai Simeon ne hagamanuuia gilaadeu ga hai ange gi Mary, dono dinana, “Tamaa gauligi nei gu hagababa ange gi oohaa ma de hagaahe age o dangada soa o Israel, gai se hagailonga e hai baasi ange dangada aagena i alaadeu muna, 35e hagaago mai ai lodo o dangada soa. Gai de gadilaasa e velo naa hogi oo lodo.”

36Gai e dahi hogi hahine pelaabisi, dono ingoo go Anna, se damaa hine nii Phanuel, mai i de aamuli o Asher. Ia gu madumadua i de masavaa laa, gai ia ne hai bodu ange gi dahi daane i e hidu ngadau, mai i de masavaa oona se bua moe ai, gai dono bodu ga magau, 37gai ia tee ahe ange e hai bodu, de masavaa laa gai gu madavalu ma haa ono ngadau. Gai ia e dee hano gee donu i de temple, gai ia e daumaha ma de hagahiigai, aama de dalodalo i de boo ma de laangi i kilaa. 38De hine laa ne humai hogi i de masavaa laa ga hagadegi de Maadua, aama de tala ange dagodo o Tamaa gauligi laa gi dangada alodahi e daalia de hagaola o Jerusalem.

De aahe gi Nazareth

39Gai ga lava huu i de hai mee alodahi gu sisi i de hainga a Tagi Maolunga, aagai gilaadeu gu aahe hogi gi delaadeu aduhale go Nazareth i Galilee.#Mat 2.23 40Gai tamaa gauligi laa ne somo age gu mmahi; gai e honu i de heiangi, gai de abodonu o de Maadua e dagodo i ono daha.

Iesu i de temple

41Ngadau hugadoo gai luu maadua o Iesu e hulo gi Taonga Hagasili i Jerusalem.#Exo 12.1-27; Deut 16.1-8 42Gai ga madaangahulu ma lua huu ngadau o Iesu, gai gilaadeu ga loage gi taonga, bei dagodo o delaadeu dahulinga i denga ngadau alodahi. 43Aagai ga lava huu Taonga, gai gilaadeu ga aahe e hulo gi delaadeu mommee, aagai Iesu ne noho i Jerusalem, gai luoono maadua tee iloo. 44Gai gilaau e maanadu bolo ia gu hano madali hanu dangada ange laa, gai gilaau ne seesee ga hulo i e dahi laangi, aagai gilaau ga daamada de ssala ia i magavaa olaau dangada, aama dangada alodahi alaau e iloo. 45Aagai gilaau tee gidee ia, gai gilaau ga aahe gi Jerusalem e ssala ai ia. 46Gai dua huu e dolu laangi, gai gilaau gu gidee ia i lo te buibui o de temple, ia e noho i daho de gau agoago o de hainga, ma e hagallongo ai alaadeu agoago, aama de ssili ange ana muna gi gilaadeu. 47Dangada alodahi ne langona ana muna gu llele mouli i dono iloo mee aama ana muna e basa ange ai gi gilaadeu. 48Aagai ga gidee huu e luoono maadua ia, gai gilaau gu llele mouli, gai dono dinana ga ssili ange gi de ia, “Dagu Dama, gu aha gu hai hegau mai ai naa goe bee naa gi gimaau? Gimaau ma doo damana ne ssala saele goe ma de manavasaa mmao.”

49Iesu ne hai ange gi gilaau, “Gu aha gu ssala ai gooluu au? Gooluu e dee iloo bolo e heohi donu dogu noho i de hale o dogu Damana?” 50Gai gilaau tee tonu ange gi ana muna ne tala ange laa gi gilaau.

51Gai Iesu ga hano madali gilaau gi Nazareth ga hagallongo ange gi gilaau. Aagai dono dinana ne daohi ma de hagasaele mee laa alodahi i ono lodo. 52Gai Iesu ne hagadagadaga age i de heiangi ma de somo dono angaanga, gai de Maadua aama dangada e malangilangi i de ia.#1 Sa 2.26; Pro 3.4

Currently Selected:

Luke 2: DBD

Highlight

Copy