Isaiah 2
2
De mounga o Tagi Maolunga
(Mic 4.1-3)
1Muna ne hagaago ange gi Isaiah tama daane a Amoz i dagodo o Judah ma Jerusalem.
2Denga laangi hagaodi naa huu
gai de mounga o de hale o Tagi Maolunga
e hai naa ga maolunga ange i denga mounga hugadoo,
ma de maolunga ange i denga duuduu.
Gai denga huaahenua alodahi e daga mai naa gi kilaa,
3gai dangada soa e loomai naa, ga hagataba:
“Loomai, gidaadeu ga loage gi de mounga o Tagi Maolunga
ma de hale o de Maadua o Jacob;
gai ia e agoago mai naa gidaadeu i ono haiava
gai gidaadeu ga seesee ai i ono haiava.”
Gai de hainga e gaamai naa i Zion,
gai muna a Tagi Maolunga e loomai naa i Jerusalem.
4Ia e hagamodu naa muna o denga huaahenua,
ma de hagaheloongoi magavaa o denga huaadangada soa.
Gilaadeu e dugidugi naa alaadeu gadilaasa ga hai gi ni mee hagabalabala,
gai e hai alaadeu dao gi ni naivi e velevele ai manu ssomo.
Gai denga huaahenua e dee aahe ange naa donu e hebagi
aabe e agoago ange gi de hebagi.#Joel 3.10
5Loomai, goodou dangada o Jacob,
gidaadeu ga seesee i de maalama o Tagi Maolunga!
De laangi o Tagi Maolunga
6Koe gu tili doo huaadangada,
go dangada o Jacob.
Go hiidinga gu soa dangada e daalaa mee e dee iloo mai i denga henua i dua;
gilaadeu e tala mee e dee iloo bei hegau a de gau Philistia,
ma de hagaheloongoi ange gi de gau henua gee.
7Delaadeu henua e honu i goolo ma selevaa,
gai gu lagolago olaadeu goloa hagamogomogo.
Honga delaadeu henua gu honu i denga hoosa,
gai gu lagolago hogi olaadeu hada hebagi.
8Delaadeu henua gu honu i denga diinonga;
gilaadeu e daumaha ange gi mee alaadeu e hagatuu,
ma mee ne hai i olaadeu lima donu.
9Deelaa ai, dangada e hai naa ga maolalo,
dangada alodahi e hagamaolalo ina naa —
koe gi dee degi ange gi gilaadeu!
10Goodou hulo ulu gi lodo hadu,
ma de mmuni i lo te gelegele,
i hiidinga doodou maatagu i Tagi Maolunga
ma de mahamaha o dono maolunga.#Rev 6.15; 2 Th 1.9
11Tangada lodo maolunga e hagamaolalo ina naa,
gai de gau hagamaolunga e hai naa ga maolalo,
gai go Tagi Maolunga donu huu e hagaamua i de laangi laa.
12 Tagi o denga hagabuulinga hebagi gu hagadabena dahi laangi ange
gi gilaadeu alodahi e llodo maolunga ma de hagamaolunga,
ma gilaadeu e hagaamua ina gilaadeu,
(gai gilaadeu alodahi e hai naa ga maolalo),
13gai ia e sele iho naa denga cedar o Lebanon lloa ma de maolunga,
aama denga oak alodahi o Bashan,
14ma mounga maolunga alodahi,
ma denga duuduu maolunga alodahi;
15ma denga hale dagitilo maolunga alodahi,
ma denga buibui alodahi;
16ma denga vaga alodahi o Tarshish,
ma denga vaga mahamaha alodahi.
17Gai tangada hagamaolunga e hai naa ga maolalo,
de gau lodo maolunga e hai naa ga ni dangada maolalo;
gai go Tagi Maolunga donu huu e maolunga i de laangi laa,
18denga diinonga e llilo naa donu.
19Dangada e saavini naa ga mmuni i lodo haonga i magavaa hadu
ma haonga i lo te gelegele,
i hiidinga delaadeu maatagu i Tagi Maolunga,
ma de mahamaha o dono maolunga,
i de masavaa oona e hidi age ai ga luuluu henua i lalo.
20De laangi laa gai dangada e tili ange naa
olaadeu diinonga selevaa ma diinonga goolo,
e daumaha ange laa aagena,
gi denga mole ma gimoo llele.
21Gai gilaadeu ga saavini e mmuni i lodo haonga i magavaa hadu
ma lo te baba i gaogao denga mounga,
i hiidinga delaadeu maatagu i Tagi Maolunga,
ma de mahamaha o dono maolunga,
i de masavaa oona e hidi age ai e hagamaatagu henua i lalo.
22Aude tali hagalodolodo ange gi dangada,
e manavanava laa i luoono bongaa usu.
Gai ni aha naa donu aau e mau ai?
Currently Selected:
Isaiah 2: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.