2 Thessalonians 3
3
Dalodalo i gimaadeu
1Denga daina, aanei agu muna hagaodi: goodou dalodalo gi moolau de hagadele muna a Tagi Maolunga ma de hagadubu i daho dangada, bei doodou hai ne hagadubu ai naa hogi. 2Gai goodou dalodalo gi ola mai gimaadeu i dangada e haia de baubau ma de gau baubau, i hiidinga e dee go dangada alodahi e kai. 3Aagai Tagi Maolunga e hai hegau i de mee abodonu, gai ia ga hagammahi adu ai goodou ma de buibui goodou i de ia baubau laa. 4Gai e dahi donu amaadeu tali hagalodolodo i daho taadeu Dagi Maolunga adu gi goodou, bolo goodou e daudali donu ma de duudagi de hai mee amaadeu gu tala adu gi goodou. 5Gai Tagi Maolunga gi dagina oodou lodo i de aloha o de Maadua aama de golomagi lodo o Klisdo.
De hagakana ange gi dee vaiduu
6Denga daina, gimaadeu e hai adu i de ingoo o taadeu Dagi Maolunga go Iesu Klisdo, goodou gi dee hagabuni ange gi denga daina alodahi e ngadi nnoho laa donu huu, gai e dee daudali i dahulinga oodou gu kave mai i omaadeu daha. 7Goodou gu iloo donu be dee hee doodou hai e ago mai ai i omaadeu mouli. Gimaadeu tee ngadi nnoho i de masavaa omaadeu ne nnoho ai i oodou daha, 8aabe ne gaimee i daho dahi gai tee hagao. Gai gimaadeu ne hagaduu ngae ga hai hegau i de boo ma de laangi, gi dee hagahai ngadaa ina ai e gimaadeu goodou, 9e dee go hiidinga gimaadeu e dee maua i de kave de bale mai i oodou daha, aagai gimaadeu ne llodo e hai dahi hagaago danuaa gai goodou ga ago mai ai i omaadeu mouli. 10De masavaa omaadeu e nnoho ai i oodou daha, gai gimaadeu ne tala adu ga hai adu, “Tangada vaiduu e dee heohi donu dono gaimee.”
11Gai gimaadeu gu langona bolo hanu goodou e vaiduu ma tee llodo e hai hegau, gai e hulo ma e baatai ange gi mee e deai alaadeu hegau e hai ai. 12Gimaadeu e hai ange gi dangada e haia mee nei, ma de dangidangi ange gi gilaadeu i de ingoo o Tagi Maolunga go Iesu Klisdo, gilaadeu gi hai hegau e hagadanuaa ai donu gilaadeu. 13Denga daina, goodou gi dee llodo baageaa i de hai tanuaa.
14Gai noo dahi dangada e dee lodo e daudali i muna i lo te leda nei, gai goodou gi iloo ono dagodo, gai goodou gi dee hagabuni ange gi de ia, gi dogaa ai ia. 15Aagai goodou gi dee haia ia gi se hagadaumee niiodou, aagai goodou hagakana ange ina ia bei dagodo o dahi daina.
Muna hagaodi
16Gai Tagi Maolunga o de baba gi gaavadu gi goodou de baba i masavaa alodahi ma mee alodahi. Tagi Maolunga gi noho i oodou daha alodahi.
17Go au donu go Paul ne siia de hagaboo nei i dogu lima donu. Deenei de hagailonga oodou e iloo ai agu leda alodahi; deenei donu dagu hai e sisi ai.
18De abodonu o taadeu Dagi Maolunga go Iesu Klisdo gi dagodo i oodou daha alodahi.
Currently Selected:
2 Thessalonians 3: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.