Thãgbaa Thɔ̃thɔnaa Thɔ̃ 18
18
Pol Korɛ̃tɩ dɩɩra
1A gele pɩ, Pol ther Atɛn a jal Korɛ̃tɩ. 2Dɩ le a caana Juifi kũu bɩɛlɩkɛ wɩ‐n wenɩ Akɩlasɩ; Pɔ̃ dɩɩra wɩ kʋ̃ɔ. Ga maan a kɔɔ thenɩ Ɩtalɩ na ɔɔ khɛr Pirisil a pɔaˈ, gɩdonɩ Kʋloodɩ fãgadaar kɔ̃tɩ̃ɩ kɔɔ sor Juifisɔra fɛʋ wɩ thɛ Rɔm. Dɩ wɛr Pol n kɔɔ toona. 3Dɩ gɩdonɩ wa kẽkẽ thɔma wɩ‐n do, wɩ gbɛbɩrɛ too dɩ wa‐n do kha thɔma.
4Hɩɩr wire fɛʋ Pol n gba Thãgbaa thɩmɩɩ Juifisɔɔ Thãgba fʋɔr cɔra da‐n yɩrna Gɩrɛkɩsɔ na Juifisɔ wɩ pɩɛr haar. 5Dɩ ɔbɔɔkɛ Sɩlasɩ na Timothe kɔɔ thenɩ Masedʋan a pɔ, gɛr Pol jɩɩ tooro Thãgbaa thɩmɩɩ togʋʋ waa vʋ̃ʋ, da‐n jɩɩ nɩna Juifisɔ dɩ Jeju dʋɔn Kirisiti. 6Sɩ mɔ̃kɛ Juifisɔ gbɔnaanɩ dɩ wa‐n nɩɩrnaa, Pol kpɛɛrɛ thɩlãkobe ɔɔ kẽkena sa so war: A nɩ buur, anɩ so na heen maˈ, ga ˈlɛ maˈ. Nɛnɛ̃ dɩphã thɩldarara ma‐n jal. 7Dɩ ɔbɔɔkɛ a thenɩ le a jaal kũu bɩɛlɩkɛ wɩ‐n wenɩ Tɩtusi Jusitusii pa, kɛ n cʋɔnnɩ Thãgba. Ɔɔ cɔ, cɔ ɓãa gɩ na Juifisɔɔ Thãgba fʋɔr cɔ. 8Sɩ Kirisipusiikɛ dɔnɩ kɔ̃tɩn Juifisɔɔ Thãgba fʋɔr cɔra kɔɔ pɛr Kɔ̃tɩn haar na ɔɔ cɔdara fɛʋ. Dɩ Korɛ̃tɩda jɔjʋɔɔkɛ kɔɔ pɛnɩ Polɩ thɩmɩɩ nũu kɔɔ pɛrɛ haar dakha dɩ wɩ kpɛɛ wɩ nyʋɔnɔ.
9Sɩ dɩtɩnɔ, Kɔ̃tɩn cʋʋrɛ Pol dɩ yɩ thɩ̃ɛ sɩ dɩ sʋʋraa ayɩ: Fa‐n do maar n fʋ faˈ. Na mɩa ɩ̃ thɩmɩɩ, fa‐n pɩr pɔbaˈ, 10gɩdonɩ mɩ ha kha na fɛrɛ, dɩ tibil na tha far nyɔ̃ɔ a na cʋʋ fɩ puurəˈ; na mɩa gɩdonɩ tɩbɩla jɔɔ har dɩɩraakɛ, kɛ dɔnɩ ɩ̃ too. 11Dɩ a toore le yɛ bɩɛl na pora maadõ, da‐n dɩɩr Korɛ̃tɩdara Thãgbaa thɩmɩɩ.
Mɔ̃ Galɩyɔ̃ bonɩ sorɩkɛ wɩ heennɩ Pol
12Ɔbɔɔkɛ Galɩyɔ̃ kɔɔ donɩ gobanɛr Akaɩ dɩɩra, Juifisɔ kɔɔ dor nɔ bɩɛl sa ɩɩrna thɩmɩɩr Polla, a kpaa a jalna kɩɩl paar a so ayɩ: 13Tibilikɛ n tɔr tɩbɩla dɩ pɛr wa‐n fʋɔrɛ Thãgba, dɩ ga‐n ˈli kha kpɩɩ na gɩrɛ jɔfʋ n sonaˈ. 14Dɩ Pol harra nʋɔ a mɩɩ dɩɩ do Galɩyɔ̃ sor Juifisɔra: Adora gɩ hanɩ gɩrɛ thɩ̃ɛɛkɛ na saranaˈ a cʋʋ, agɩbo dɩkhaa thɩ̃ puu gɩ ga dor, ma pɛ nɛr nũu ka nɛr Juifisɔ; 15sɩ ado thɩ̃ banaa gɩ thɩmɩɩrra, na ierasɔ, na anɩ jɔfʋra, nɛr gele ba dɛ; ma ƴaal ɩ̃ do so kɩɩldaar ga thɩnaalaˈ; 16sa weele wɩ le kɩɩl paar a faa. 17Dɩ tɩbɩla fɛʋ fʋ Sɔsɩtɛnɩkɛ dɔnɩ kɔ̃tɩn Juifisɔɔ Thãgba fʋɔr cɔra a bɩɩr le kɩɩl paar, sɩ Galɩyɔ̃ na therna gɩrakaˈ.
Pol kɛrrɛ bir Ãtɩyɔsɩ dɩɩra
18Dɩ Pol toore Korɛ̃tɩ a pʋɔr; agɩpɩ dɩ fʋɔr omɩna sa gba bato a jal Siri dɩɩra nakha Pirisil na Akɩlasɩ. Sɩ Sãkɩrɛ a kɔɔ bel yʋʋ gɩdonɩ nʋɔ a kɔɔ so.#Ther 6:18 19Dɩ wɩ kɔɔ daan Efɛjɩ; le Pol faa ɔɔ kpãkpãadara sa lõ Juifisɔɔ Thãgba fʋɔr cɔra da‐n yɩrna Juifisɔ wɩ yɛ kɩrʋ; 20dɩ wɩ kɔɔ bɩɛlʋʋlɛ a tɔɔ a pʋɔrɛ gbe sɩ aa kɔɔ tuəˈ, 21a fʋɔr wɛr sa so ayɩ, gɩ teenanɛ ɩnɩ‐n jala fɛtɩraakɛ na hanɩ Jerujalɛm sɩ a Thãgba tu ɩna bire na pɔ; sa gba bato Efɛjɩ a jal.
22Ɔbɔɔkɛ a danɩ Sejare, a gbaar jal Jerujalɛm. Dɩ ɔbɔɔkɛ a fʋɔrnɩ we gbɛbɩdara pɩ, a gbaar jal Ãtɩyɔsɩ. 23Ɔbɔɔkɛ a toonɩ Ãtɩyɔsɩ a pʋɔr gbe, a gbaar hʋɛ a jal da‐n kpaar Galasɩ a kpaan Firiji a cʋʋ kpãkpãadara fɛʋ dɩ wɩ tɩ.
Apolɔsɩ Efɛjɩ dɩɩra na Korɛ̃tɩ dɩɩra
24Sɩ Juifi bɩɛl gɩ dɩ wa‐n wɩɩ Apolɔsɩ, Alesãdɩɩr dɩɩra wɩ kʋ̃ɔ; a dor tɩɩ kpɛsɛɛ a dona Thãgbaa sɛbɛ jɩ kɔ̃tɩn, a pɔ Efɛjɩ. 25Wɩ kɔɔ dɩɩrʋʋrɛ mɔ̃ Kɔ̃tɩnɩ hʋ hanɩ, dɩ mɔ̃ a donɩ tibilikɛ hanɩ phãphãphã, a‐n mɩɩrɛ da‐n dɩɩrna gɩrɛ dɔnɩ Jejuuda bɔɔbɔɔ; sɩrakɛ Jãa yɔ kpɛɛ a kɔɔ jɩ dɩbara. 26Dɩ a mar da‐n mɩɩ na ˈlar Juifisɔɔ Thãgba fʋɔr cɔra. Dɩ ɔbɔɔkɛ Pirisil na Akɩlasɩ kɔɔ nɩɛnɩ gɩrɛ a‐n mɩɩnɩ, wɩ kpaarɛ dɩ wɩ ha kha, dɩ wɩ jɩɩ nɩnaa kɩrʋ mɔ̃ Thãgbaa hʋ hanɩ bɔɔbɔɔ. 27Mɔ̃kɛ a ƴaalnɩ a kpãasɛ a jal Akaɩ, omɩna kɔɔ pɩɛraarɛ ˈlar. Dɩ wɩ kherere sɛbɛ a ha kpãkpãadara wɩ teaa. Dɩ ɔbɔɔkɛ a kɔɔ danɩ le, a bulle wɩrɛ Thãgbaa bɔ jɩ donɩ nɔɔ dɩ wɩ pɛr haar; 28gɩdonɩ a‐n punone Juifisɔ thɩ̃ banaana ka tɩbɩlaa ƴɛra, dɩ gba Thãgbaa sɛbɛ da‐n nɩna wɩ dɩ Jeju dʋɔn Kirisiti.
Currently Selected:
Thãgbaa Thɔ̃thɔnaa Thɔ̃ 18: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
