Mi Nɔnɔle 5
5
Munu lé wo ’ka tegele lo
(Lév 13:45, 46; 15)
1Gakelebale we fe Moizi lɛ yé é léé: 2Bé fe Izraɛlnu lɛ léé, ’wo pantɛngyɛzannu faa bin sɔkɔn dɔna, wo koo, munu lé frɔlɔgyɛ vɔ wo ma koo, munu lé wo mane migale ma, ’té wo ’ka tegele lo koo, woo lé. 3Dé é a gɔné nyaoo, dé é a le nyaoo, ’ka wo bin; ’ka wo bin sɔkɔn dɔna, sɔkɔn dɔna lé anzé nyanana ke a méléna ’ko, té a sɔnné sɛrɛ lo we gi. 4Izraɛlnu a kɛlɛ a zo, yé wo wo bin sɔkɔn dɔna, Gakelebale a fe Moizi lɛ fɛan zo, Izraɛlnu a kɛlɛ a zo.
Wenyané kɛlɛle ma ban
(Lév 5:20–26; Lk 19:8)
5Gakelebale we fe Moizi lɛ yé é léé: 6Bé fe Izraɛlnu lɛ léé: Dé mian wenyané kɛlɛ é bɔluzan ma, dé é a gɔné nyaoo, dé é a le nyaoo, yé é yuɛi blan Gakelebale lé we kɛlɛle ma, yé ’bɛ nya lé ébo gyɛ we nya, 7é a lé é ’élé wenyané fe, yé fɛan é a ye kyeen nya, é a lé é a nɔ, té a do boen é vo a lee lo, yé ’é a soruzan pa a ma. É a lé é a nɔ mi lé ’bɛlé we a gyɛ bɛ, a lɛ. 8Fɛ lé wa si kyeen nya, mian énɔ a nɔ a lɛ, dé ’bɛzan ’ka ana lo, é a lé wo da fɛ ’ko nya Gakelebale lɛ, yé ’é kɛlɛ Balebanzan zé nya. Naa, wenyané ’yibo ’blagɔné a é yɛrama; ’bɛ ’é kɛlɛ wegyɛzan lé wenyané ’yibofɛ nya. 9Blɛfɛnu faa lé Izraɛlnu wo pa é yɛrama, é a lé wo kɛlɛ Balebanzan lé wa nɔ a lɛ bɛ, azé nya. 10Fɛnu lé wo wo pa é yɛrama, azé lé ma; fɛan wa bɛ pa a lee, é a azé nya.
Maawole
(2 BDWS 32:16)
11Gakelebale we fe Moizi lɛ yé é léé: 12Bé fe Izraɛlnu lɛ léma: Dé le do si é zana va, yé é wenyané kɛlɛ a ma, 13dé gɔné bɛ wenyané kɛlɛ a va, yé we ’ko vo é yɔɔle a zana ma, dé ébo sɛrɛ kyeen gi, dé we ’ko nayezan ’ka lo, yé dé mi do ’ka bɔ lɛ a ma a kɛlɛna lo, 14dé maawobli nwa a zana gi, yé gibɔrɔle naané dɔ a gi é na vazia, té a na ébo sɛrɛ weboen nya, ’bɛ a do; dé ’bɛ kaan lo, dé maawobli nwa a zana gi, yé gibɔrɔle dɔ a gi é na vazia, ’té a na ’ka ébo sɛrɛ lɛ lo, 15é a lé gɔnézan ’ko ’é go é na nya Balebanzan va, yé é a lé ’é sɔnmlén pun suoné nya do si yé é goan lezan lé Bale ’nyɔɔnfɛ nya. Té é nyɔnɔ zén a va lo; té é lasikɔrɔpo vɔ a va lo. Naa, maawo mafɛ lé; weseledɔmigifɛ lé, éé weple sele dɔa mi gi.
16Balebanzan ’é lezan bié ma, yé ’é a dɔ loru Gakelebale ’lɛ ma. 17Balebanzan ’é bale’lɛ’yi si tɛrɛbɔ gi ma, yé ’é Bale lé sɔkɔn gi vuun koli yé ’é a zén ’yi va ma. 18Balebanzan ’é lezan dɔ loru Gakelebale ’lɛ ma; ’é fɛ si a ’wuo ma, yé ’é weseledɔmigifɛ pa a lee; maawo mafɛ lé; ’té ’yi nyanale lé woo bale paan mi ma a nya, ’té é a Balebanzan lee.
19Balebanzan é dan a fe lɛ lezan lɛ léé: ’I bale ’nyɔɔn. Yé é a lé é a fe a lɛ léé: Dé gɔné do ’ka yia lɛ i va lo, dé bii é ke i zana wuo é plale, dé i ’ka si lɛ a va ibo sɛrɛle we gi lo, ’yi nyanale ’ko lé woo bale paan mi ma a nya, é ’ka dan i kun lɛ lo. 20Naa, biian i ke é plale i zana wuo, dé i si a va yé ibo sɛrɛ, yé gɔné bɛ lé ’bɛ ’ka i zana nya lo, dé é yia i va, é dan i kun lɛ. 21Yé Balebanzan ’é a fe lezan lɛ léé: Gakelebale a é pale i ma ma, yé i kɛlɛ serelebomazan nya ilé munu méléna ma. I boro ’é ga ma, yé i bɔn ’é zii ma, 22yé ’yi ’ko lé woo bale paan mi ma a nya, ’é wɔra i bun‐annu gi, yé ’é kɛlɛ i bɔn ziifɛ nya, é valé i boro ga i ma fɛ nya ma. Yé é a lé lezan a fe léé: Amɛɛn, amɛɛn.
23É a lé Balebanzan é balepadére ’konu gyɛ sɛbɛ ta, ’bɛ zuo é a lé é a fwi ’yi nyanale nya. 24Yé ’yi nyanale lé woo bale paan mi ma a nya, é a lé é a nɔ lezan lɛ, léé, ’é a mini, yé balepamima’yi é dan wɔra lɛ lezan bɔn gi yé é dan kɛlɛ lɛ a gi é naané. 25Yé maawomafɛ lé é ke lezan lee, Balebanzan ’é a si a lee ma. ’É blɛfɛ dia é bɛ fié la Gakelebale ’lɛ ma, yé ’é a zén balebanna ta. 26É a lé Balebanzan ’é fɛ ’ko koli bɛ nya do, weseledɔmigifɛ nya, yé ’é a kyɛ ble balebanna ta. ’Bɛ zuo é a lé é ’yi nɔ lezan lɛ, léé, ’é a mini. 27Dé é nyaa ’yi ’ko minile nya, dé é kɛlɛ léé, we lezan gyɛ, ’yi lé woo bale paan mi ma a nya, é dan wɔra lɛ lezan bɔn gi, yé é a kun; a bɔn é dan zii lɛ, a boro é dan ga lɛ a ma, yé lezan ’ko é dan kɛlɛ lɛ balepamazan nya élé munu méléna. 28Naa, dé lezan ’ka sɛrɛ lɛ lo, yé lezan a tegele, wo dan a ye lɛ léé, we ’ka a nwiin lo, yé é dan né yaa lɛ.
29Maawomima we ’wuoplana lé ke bɛ; dé é kɛlɛ léé, lezan do lé é ke é plale é zana wuo, dé é si é zana va yé ébo sɛrɛ, laa, 30taa, dé é kɛlɛ léé, maawobli nwa a zana gi, yé gibɔrɔle naané dɔ a gi é na vazia, Balebanzan é dan lezan dɔ lɛ loru Gakelebale ’lɛ, yé we faa lé wa gyɛ we ’ko mawe nya, é dan a faa kɛlɛ lɛ a lɛ. 31Wo ’ka dan lezan zana ye lɛ wenyanékɛlɛzan nya lo, naa, lezan é dan nyané ble lɛ élé weple ma.
Currently Selected:
Mi Nɔnɔle 5: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
