Mi Nɔnɔle 3
3
Lévinu nɔnɔle
(1 MNzfs 24)
1Bléyian va lé Gakelebale we fe Moizi lɛ Sinai gɔ nwiin, ’té Arɔn valé Moizi kulunu a ’ko zo:
2Arɔn benu lé ke ’ko: Nadab lé é ke alé né vininzan nya koo, Abiu koo, Éléazaa valé Itamaa koo, woo lé. 3Arɔn benu tɔnu lé ke bɛ. Wo nyɔnɔ zén wo ta wo dɔle Balebanzannu nya we gi, yé wo wo bɛ pa Bale banle ta. 4Nadab valé Abiu go kyɛ bɛ nya bléyian va Gakelebale ’lɛ Sinai bwi la, ’bɛ bléyi va lé wo ga Gakelebale ’lɛ. Wolé négɔné ’ka lo. Éléazaa valé Itamaa wo balebannyanama pa ’wo ti Arɔn yuɛ va.
5Gakelebale we fe Moizi lɛ yé é léé: 6’I Lévinu bié, yé ’i go wo nya Balebanzan Arɔn va, wolé alé nyanama pale we ma. 7We faa lé Bale a bɛ pa Arɔn valé zén‐ékevamunu faa lee, é a lé wa tawe kɛlɛ zén‐ékevasɔkɔn ’léé. ’Wo sɔkɔn lé nyanama pa ma. 8Zén‐ékevasɔkɔn gi nyanama pafɛnu faa koo, fɛnu faa lé wa bɛ pa Izraɛlnu lee koo, ’wo yuɛ pa wo va; ’wo Bale lé kɔn gi nyanama pa ma. 9’I Lévinu nɔ Arɔn valé é benu lɛ; Izraɛlnu, ’wo Lévinu nɔ wo lɛ boenwo tata ma. 10’I Arɔn valé é benu dɔ wolé balebannyanama pale we ma. Yé bɛn lé é bié wo ma, ’wo ’bɛ gyɛ yé ’é ga ma.
11Gakelebale we fe Moizi lɛ yé é léé: 12An Lévinu si Izraɛlnu méléna, Izraɛlnu lé né vininzannu faa lɛgi nya; yé Lévinu kɛlɛ anzé nya. 13Naa, né vininzannu faa a anzé nya. Yian nya lé maa Éjipiti tɛrɛla né vininzannu faa gyɛ, ’bɛ yi nya maa Izraɛlnu lé né vininzannu faa pa é yɛrama anzé nya; munu koo, winu koo, woo lé; wo ɛ kɛlɛ anzé nya ma. Maa a Gakelebale nya.
14Gakelebale we fe Moizi lɛ Sinai bwi la, yé é léé: 15’I Lévinu nɔnɔ wo tranu gɔnɔ ma gɔnɔ ma, wo gɔnɔla gɔnɔla ma; ’i gɔnénu faa nɔnɔ, ’bé péli sia gɔnénu lé wo moné kɛlɛ do, wo ta. 16Moizi wo nɔnɔ Gakelebale dére ta, we lé é a fe a lɛ, é a kɛlɛ ’bɛ yɛrama.
17Lévi benu lé ke ’ko: wo tɔnu a ’ko zo: Gɛɛsɔn koo, Kéat koo, Mérari koo, woo lé. 18Gɛɛsɔn benu valé wo gɔnɔla munu tɔ lé ke ’ko: Libini valé Siméi. 19Kéat benu valé wo gɔnɔla munu tɔ lé ke ’ko: Amaram koo, Jiséaa koo, Ébrɔn koo, Uziɛl koo, woo lé. 20Mérari benu valé wo gɔnɔla munu tɔ lé ke ’ko: Makli valé Musi. Lévi kulunu lé ke bɛ, wo tranu dɔgɔnɔ yɛrama.
21Gɛɛsɔn kulunu lé ke Libini valé élé nénu koo, Siméi valé élé nénu koo, wo nya. Wo ɛ ke Gɛɛsɔn kulunu nya. 22Gɔnénu lé wo wo nɔnɔ, ’té wa péli sia gɔnénu lé wo moné kɛlɛ do, wo ta bɛ, wa mi baa yaa wuru sɔrafié yɔ soru. 23Gɛɛsɔn kulunu lé sɔkɔnnu a é dɔle yirivɔnazia Bale lé sɔkɔn zuo. 24Gɛɛsɔn gɔnɔlamunu nwiinzan lé ke Laɛl be Éliazaf nya. 25Dé é a zén‐ékevasɔkɔn zé nya, Bale lé sɔkɔn koo, sɔkɔn koo, sɔkɔn tasɔ koo, zén‐ékevasɔkɔn lé lɛtansɔ koo, 26gɔrɔ lé ke é dirile Bale lé sɔkɔn valé balebanna zi, a bosɔ koo, a lɛtansɔ koo, bawɔrɔnu faa lé ke Bale lé sɔkɔn lé nyanamapafɛnu nya koo, wo wo bɛ pa Gɛɛsɔn kulunu lee.
27Kéat kulunu lé ke ’ko: Amaram valé élé nénu koo, Jiséaa valé élé nénu koo, Ébrɔn valé élé nénu koo, Uziɛl valé élé nénu koo, wo ɛ ke Kéat kulunu nya. 28Gɔnénu lé wo wo nɔnɔ, wa péli sia moné do négɔnénu ta, wo faa ’léé a baa ziɛn wuru yaa. Wo fɛna sauun lé nyanama bɛ pa wo lee. 29Kéat benu valé wolé nénu, wo ’wolé sɔkɔnnu dɔ Bale lé sɔkɔn bɛ do la yirinwana bɛyilazia. 30Kéat gɔnɔlamunu nwiinzan lé ke Uziɛl be Élisafan nya. 31Fɛnu lé wo wo bɛ pa wo lee, yee lé ke ’ko: gipawe pagikɛsu koo, tablé koo, fintran koo, balebantafɛnu koo, fɛna sauun lé nyanamapafɛnu koo, sɔ valé é dunmafɛnu koo, woo lé. 32Lévinu lé wo ke minwiinzannu nya, wo faa ’lɛzan lé ke Balebanzan Arɔn be Éléazaa nya; munu lé wo fɛna sauun lé nyanama pale bɛ pa wo lee, é a wo tabinzan nya.
33Mérari kulunu lé ke Makli valé élé nénu koo, Musi valé élé nénu koo, wo nya. Wo ɛ ke Mérari kulunu nya. 34Gɔnénu lé wo wo nɔnɔ, ’té wa péli sia négɔnénu lé wo moné kɛlɛ do, wo ta, wo ’léé a mi baa yaa wuru do. 35Mérari gɔnɔlamunu nwiinzan lé ke Abiail be Suriɛl nya. Wo ’wolé sɔkɔnnu dɔ yirinwana bɛbolazia Bale lé sɔkɔn bɛ do la. 36Bale lé sɔkɔn dɔ yilifeenu koo, kɛsu siyilinu koo, kɔnwɛyili valé wo suruégifɛnu koo, wo ma nyanamapafɛnu faa valé wo mawe kɛlɛfɛnu faa koo, 37gɔrɔ yilinu koo, gɔrɔkunfɛnu valé a bawɔrɔnu koo, wo wo faa bɛ pa Mérari kulunu lee, léé, ’wo yuɛ pa wo va.
38Moizi koo, Arɔn valé é benu koo, wo ’wozé sɔkɔnnu dɔ zén‐ékevasɔkɔn ’léé, yirinwanazia; fɛna sauun tabinle lé wa bɛ pa Izraɛlnu lee, wa bɛ pa wo ɛ lee, léé, ’wo yuɛ pa a va. Yé bɛn lé é bié wo ma, ’wa gyɛ yé ’é ga.
39Lévinu faa lé Moizi valé Arɔn wo nɔnɔ Gakelebale dére yɛrama, wo gɔnɔla gɔnɔla ma, a péli sia moné do négɔnénu ta, wo ’léé a mi baa vu ta do.
Né vininzannu tabole
(Fw 13:11–16; Mi N 8:16–18)
40Gakelebale lé Moizi lɛ léé: ’I Izraɛlnu lé négɔné vininzannu faa nɔnɔ, ’bé péli sia négɔnénu lé wo moné kɛlɛ do, wo ta. ’I wo nɔnɔ yé ’i wo tɔ gyɛ. 41’I Lévinu si, maa, Gakelebale zé nya, Izraɛl lé né vininzannu faa lɛ gi. ’I Lévinu lé winu si Izraɛlnu lé winu lé né vininzannu lɛ gi. 42Moizi Izraɛlnu lé né vininzannu faa nɔnɔ, Gakelebale a fe fɛan zo, a zo. 43Négɔné vininzannu faa lé wo wo nɔnɔ yé wo wo tɔ gyɛ, ’té wa péli sia négɔnénu lé wo moné kɛlɛ do, wo ta, wo ’léé a baa vu ta do wuru do yɔ yaa wɔlɛ vu ta yaa.
44Gakelebale we fe Moizi lɛ yé é léé: 45’I Lévinu si Izraɛlnu lé né vininzannu faa lɛ gi, yé ’i Lévinu lé winu si Izraɛlnu lé winu lɛ gi. Lévinu ’é kɛlɛ anzé nya ma. Maa ɛ ke Gakelebale nya. 46Mi wuru do yɔ yaa wɔlɛ vu ta yaa lé wo ’léé gié Lévinu zé ta, Izraɛlnu lé né vininzannu va, ’i wo tabo é ziin, 47mi do sikla soru. É a lé sikla ’konu é kɛlɛ fɛna sauun lé sikla yɛrama, yee lé ke géragɔɔli yɔ do nya. 48Munu lé wo ’léé gié Lévinu nɔnɔ ’léé ta, ’i gɔɔli nɔ Arɔn valé é benu lɛ wo tabole we ma. 49Munu lé wo ’léé gié Lévinu nɔnɔ ’léé ta, Moizi yee gɔɔli sile nyaa wo tabole we ma. 50É Izraɛlnu lé né vininzannu tabogɔɔli si; é a sikla wuru suiɛdo yɔ sɔraa wɔlɛ soru, fɛna sauun lé sikla yɛrama. 51Moizi wo tabogɔɔli nɔ Arɔn valé é benu lɛ, Gakelebale dére yɛrama, Gakelebale a fe Moizi lɛ fɛan zo, a zo.
Currently Selected:
Mi Nɔnɔle 3: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
