Mi Nɔnɔle 18
18
Balebanzannu valé Lévinu pa nyanama
(Mi N 4:1; 1 MNzfs 23:13, 24–32)
1Gakelebale lé Arɔn lɛ léé: Bii valé i benu, ’é valé i tra lé kɔngimunu, weplenu lé wa kɛlɛ fɛna sauun na, wo dan wo we dɔ lɛ ka nwiin; bii valé i benu lé é ke i va, weplenu lé wa kɛla balebannyanama pana, wo dan wo we dɔ lɛ ka nwiin. 2I bwenu lé wo ke Lévi bɛnnu nya, i ti bɛnnu nya, ’i wo bié i va, léé, wo pa i va yé wo ilé nyanama pa, bléyian va lé bii valé i benu ke wenayefɛ pagi sɔkɔn ’lɛ. 3’Wo i déretawenu kɛlɛ ma, é valé sɔkɔn gi nyanama faa lé, naa, té ’wo bié fɛna sauun lé nyanamapafɛnu valé balebanna ma lo, dé ka valé wonu é da ga. 4’Wo vo é pale i va ma, yé nyanama faa lé é a lé wa pa zén‐ékevasɔkɔn zé nya bɛ, ’wo a tawe kɛlɛ. Té bɛn do kpen é bié ka va lo. 5We lé é ke fɛna sauun valé balebanna zé nya, ’ka wo tawe kɛlɛ, léé, té Bale bli é fli é dɛrɛ Izraɛlnu ma lo. 6Bé ye, maa i bwe Lévinu si Izraɛlnu va. Wa maa, Gakelebale zé nya, yé maa wo nɔ ka lɛ blɛ nya, léé, ’wo zén‐ékevasɔkɔn gi nyanama pa. 7Bii valé i benu lé wo ke i va, ’ka kalé Bale gi nyanama pa, dé é a balebanna lé nyanama faa nyaoo, dé é a sɔkɔnmi zi lé nyanama nyaoo, ’ka a pa. Nyanama lé é a lé ka a pa, yee lé ke bɛ. Maa balebannyanama nɔ ka lɛ blɛ zin nya. Dé bɛn bié a ma, wo dan a gyɛ lɛ.
8Gakelebale lé Arɔn lɛ léé: Bé ye, fɛnu faa lé Izraɛlnu wo pa é yɛrama anzé nya, maa wo va fɛ kenu nɔ i lɛ, yee lé ke fɛnu lé wa nɔ an lɛ a nwale valé a tuale nya, wo nya. Maa wo nɔ bii valé i benu zé dɔna nya, nyɔnɔ zénle ka ta we ma. É a ka dɔna nya lɛɛfaama. 9Bale ’lɛfɛnu lé wo ’ka wo kyɛ blé lo, wo va fɛnu lé wo dan kɛlɛ lɛ izé nya, yee lé ke ’ko: wolé balebanfɛnu faa koo, wolé blɛfɛnu faa koo, wolé wenyané ’yibo saraka faa koo, wenyaa saraka faa lé wa bo an lɛ koo, woo lé; Bale ’lɛfɛnu ’ko, wo dan kɛlɛ lɛ bii valé i benu zé nya. 10’Ka wo ble fɛna tinle do na; ka gɔnénu faa a ble. ’Ka wo ye Bale ’lɛfɛnu nya ma. 11Fɛnu lé wo dan kɛlɛ lɛ kazé nya é ziin, woo lé ke ’ko: blɛfɛnu faa lé Izraɛlnu é dan da lɛ wo nya yé wo wo nɔ an lɛ wo nwale valé wo tuale nya, ’bɛ valé yee lé i wo dia é bɛ fié la, maa wo nɔ bii koo, i benu valé i lunu koo, ka lɛ; é a kazé dɔna nya lɛɛfaama. Dé é a ilé kɔn gi miomian nya, dé azan a tegele, ’bɛzan a ble ma. 12Féifɛ vininzannu lé woo maa, Gakelebale baan wo nya, maa wo nɔ i lɛ, woo valé nyɔnɔ zin baba faa koo, dɔrɔ dɛrɛ zin baba faa koo, buruwɔlɛ zin baba faa koo, woo lé. 13Wolé féifɛ vininzannu lé wo da wo nya maa, Gakelebale lɛ, wo dan kɛlɛ lɛ izé nya. Dé é a ilé kɔn gi miomian nya, dé azan a tegele, ’bɛzan a ble ma. 14Fɛ faa lé Izraɛlnu a nɔ bale pale a ma nya, wo dan kɛlɛ lɛ izé nya. 15Naa, we do ana, é a lé wo blami lé né vininzannu tabo, yé wi lé wo ’ka a blé lo, ’wo wolé né vininzannu tabo. 16Dé yee lé ’bɛ moné do bɔ, é a lé wo wo tabo gɔɔlifu sikla soru nya, fɛna sauun lé sikla yɛrama, yee lé é ke géra gɔɔli yɔ do nya. 17Naa, dé é a diriné vininzan nyaoo, dé é a ’blané vininzan nyaoo, dé é a boliné vininzan nyaoo, té ’wo wo tabo lo. ’I wo nyɛ zana balebanna ta, yé ’i wo nyɔnɔ kyɛ ble; é a saraka lé wa kyɛ blé, ’té Gakelebale a gin sié néné, a nya. 18Wo wi é dan kɛlɛ lɛ izé nya, ’bɛ gi léé, a tɔn lé wa diaan é bɛ fié la, yee valé a bɛyi bɛapaboro nya. 19Balebanfɛnu faa lé Izraɛlnu é dan Gakelebale ban lɛ wo nya wo nwale valé wo tuale nya, maa a nɔ i lɛ, bii koo, i benu valé i lunu koo, ka lɛ. É a kazé dɔna nya lɛɛfaama. É a gipawe lé é ’ka sɛra lo, ’té a glɛ ’ka lo, a nya, Gakelebale ’lɛ, bii valé i kulunu zé nya.
20Gakelebale lé Arɔn lɛ léé: Té wolé tɛrɛlafɛ do kpen é kɛlɛ izé nya lo; ilé zarafɛ ’ka dan kɛlɛ lɛ wo va lo. Maa ɛ ke izé nya, ilé tɔnɔ nya Izraɛlnu va. 21Maa Izraɛl lé fɛvuzan faa nɔ Lévi benu lɛ wozé nya, nyanama lé wa paan zén‐ékevasɔkɔn gi, a ma ban nya. 22Té Izraɛlnu é bié zén‐ékevasɔkɔn ma é dɛrɛ lo, dé wo da wenyané dɔ ’wobo nwiin yé wo ga. 23Lévinu woo zén‐ékevasɔkɔn gi nyanama paan, amalé munu lé weple é dan vo lɛ wo nwiinwe nya. Wozé fɛ ’ka dan kɛlɛ lɛ Izraɛlnu va lo; we ’ko é dan vo lɛ bélidɔwe do lé é ’ka nyaan lo, a nya, i kulunu va. 24Fɛvuzannu lé Izraɛlnu é dan a nɔ lɛ Gakelebale lɛ wo nwale valé wo tuale nya, maa a nɔ Lévinu lɛ wozé nya; bɛwemalé maa lé wolé we ma léé, té wozé fɛ é kɛlɛ Izraɛlnu va lo.
Lévinu lé fɛvuzan nɔle
(Néé 10:38)
25Gakelebale lé Moizi lɛ léma: 26Bé fe Lévinu lɛ léma: Izraɛlnu lé fɛvuzannu lé maa a nɔ ka lɛ wo bɛ nya, ’té ka a ye kazé fɛ nya bɛ, ’ka Gakelebale ban a va fɛvuzan nya; 27yé fɛ lé ka Bale baan a nya, maa dan a ye lɛ bélé kalé ’sa sunwona ’sa vinin zo, é valé dɔrɔ dɛrɛ lé wa koli dɔrɔ borona, a zo. 28A zo lé fɛvuzannu faa lé ka a ye Izraɛlnu va, ’ka balebanfɛ si a va, yé fɛ lé ka si a va yé ka Bale ban a nya bɛ, ’ka a nɔ Balebanzan Arɔn lɛ. 29Blɛ faa lé wo dan a kɛlɛ lɛ ka lɛ, ’ka Gakelebale banfɛ si a va; fɛ zima baba faa, ’ka Bale zé si a va, ’ka pa é yɛrama. 30Bé fe wo lɛ léma: Dé ka fɛ zima baba si a va, a pɔnénu é dan vo lɛ Lévinu lɛ bélé wolé ’sa sunwona fɛ zo, é valé dɔrɔ borona gi dɔrɔ zo. 31Dé é a fɛofɛanna nya, ’ka a ble ana, ka valé kalé kɔngimunu nya; naa, nyanama lé ka ke a pana zén‐ékevasɔkɔn gi, é a a maban nya. 32Wo ’ka dan we do kpen dɔ lɛ ka nwiin ’bɛ lé we ma lo, ’té dé ka a zin baba si a va. Té ka Izraɛlnu lé balebanfɛ boennu ye fɛ pla nya lo, dé ka da ga.
Currently Selected:
Mi Nɔnɔle 18: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
