Mi Nɔnɔle 16
16
Korénu nwa Bale ma
(Mi N 26:8–11; WGV 14:30; Ébr 10:31)
1Lévi be Kéat be Jiséaa be Koré nwa Moizi ma. Éliab benu Datan valé Abiram koo, Pélɛt be On koo, wo ɛ pa a va. Woo mi yaa ’ko a Rubɛn kululazannu nya. 2Wo nwa Moizi ma, ’wo valé Izraɛlnu wuru do yɔ fié wɔlɛ vu nya; ’bɛnu a mi blɛnnu nya, wa weplamilɛmunu nya, tɔ blɛnzannu nya. 3Wo nwa Moizi valé Arɔn ma, yé wo lé ’bɛnu lɛ léé: Kazé sɔ. Naa, munu faa a segele, yé Gakelebale a wo méléna. Mɛmalé ka kabo nwaan blɛn Gakelebale lé munu nwiin?
4Moizi dére ’ko ’ma aan wo, é dia é bli la. 5É lé Koré valé é vamunu lɛ léma: Tɛlɛ, mi lé é ke Gakelebale zé nya, yé mi lé é ke mi segele nya, Gakelebale é dan a gɔɔn lɛ, yé é dan ’bɛzan bié lɛ ’é ma; mian é a si ’ézé nya, é dan ’bɛzan bié lɛ ’é ma. 6’Ka kɛlɛ ’ko zo: Koré valé é vamunu, ’ka faa kyɛnyɛsibɔ si do do. 7Tɛlɛ, ’ka kyɛnyɛ zén wo gi, yé ’ka lasikɔrɔpo pla a ta Gakelebale ’lɛ; mian Gakelebale a si a va, yee mi ’ko é dan kɛlɛ lɛ segele. ’Kaa Lévimunu, kazé sɔ.
8Moizi lé Koré lɛ léé: ’Kaa Lévinu, ’ka tɔné dɔ ma. 9Izraɛlnu lé Bale ka si Izraɛl munu va, yé é ka bié ’é sɔnɔ, léé, ka kɛlɛ Gakelebale lé sɔkɔn gi nyanamapazannu nya, yé ka dɔ munu ’lɛ Gakelebale bɔzannu nya, ’bɛ a we kiéné nya ka yuɛii? 10É ka bié ’é sɔnɔ, bii valé i bwenu faa lé, ka ke Lévinu nya, wo nya, yé ka bli bɔ é ziin balebannyanama maa? 11’Bɛ lé we ma lé bii valé i vamunu faa, ka zén ékeva Gakelebale ma. Naa, de ɛ ke Arɔn nya yé ka gun gyɛ a maa?
12Moizi mi nwunvɔ Éliab benu Datan valé Abiram laana, naa, wo léé: Ko ’ka gona lo. 13I ko si tɛrɛ nyɔnɔzan ta, léé, ko ga bwi gi, ’bɛ ’ka i yuɛ gi bɔ lɛ loo? ’Té i a duowo é plale ko nwiin? 14I ’ka go lɛ ko nya tɛrɛ nyɔnɔzan ta lo; i ’ka féinu valé dɔrɔféinu nɔ lɛ ko lɛ lo. É a i gi léé, i munu ’ko yuɛ ’wii é woo? Ko ’ka gona lo.
15Moizi bli fli é baba, yé é lé Gakelebale lɛ léé: Dé wo i ban fɛan nya, té bé si lo. Maa ’ka fɛ do boen si lɛ wo lee lo, dé é a sokofale do nyaoo, maa ’ka a do kpen si lɛ wo lee lo, yé an ’ka wenaané kɛlɛ lɛ wo va mi do lɛ lo, azama.
16Moizi lé Koré lɛ léé: Bii valé i vamunu, ’ka dɔ Gakelebale ’lɛ tɛlɛ; bii koo, wo koo, Arɔn koo, ka lé. 17Ka faa do do ’ka kyɛnyɛsibɔ si; ’ka lasikɔrɔpo pla a ta, yé ka faa do do ’ka da kalé kyɛnyɛsibɔ nya Gakelebale ’lɛ. Kyɛnyɛsibɔ é dan kɛlɛ lɛ mi wuru do yɔ fié wɔlɛ vu lee. Bii valé Arɔn, ’ka kazé kyɛnyɛsibɔ si do do é ziin. 18Wo ’wolé kyɛnyɛsibɔ sia do do, wo kyɛnyɛ zén a gi, yé wo lasikɔrɔpo pla a ta, yé wo dɔ loru zén‐ékevasɔkɔn ’léé, wo valé Moizi valé Arɔnnu nya. 19Yé Koré munu faa laa léé, ’wo nwa Moizi valé Arɔn ma, zén‐ékevasɔkɔn ’léé. Tɔɔn, Gakelebale lé fuasan bɔra zén‐ékevamunu faa yuɛ va. 20Yé Gakelebale lé Moizi valé Arɔn lɛ léé: 21’Ka si munu ’konu va, ’ka si wo méléna, yé maa dan wo gyɛ lɛ bléyi do kpen nya. 22Moizinu dia ’wo bli la, yé wo léé: Oo Bale, munu faa lélinu lé Bale, mi do kpen wenyané kɛlɛ yé i bli fli munu faa maa? 23Gakelebale we fe Moizi lɛ yé é léé: Bé fe munu faa lɛ léé, 24’wo si Koré koo, Datan koo, Abiram koo, wo nyanana ma yé ’wo gyɛ ’wo zuo wo ma baa.
25Moizi nwa yé é go Datan valé Abiram vazia. Yé Izraɛl lé mi segelenu go a zuo. 26É lé zén‐ékevamunu lɛ léé: ’Ka si mi nyanénu ’konu lé sɔkɔnnu ma baa; fɛ lé é ke wozé nya, té ka mane a do kpen ma lo, dé ka da zamaga wo bléyian va lé wo we lɛdɔ wo gi wolé wenyanénu faa ma, a bléyi va. 27Yé wo gyɛ ’wo zuo, Koré koo, Datan koo, Abiram koo, wolé sɔkɔnnu ma baa. Datan valé Abiram bɔra yé wo dɔ ’wolé sɔkɔnnu ’léé, ’wo valé ’wo nanu koo, ’wo benu koo, ’wo nénénu koo, woo lé.
28Moizi léé: We ’ko ma lé ka dan a gi dɔɔ lɛ léé, Gakelebale an nwunvɔ we ’konu faa kɛlɛle we gi; maa ’ka wo kɛlɛna anbo ’wuo gi lo. 29Dé munu ’ko ga mi faa gabɛ gi, dé wean éé bɔa munu faa ma, dé é bɔ wo ma, ’té Gakelebale ’ka an nwunvɔ lɛ lo; 30naa, dé Gakelebale we dɛrɛ blɛɛn kɛlɛ, dé tɛrɛ ’é ’léé lɛ so yé é munu ’ko mini, wo valé wo leefɛnu faa nya, dé wo zun gamunu nyanana é yuɛma, ’té ka dan a gi dɔɔ lɛ léé, munu ’ko serele bo Gakelebale ma. 31Dé é nyaa dére ’konu fele nya tɔɔn, tɛrɛ lé ke wo wuo, a fee bo.
32Tɛrɛ ’é ’léé lɛ so yé é wo mini, wo koo, wolé kɔnnu koo, Koré lé munu faa koo, wolé fɛnu faa koo, woo lé. 33Wo zun gamunu nyanana é yuɛma, wo valé wo leefɛnu faa nya; yé tɛrɛ lɛ tan wo ta, yé wo san zén‐ékevamunu méléna. 34Izraɛlnu faa lé é ke é dirile wo zi, wo fwi wo siaale we ma, yé wo léé: Kaa fwi! dé tɛrɛ é da kaa mini! 35Yé kyɛ do si Gakelebale va, yé mi wuru do yɔ fié wɔlɛ vu lé woo Bale baan lasikɔrɔ nya, é wo ble.
36Gakelebale we fe Moizi lɛ yé é léé: 37Bé fe Balebanzan Arɔn be Éléazaa lɛ léé, ’é kyɛnyɛsibɔ si kyɛ va, yé kyɛ lé é ke wo gi, ’é a zana baa, naa, wa é pale é yɛrama. 38Munu lé wobo bɔra gale lɛ wolé wenyané ma bɛ, ’i wolé kyɛnyɛsibɔnu si, yé ’i wo panu dɔ yé ’i wo bua balebanna ta. Wo wo dɔ Gakelebale ’lɛ, yé wo wo pa é yɛrama Bale zé nya, amalé wenu lé wo bɔ, wo dan kɛlɛ lɛ wo sele dɔ Izraɛlnu gifɛnu nya. 39Munu lé kyɛ wo ble, Balebanzan Éléazaa wolé kyɛnyɛsi zénébɔnu si, yé é wo pa dɔ yé é wo bua balebanna ta. 40É a we sele dɔ Izraɛlnu gifɛ nya, léé, munu lé wo ’ka Arɔn bɛn gi munu nya lo, té wo va mi do kpen é bié Gakelebale banle lasikɔrɔ nya we ma lo; té wolé we é kɛlɛ bélé Koré valé é vamunu zé zo lo we ma, we lé Gakelebale a fe Moizi lɛ, a yɛrama.
Arɔn munu si we gi
(1 Kor 10:10–11)
41’Bɛ é tu kini, Izraɛlmunu gun gyɛ Moizi valé Arɔn ma, a fele nya léé: Ka ɛ Gakelebale lé munu gyɛ. 42Zén‐ékevamunu wo péli vɔ do bléyian va Moizi valé Arɔn ma, yé wo yuɛ vɔ zén‐ékevasɔkɔn vazia, bé ye, lati bua a ta, yé Gakelebale lé fuasan bɔra. 43Moizi valé Arɔn bɔ zén‐ékevasɔkɔn ’léé. 44Yé Gakelebale we fe Moizi lɛ yé é léé: 45’Ka si zén‐ékevamunu ’ko méléna, yé maa wo ble kyɛ nya é nya do. Wo dia ’wo bli la, yé Moizi lé Arɔn lɛ léé: 46’I kyɛnyɛsibɔ si, yé kyɛ lé é ke balebanna ta, bé ke si, bé zén a gi, yé i lasikɔrɔpo pla a ta, yé ’i go zén‐ékevamunu vazia é nya do, yé ’i wolé wenyané ’yibo; naa, Gakelebale fuo wo ma yé migyɛgyɛ kun mi gyɛle ma tɛkɛ. 47Arɔn zénébɔ si, fɛan zo lé Moizi a fe, a zo, yé é vlan buru zén‐ékevamunu méléna, yé bé ye, migyɛgyɛ mi gyɛle péli sia. É Bale ban lasikɔrɔ nya, yé é munu lé wenyané ’yibo. 48Arɔn dɔ mi galenu valé mi yuɛmalenu méléna, yé migyɛgyɛ dɔ. 49Munu lé migyɛgyɛ ’ko wo gyɛ, wa mi baa sɔrafié wuru yaa yɔ soru; munu lé wo ga Koré lé we ma, ’bɛnu a é yɛrama. 50Arɔn go é pa gi Moizi va, zén‐ékevasɔkɔn ’léé. Migyɛgyɛ dɔ.
Currently Selected:
Mi Nɔnɔle 16: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
