Matio 3
3
Mi batizéwozan Jan Bale lé we fe
(Éz 40:3; 57:14; Mk 1:1–8; Lk 3:1–9; Jn 1:19–28)
1Bléyi ’ko va mi batizéwozan Jan bɔra; é Kazambale lé we fe Judé bwi la. 2É léé: Kazambale lé plale mi nwiin bɔ é pu, amalé ’ka bli nɔla. 3Balelayezan Ézai a fe aan wo léé:
Mi lé é ke siaana bwi gi, a dére lé ke ’ko:
’Ka zi ma’lɛrɛ Mizan lɛ;
’Ka alé zinu ta bɔ ékema,
mian Ézai a mawe fe bɛ, Jan lé.
4Nyɔgɔmé kyɛɛ varɔ a é zénle Jan ta, yé wikɔlɛ kyɛsidi a é dɔle a gyɛn. Flɛlɛ valé bwi gi zɔrɔnyɔnɔ ɛ ke alé fɛblele nya. 5Jérusalɛm munu koo, Judé tɛrɛlamunu faa koo, Juudɛn zi tɛrɛlamunu faa koo, wo go a va. 6Wo ’wolé wenyanénu fe yé é wo batizéwo Juudɛn yuu va.
7Juifinu palu do ana, woo wo laama Farizimunu. Wo dɔ bélidɔwe gi plɛplɛ. Juifinu palu do ana é ziin, wo ’bɛnu laama Sadusémunu. Naa, Farizimunu valé Sadusémunu kiɛre da Jan lé mi batizéwona nagini lɛ. É wo ye aan wo, é lé wo lɛ léé: ménénwunnu bɛn, de ɛ we paa ka gi léé, bliflile lé é dan da lɛ bɛ, ka fwi a ’lɛɛ? 8We lé ka kɛla yé ’bɛ a gɔɔn léé, ka bli nɔla, ’ka ’bɛ kɛlɛ, 9yé té ka fe ka bli gi léé, Abraam a ’wo tra nya, lo. Naa, maa lé ka lɛ léé, Kazambale é bɔalɛ léé, é gɔlɛ ’konu kinin Abraam gɔnɔlazannu nya. 10Wo zaa dɔ kɔɔn yili suni ma é kwakwa; bɛwemalé yili faa lé wo ’ka ’wo poro zima baan lo, woo wo bɔié yé woo wo vulian kyɛ va.
11Maa ka batizéwo ’yi nya ka bli nɔlale we gi, naa, mian é dan da lɛ an zuo, a plɛplɛ mini an ta, yé a yara ’ka an yara lé maa alé sawala si lo. Yee ɛ dan ka batizéwo lɛ Léli Sauun valé kyɛ nya. 12Alé guli a a lee. É dan élé ’sa sunwo lɛ, yé é a fɛɛ, yé é dan élé ’sawɔlɛ zén lɛ ’sawɔlɛ tadɔna, naa, é dan ’sa pɛɛnu kyɛ ble lɛ, kyɛ lé é ’ka dirian monomono lo, a va.
Jan Jézu batizéwo
(Mk 1:9–11; Lk 3:21–22)
13’Bɛ zuo Jézu si Galilé tɛrɛ la yé é da Jan va Juudɛn yuu bai, ’é batizéwole we gi. 14Naa, Jan lé a lɛ léé: Gba. É a lé i an batizéwo ’naan, yé i léé, maa ’é batizéwoo? 15Jézu a zi pa a lɛ léé: ’I bli si izé lɛ, ’i anzé kɛlɛ. Naa, é a é zima léé, ko Bale dére tawe faa kɛlɛ tegele. Yé Jan ’ka we bɛ fe lɛ é dɛrɛ lo. 16Jézu batizéwole zuo é si ’yi va tɔɔn, la lɛ so, yé é Kazambale Léli ye zunna ’é ta é kɔlɛ nya bélé plala zo. 17Yé bé ye, dére do we la gi yé é léé: Mi ’ko, é a an be lé é sɔ an lɛ é baba, a nya. A va sɔlɛle a an gi blɛn.
Alliance Biblique de Cote d'Ivoire 1979