Matio 2
2
Wedɔɔmunu da
(Mis 5:1)
1Wo Jézu yaa aan wo Bɛtléɛm, Judé tɛrɛ la, minwiinzan Érɔd bléyi va, yirinwanazia wedɔɔmunu da Jérusalɛm, 2yé wo léé: Né lé wa yaa Juifinu nwiinzan blɛn nya, é a kyɛɛn? Ko alé monéné ye yirinwanazia, amalé ko da a bɔ lɛ.
3Minwiinzan Érɔd we ’ko ’ma aan wo, é gibɔrɔ pa yee valé Jérusalɛm munu faa ma. 4Yé é Balebanmunu segelenu faa valé Juifinu lé sɛbɛgifemunu zén ékeva yé é we laa wo lee léé: Wo dan Krist yaa lɛ kyɛɛn? 5Wo lé a lɛ léma: Bɛtléɛm, Judé tɛrɛ la, naa, we lé balelayezan a gyɛ, yee lé ke ’ko:
6Yé bii Bɛtléɛm, Juda tɛrɛ la,
I tɔ ’ka kiéné Juda fla blɛnnu méléna lo.
Naa, bii ta lé wo dan minwiinzan yaa lɛ,
Yee ɛ dan fɛblele nɔ lɛ anlé munu Izraɛl lɛ.
7’Bɛ zuo, Érɔd wedɔɔmunu laa kyeen gi, yé é we laa wo lee a gi ’male pɛnpɛn we ma léé, ka monéné bile ye bléyi kyɛn vaa? 8’Bɛ zuo yé é zi nɔ wo lɛ léé, wo go Bɛtléɛm, yé é léé: ’Ka go, ’ka né kiéné lé we gi laa tegele. Dé ka a ye, ’ka a fe an lɛ, yé maaboen é go an é bɔ.
9-10Wo minwiinzan dére ’ma faa yé wo go, yé monéné lé wa ye yirinwanazia, é kun tawole ma wo ’lɛ. Wo monéné ye aan wo, wo gi nana é baba. É tawo wo ’lɛ fɔɔ yé é bɔ fɛana lé né kiéné ke, a nwiin, yé é dɔ. 11Wo wɔra kɔn gi, yé wo né kiéné valé é bu Mari ye. Wo dia ’wo bli la a ’lɛ yé wa bɔ. ’Bɛ zuo yé wo ’wolé fɛwezan kɔné fuo yé kyan koo, lasikɔrɔpo koo, lia lé wa laama miré koo, wo wo nɔ a lɛ a blan nya. 12’Bɛ zuo, Bale a fe wo lɛ nyɛ fla léé, té wo gié Érɔd vazia é ziin lo. Yé wo gié zi bɛ ’léé, yé wo go ’wolé fla.
Jozɛfunu fwi yé wo go Éjipiti tɛrɛ la
(Fw 1:15; LvS 2:4; 76:11)
13Wo go aan wo, bé ye, Mizambale lé lanje do bɔra Jozɛfu va nyɛ fla, yé é léé: ’I nwa. ’I né kiéné valé é bu si, yé ’i go vlan nya Éjipiti tɛrɛ la. ’I vo ana mi fɔɔ yé maa i laa. Érɔd é dan né kiéné gini lɛ, a gyɛle we gi. 14Jozɛfu nwa, yé é né kiéné valé é bu si é béli yé é go Éjipiti tɛrɛ la. 15É vo ana mi fɔɔ yé Érɔd ga, we lé Mizambale a fe balelayezan lɔlu nya, a lɛsɔɔle we gi. É léé: Maa an be laa, ’é si Éjipiti tɛrɛ la.
Érɔd nénu gyɛ
(Jér 31:15)
16Érɔd a ye aan wo léé, wedɔɔzannu dabli kɛlɛ é lɛ, a bli fli é baba. É munu pa zia Bɛtléɛm valé é zi tɛrɛ faa la léé, négɔnénu lé wo lɛɛ bɔ fié, é valé wo lé wo lɛɛ ’ka tan bɔ lɛ fié lo, ’wo wo gyɛ, moné yi lé é a laa wedɔɔzannu lee, a yɛrama. 17’Ko zo lé, we lé balelayezan Jérémi a fe, a lɛ sɔɔ. É léé:
18Wo dére ’ma Rama,
Wuvɔlenu valé siaale plɛplɛnu nya;
Rasɛl a ’élé nénu wuvɔna.
Wo ’ka ana é dɛrɛ lo,
Amalé é ’ka a va léé, wo ’é tɔrɔ paa lo.
Jozɛfunu fwi Éjipiti tɛrɛ la
(Ozé 11:1)
19Érɔd ga aan wo, Mizambale lé lanje do bɔra Jozɛfu va nyɛ fla Éjipiti tɛrɛ la, 20yé é léé: ’I nwa, ’i né kiéné valé é bu si yé ’i go i pa gi Izraɛl tɛrɛ la. Naa, munu lé é sɔ wo lɛ léé, ’wo né kiéné gya, wo ga. 21Jozɛfu nwa, yé é né kiéné valé é bu si, yé é go Izraɛl tɛrɛ la. 22Naa, é a ’ma aan wo léé, Akélaus a é plale Judé munu nwiin é ti Érɔd pa gi, yé é kana gole ma ’bɛna, naa, Bale a bɔn‐in kini nyɛ fla yé é go Galilé tɛrɛ la, 23yé é nyana fla do lé wa laama Nazarɛt, a ta, we lé balelayemunu a fe, a lɛsɔɔle we gi. Wo léé: Wo dan a laa lɛ Nazarɛtzan.
Currently Selected:
Matio 2: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979