Lévinu 14
14
Pantɛn sile mi ma lé we
(Mk 1:40–44)
1Gakelebale we fe Moizi lɛ yé é léé:
2Wo dan pantɛngyɛzan lé we kɛlɛ lɛ fɛan zo, a nwiinfoliyi nya, yee lé ke ’ko: 3Wo dan da lɛ a nya Balebanzan va. Balebanzan é dan si lɛ fla yé é dan pantɛngyɛzan ma gini lɛ. Dé pantɛngyɛzan béli, 4Balebanzan é dan a fe lɛ léé, ’wo da a nwiinfolifɛnu nya. Miané yuɛmale zinzin fié koo, sɛdrɛyili koo, sɔ sɔɔn koo, izopéyilibɛ koo, ’wo da wo ɛ nya. 5Balebanzan é dan a fe lɛ léé, ’wo ’yiyoro koli yé ’wa zén tɛrɛbɔ gi, yé ’wo miané do bɔrɔ bo yé wa nyɛ zén a va. 6Miané yuɛmale koo, sɛdrɛyili koo, sɔ sɔɔn koo, izopéyilibɛ koo, é dan wo si lɛ yé é dan wo vɔ lɛ, miané lé wa bɔrɔ bo lao yé wa nyɛ zén ’yi va bɛ, a nyɛ va. 7É dan nyɛ nwɛɛn lɛ gɔnɔ sɔrafié, pantɛngyɛzan lé é dan ’é nwiin foli lɛ, a ta. ’Bɛ zuo é dan a fe lɛ léé, é kɛlɛ tegele, yé é dan daan lɛ miané yuɛmale ma yé ’bɛ é go bwii.
8Mi lé é da é nwiin foli lɛ, é dan élé sɔ zuru lɛ, é dan é ma kyɛɛ faa bo lɛ, yé é dan zuru lɛ yé a gi é bɔ. ’Bɛ zuo, a se a a lɛ léé, é go fla, naa, té é go élé kɔn gi lo, fɔɔ yi sɔrafié. 9A yi sɔrafiézan nya, é dan é kɔlɛ faa ma kyɛɛ bo lɛ, a nwin koo, a puomagun koo, a yuɛlagɔɔn koo, a kyɛɛ faa lé; é dan élé sɔnu zuru lɛ yé é dan zuru lɛ yé é kɛlɛ tegele. 10A yi sɔraazan nya, ’blané fié lé fɛ do kpen ’ka wo ma lo koo, lɛɛ do ’blada lé fɛ do kpen ’ka a ma lo koo, suo nya do burupun zin lé wa vɔɔ nyɔnɔ nya yé é kɛlɛ balebanfɛblele nya, ’bɛ koo, nyɔnɔ litré buu koo, é dan wo si lɛ. 11Balebanzan lé é dan mi ’ko nwiin foli lɛ, é dan da lɛ gɔné ko valé fɛ ’konu faa nya Gakelebale ’lɛ, zén‐ékevasɔkɔn ’léé.
12Balebanzan é dan ’blané do valé nyɔnɔ litré buu si lɛ yé é dan wenyaa saraka bo lɛ a nya; é dan a dia lɛ ’é bɛ fié la Gakelebale ’lɛ. 13Fɛana lé wenyané ’yibo sarakawi valé balebanwi lé wa kyɛ blé, woo wo bɔrɔ boo, ana lé wo dan ’blané ’ko bɔrɔ bo lɛ, fɛna sauun na; naa, wenyaa saraka a bélé wenyané ’yibo saraka zo, a wi a Balebanzan zé nya; é a Bale ’lɛfɛ nya. 14Balebanzan é dan wenyaa sarakawi nyɛ si lɛ; yé mi lé é da ’é nwiin foli lɛ bɛ, é dan a pa lɛ a bɛyila tɔné bɛné koo, a bɛyi bɛnwɔlɛ gɔné koo, a bɛyi ganewɔlɛ gɔné koo, wo ma. 15Balebanzan é dan nyɔnɔ litré buu si lɛ yé ’é a zén é bɛbo lee guru la. 16Balebanzan é dan é bɛyi bɛnwɔlɛ vɔ lɛ nyɔnɔ lé ke é bɛbo lee, a va, yé é dan a nwɛɛn lɛ gɔnɔ sɔrafié Gakelebale ’lɛ. 17Nyɔnɔ lé é vo Balebanzan lee bɛ, é dan a pa lɛ, mi lé é da ’é nwiin foli lɛ, a bɛyila tɔné bɛné koo, a bɛyila bɛnwɔlɛ gɔné koo, a bɛyila ganewɔlɛ gɔné koo, wo ma, wenyaawi nyɛ ta loru. 18Nyɔnɔ pɔné lé é vo Balebanzan lee, é dan a zén lɛ gɔnézan lé é da ’é nwiin foli lɛ, a nwiin; yé Balebanzan é dan alé wenyané ’yibo lɛ Gakelebale ’lɛ. 19’Bɛ zuo, Balebanzan é dan wenyané ’yibo saraka bo lɛ, mi lé é da ’é nwiin foli lɛ, ’é kɛlɛle tegele we ma, azan zé nya. 20’Bɛ zuo, balebanwi lé wa kyɛ blé, Balebanzan é dan a bɔrɔ bo lɛ. Balebanwi lé wa kyɛ blé, Balebanzan é dan yee valé balebanfɛblele nɔ lɛ balebanna ta; é dan mi ’ko lé wenyané ’yibo lɛ, yé ’é kɛlɛ tegele.
21Dé mi ’ko a nyanégyɛzan nya yé fɛ’konu mafɛ ’ka a lee lo, é dan da lɛ ’blané do kpen nya, yé wo wenyaa saraka bo a nya, ’té dé wa dia é bɛ fié ta faa, ’bɛ nya lé wo dan alé wenyané ’yibo lɛ. É dan da lɛ burupun zima lé wa vɔɔ nyɔnɔ nya, a suoné do nya, yé ’bɛ é kɛlɛ balebanfɛblele nya; yé ’é da nyɔnɔ litré buu nya é ziin. 22É dan plala fié si lɛ é ziin, dé ’bɛ kaan lo, plawuo sua fié, gɔɔli a a lee fɛan zo, a zo; yé a do ’é kɛlɛ wenyané ’yibofɛ nya, yé a koɛ ’é kɛlɛ balebanwi lé wa kyɛ blé, a nya. 23A yi sɔraazan nya, mi ’ko é dan da lɛ fɛ ’konu faa nya Balebanzan va, ’é nwiin folile we gi, zén‐ékevasɔkɔn ’léé, Gakelebale ’lɛ.
24Balebanzan é dan wenyaa saraka ’blané si lɛ, ’bɛ valé nyɔnɔ litré buu nya, yé é dan wo dia lɛ é bɛ fié la, Gakelebale ’lɛ. 25É dan wenyaa saraka ’blané bɔrɔ bo lɛ. Balebanzan é dan wenyaa ’blané nyɛ si lɛ yé ’é a pa, mi lé é da ’é nwiin foli lɛ, a bɛyila tɔné bɛné koo, a bɛyi bɛnwɔlɛ gɔné koo, a bɛyi ganewɔlɛ gɔné koo, wo ma. 26Balebanzan é dan nyɔnɔ zén lɛ é bɛbo lee guru la. 27Yé Balebanzan é dan é bɛnwɔlɛ vɔ lɛ nyɔnɔ lé ke a bɛbo lee, a va, yé ’é a nwɛɛn gɔnɔ sɔrafié Gakelebale ’lɛ. 28Nyɔnɔ lé ke Balebanzan lee bɛ, é dan a pa lɛ mi lé é da ’é nwiin foli lɛ bɛ, a bɛyila tɔnébɛné koo, a bɛyila bɛnwɔlɛ gɔné koo, a bɛyila ganewɔlɛ gɔné koo, wo ma, fɛana lé é wenyaa wi nyɛ gié, ana. 29Nyɔnɔ pɔné lé é vo Balebanzan lee, é dan a zén lɛ mi lé é da ’é nwiin foli lɛ, a nwiin, alé wenyané ’yibole Gakelebale ’lɛ we ma. 30’Bɛ zuo, dé plala do léé, dé plawuo sua do léé, ’té é a ye bɛ, é dan saraka bo lɛ a nya; 31a do é dan kɛlɛ lɛ wenyané ’yibo saraka nya, yé a koɛ é dan kɛlɛ lɛ balebanwi lé wa kyɛ blé, a nya, yé é dan balebanfɛblele nɔ lɛ é ziin; yé mi lé é da ’é nwiin foli lɛ, balebanzan é dan alé wenyané ’yibo lɛ Gakelebale ’lɛ.
32Mi lé pantɛn a gyɛ, yé fɛ ’ka a lee kiɛre lo, é dan ’é nwiin foli lɛ fɛan zo, yee lé ke bɛ.
Kɔnguru ma pantɛn lé we.
(Lév 13:47–50)
33Gakelebale we fe Moizi valé Arɔn lɛ yé é léma:
34Dé ka bɔ Kanaan tɛrɛ lé maa dan a nɔ lɛ ka lɛ kazé nya, a ta, dé maa ana tɛrɛ la kɔn do gyɛ pantɛn gyɛ nya, 35kɔnzan é dan da lɛ Balebanzan va yé é dan a fe lɛ a lɛ léé, maa fɛ do ye anlé kɔn ma bélé gyɛ zo. 36Dé Balebanzan ’ka tan wɔra lɛ kɔn gi a naginile we gi lo, é dan a fe lɛ léé, ’ka fwi a gi, té a gifɛnu faa sɛrɛ lo we ma. ’Bɛ zuo Balebanzan é dan wɔra lɛ kɔn gi yé é a nagini.
37Balebanzan é dan gyɛ nagini lɛ. Dé é a ye léé, guru vɔ kɔnguru ma, ’té a gi a drandran valé kanakana, yé a guru vɔ kɔnguru gi baa, 38é dan bɔra lɛ yé dé é bɔ kɔn’léé yé é kɔn lɛ tan, yé ’é vo a zo yi sɔrafié. 39Balebanzan é dan da lɛ é ziin a yi sɔrafiézan nya. Dé é a ye léé, gyɛ gi gyɛ kɔnguru gi, 40é dan a fe lɛ léé, gɔlɛnu lé fɛ ’ko vɔ wo ma, ’wo wo si ana, yé ’wo wo vuli fla gini ma bwi gi, fɛna naané na. 41É dan a fe lɛ léé, ’wo kɔnguru faa ma kaan, yé ’wo ana tɛrɛ si yé wa nwɛɛn bwi gi, fɛna naané na. 42Wo dan gɔlɛ bɛnu si lɛ, yé ’wa pa a vininzannu pai; yé wo dan tɛrɛ bɛ gié lɛ kɔnguru ma.
43Dé wo gɔlɛnu si, dé wo kɔn ma kaan yé wa guru ma wo faa, ’bɛ zuo dé gyɛ da é ziin yé é bɔra kɔn ’ko ma, 44Balebanzan é dan nɔla lɛ é pa gi kɔn ’ko gi. Dé é a ye léé, fɛ ’ko gi gyɛ kɔnguru ma, ’té pantɛn lé é ’ka nyaa lo, ’té ’bɛ ɛ ke kɔn ’ko ma. É sɛrɛ. 45Wo dan kɔn ’wii lɛ; a gɔlɛnu koo, a yilinu koo, kɔn mawotɛrɛnu faa koo, wo dan go lɛ fɛ ’konu faa nya fla gini ma fɛna naané na. 46Bléyi faa va lé kɔn lɛ ke é tanle, mian é go yee kɔn gi, a tiri ’é dɔ fɔɔ nyanadi bléyi va. 47Mi lé é yi gyɛ kɔn ’ko gi, é a lé ’élé sɔnu zuru. Mi lé é fɛ ble kɔn ’ko gi, yee é ziin, é a lé ’élé sɔnu zuru.
48Dé Balebanzan da kɔn ma nagini lɛ é ziin, dé é a ye léé, a ma gyɛ gi ’ka gyɛ lɛ a mawole zuo lo, é dan a fe lɛ léé, kɔn vo é zima, naa, alé gyɛ si. 49Mianénu fié koo, sɛdrɛyili koo, kununu sɔɔn koo, izopéyili koo, Balebanzan é dan wo si lɛ kɔn vo é zima fɛ nya. 50É dan ’yiyoro koli lɛ yé é a zén tɛrɛbɔ gi yé é miané bɔrɔ bo tɛrɛbɔ ta, yé a nyɛ zén a va. 51Sɛdrɛyili koo, izopé koo, sɔ sɔɔn koo, miané yuɛmale koo, é dan wo si lɛ yé é wo zua miané lé é a bɔrɔ bo é vinin, a nyɛ valé ’yi zin va, yé é dan a nyɛ nwɛɛn lɛ kɔn ta gɔnɔ sɔrafié. 52’Bɛ zo lé é dan kɔn vo lɛ é zima, miané nyɛ koo, ’yi zin koo, miané yuɛmale koo, sɛdrɛyili koo, sɔ sɔɔn koo, wo nya. 53’Bɛ zuo é dan go lɛ miané yuɛmale nya fla gini ma yé ’é daan a ma yé é go bwi gi. ’Bɛ zo lé é dan kɔn ma wenyané ’yibo lɛ yé é kɛlɛ é zima.
54Pantɛn manɔn faa valé gyɛ koo, 55sɔ ma pantɛn valé kɔn ma pantɛn koo, 56kɔlɛ baale koo, mi ma kɔlɛ dɔle koo, sonné bɔrale mi ma koo, wolé we é dan kɛlɛ lɛ fɛan zo, a zo lé é ke bɛ. 57Dé fɛ sɛrɛoo, dé fɛ a tegeleoo, ’bɛ ma lé ka dan a gi dɔɔ lɛ. Pantɛn lé we é dan kɛlɛ lɛ fɛan zo, a zo lé é ke bɛ.
Currently Selected:
Lévinu 14: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
