Wepélisiananu 42

Jozɛfu bwenu go Éjipiti tɛrɛ la

(Kw 7:11–12)

1Jakɔb a ’ma léé, ’sa ana Éjipiti tɛrɛ la. Yé é lé é benu lɛ léé: Mɛmalé ka vo ka ke nagininaa? 2Yé é léé: Maa ’ma léé, ’sa ana Éjipiti tɛrɛ la. ’Ka go ana, kaazé lɔ, kaa vole é yuɛma we ma, yé kaa ’ka gaan lo.

3Jozɛfu bwe vu go Éjipiti tɛrɛ la, ’sa lɔle we gi. 4Jakɔb ’ka Jozɛfu zuané Bɛnjamɛn pa lɛ wo va lo, dé wenyané do é da bɔ a ma. 5Lɔrɔ dɔ Kanaan tɛrɛ la yé Izraɛl benu go ’sa lɔ lɛ, ’té tɛrɛ bɛ ta munu é go é ziin, ’té wo go ’bɛnu nya.

6Jozɛfu a é plale tɛrɛ nwiin, yee ɛ ’sa daan munu faa lee. Jozɛfu bwenu da, yé wo dia ’wo bli la a ’lɛ, ’té wo yara a tɛrɛ va. 7Jozɛfu é bwenu ye, yé é wo dɔɔ, naa, é ’ébo ta yɔɔ wo ma yé ébo kɛlɛ bɛn bɛ zo. É we fe wo lɛ yara plɛplɛ nya yé é lé wo lɛ léé: Ka si kyɛɛn? Wo lé a lɛ léé: Ko si Kanaan tɛrɛ la, yé ko da fɛblele lɔ lɛ. 8Jozɛfu é bwenu dɔɔ, naa, a bwenu ’ka a dɔɔ lɛ lo.

9Nyɛnu lé Jozɛfu a gyɛ, ’té a bwenu lé we ke a gi, a sele dɔ a gi. Yé é lé wo lɛ léma: Mimavɔɔzannu lé ke ka nya. Fɛana lé tɛrɛ ke é tuale, ka da a nagini lɛ. 10Wo lé a lɛ léé: Anzan, gba. I wuomunu da ’sa lɔ lɛ. 11Mi do benu lé ko faa nya; ko a mi tegelenu nya; i wuomunu ’ka mimavɔɔzannu nya lo. 12Yé é lé wo lɛ léé: É ’ka ’bɛ zo lo. Fɛana lé tɛrɛ ke é tuale, ka da a nagini lɛ. 13Yé wo lé a lɛ léé: Ko, i wuomunu ’ko, ko a gɔné vu ta fié, Kanaan tɛrɛlami do benu nya; ko zuané a kyɔ ko ti va mi, yé a do ’ka ana é dɛrɛ lo. 14Jozɛfu lé wo lɛ léé: Maa a fe ka lɛ lao léé, ka a mimavɔɔzannu nya. 15Maa dan ka gi dan lɛ fɛan zo, yee lé ke ’ko: Faraɔn tɔ gi, ka ’ka dan bɔra lɛ ’ko pelo fɔɔ, ’té ka zuané da é wo. 16’Ka ka va mi do pa zia, ’é go ka zuané si, ’é da a nya, yé ka mi pɔnénu, ’ka vo bokɔn gi. Maa dan ka dére gi dan lɛ, yé dé weboen lé ka a fee? maa dan a gi dɔɔ lɛ. Dé ’bɛ kaan lo, Faraɔn tɔ gi, mimavɔɔzannu lé ka nya. 17Yé é wo faa vɔ bokɔn gi yi yaa.

18A yi yaazan nya, Jozɛfu lé wo lɛ léé: An kanaan Bale lee. ’Ka kɛlɛ ’ko zo yé ka vo é yuɛma. 19Dé ka a mi tegelenu nya, ka bwe do ’é vo é vɔle bokɔn gi yé ’ka go ’sa nya ka lé munu lé fɛblele nya. 20Yé dé ka a dana, ’ka da ka zuané nya, yé maa a gi dɔɔ léé, ka dére a tegele; yé ka ’ka dan ga lɛ lo. Yé wa kɛlɛ a zo.

21Yé wo lé wo ke lɛ léé: Iin, weboen lé, we lé ko a kɛ lɛ ko zuané lɛ, é ko gyɛ. Ko aboen lé nyané blɛn blele ye; é léé, ’ko nyanai zén ’é ta, yé ko ’ka ko tɔné dɔ lɛ a lɛ lilo. Awemalé we tɔntɔn ’ko bɔ ko ma. 22Rubɛn lé wo lɛ léé: Maa ’ka a fe lɛ ka lɛ yi la léé, té ka wenyané kɛlɛ né ’ko lɛ lo loo? Yé ka ’ka tɔné dɔ lɛ an lɛ lilo. Yé ka ye, wa nyɛ ma laa sin. 23Dé Jozɛfu we fe wo lɛ é danamla dɔ yee valé wo méléna, amalé wo ’ka a gi dɔɔa léé, éé wo dére maan lo. 24Jozɛfu si wo ma baa, wuvɔle we gi. É da é ziin, yé é we fe wo lɛ. ’Bɛ zuo yé é Siméɔn si wo va, yé wa yere foliɛwɔlɛbale nya wo yuɛ va.

25Jozɛfu lé munu lɛ léé, ’wo wolé pulunu fan ’sa nya, yé ’wo wolé gɔɔli pa é ziin wolé pulunu gi do do, yé ’wo zia fɛblele nɔ wo lɛ. Yé wa kɛlɛ a zo. 26Yé wo ’sa kɔnénu vɔ sokofalenu punu yé wo go.

27Fɛana lé wo yii, wo va mi do élé pulu lɛ so fɛblele nɔle élé sokofale lɛ we ma, yé gɔɔli lé wa pa ’sa ta loru alé pulu gi, é a ye. 28É lé é bwenu lɛ léé: Wo anlé gɔɔli nɔla an ma é pa gi. Yee lé ke anlé pulu gi ’ko. Wo gi nyɛ kini, yé wo kɔlɛ gi nyɔɔn, yé wo lé wo ke lɛ léé: Mɛ we lé Kazambale a kɛlɛ ko lɛ ’koo?

29Wo bɔ wo ti Jakɔb va Kanaan tɛrɛ la yé we faa lé é bɔ wo ma, wa zuo fe a lɛ. Yé wo léé: 30Mi lé ke tɛrɛzan nya ana mi, é we fe ko lɛ yara plɛplɛ nya yé é léé, ko a mimavɔɔzannu nya. 31Ko lé a lɛ léé, ko a mi tegelenu nya. Ko ’ka mimavɔɔzannu nya lo. 32Ko a mi vu ta fié, ko ti benu nya; ko bɔlu do ’ka ana lo, yé ko zuané voélazan a kyɔ ko ti va Kanaan tɛrɛ la. 33Yé mi lé ke tɛrɛzan nya, é lé ko lɛ léé: Dé ka a mi tegelenu nya, maa dan a gi dɔɔ lɛ we ’ko ma: ’ka ka bwe do vo an va; ’ka kalé munu lé fɛblele sia; ’ka go, yé ’ka da ka zuané voélazan nya an lɛ. 34’Ko zo lé maa dan a gi dɔɔ lɛ léé, ka ’ka mimavɔɔzannu nya lo; ka a mi tegelenu nya. Maa dan ka bwe nɔ lɛ ka lɛ é ziin, ’té zi a ka lɛ drɔɔ.

35Dé wo fɛ si wolé pulunu gi, ’té wo faa lé gɔɔli binu a é pale wolé pulu gi do do. Wo valé ’wo ti, wo gɔɔli binu ye, yé kana zén wo gi.

36Wo ti Jakɔb lé wo lɛ léé: Ka anlé nénu si an lee. Jozɛfu ’ka ana lo, Siméɔn ’ka ana lo, yé ka a a va léé, ’wo Bɛnjamɛn sié é ziin! Maa ɛ ke nyané blena we ’konu faa gi. 37Rubɛn lé é ti lɛ léé: Dé an ’ka da lɛ Bɛnjamɛn nya i lɛ é ziin lo, ’i an be fié gyɛ ma. Bé bɛ pa an lee, yé maa dan da lɛ a nya i lɛ é ziin. 38Jakɔb léé: An be ’ka dan go lɛ ka va lilo. Naa, a bwe ga, yé é vo é do. Dé wenyané bɔ a ma, ta lé ka go a wo lɛ bɛ, a gi, ka dan an gyɛ lɛ an be lé gibɔrɔ nya, yé an dan go lɛ nyané blele nya an tranu zuo gamunu nyanana.

Currently Selected:

Wepélisiananu 42: GOURU

Highlight

Copy