Fwile 4
4
Bale gyɛzorowe kɛlɛ plɛplɛ nɔ Moizi lɛ
(Jér 1:4–9, 17–19)
1Moizi lé Bale lɛ léé: ’A, wo ’ka dan bli pa lɛ an lɛ lo, yé wo ’ka dan tɔné dɔ lɛ an dére lɛ lo. Naa, wo dan a fe lɛ léé, Gakelebale ’ka bɔra lɛ i va lo.
2Gakelebale lé a lɛ léé: Mɛ fɛ lé ke i lee bɛɛ? É léé: Tawomayili lé. 3Gakelebale lé a lɛ léé: Bé vuli tɛrɛ va. É a vuli tɛrɛ va yé é kinin méné nya. Moizi vlanburu a lee. 4Gakelebale lé Moizi lɛ léé: ’I bɛ soi, bé kun é woli ma. É bɛ soi yé é a kun yé méné kinin tawomayili nya a lee é pai. 5Gakelebale léé: We lé i dan a kɛlɛ lɛ, yee lé ke bɛ, wo dɔle a ta we gi léé, Gakelebale, wo tinu lé Bale, Abraam koo, Izak koo, Jakɔb koo, wolé Bale bɔra i va.
6Gakelebale lé a lɛ é ziin léé: ’I bɛ pla i golɛ gi. É bɛ pla é golɛ gi; a zuo é a si ana yé bé ye, pantɛn a bɛ ma ble fu tata bélé kununu zo. 7Gakelebale léé: ’I bɛ pla i golɛ gi é pai. É bɛ pla é golɛ gi é pai; ’bɛ zuo é a si é golɛ gi yé bé ye, a kɔlɛ kɛlɛ é pa gi yɔrɔyɔrɔ. 8Gakelebale léé: Dé wo ’ka bli vo lɛ i lɛ lo, dé wo ’ka bli pa lɛ tɔmase vininzan gi lo, wo dan bli vo lɛ tɔmase voélazan lɛ. 9Dé wo ’ka bli vo lɛ tɔmase fié ’konu lɛ lo, dé wo ’ka tɔné dɔ lɛ i dére lɛ lo, i dan ’yi koli lɛ yuu va yé i dan a zana lɛ tɛrɛ va, yé ’yi lé bé si yuu va é dan kinin lɛ nyɛ nya tɛrɛ va.
10Moizi lé Gakelebale lɛ léé: ’A, Mizan, dé é a yese valé kyɛni nyaoo, dé é a ilé wefele i wuozan zuo nyaoo, maa ’ka wefezan nya lo; an dére valé an nɛnɛ a é gale bɛkɔɔ. 11Gakelebale lé a lɛ léé: De ɛ mi ’léé kɛlɛɛ? De ɛ mi kɛla bobogyɛzan nya yé de ɛ mi kɛla tɔnéwiizan nyaa? De ɛ mi kɛla yɛrɛye?-?zan nya yé de ɛ mi kɛla yuɛwiizan nyaa? Maa, Gakelebale kaan loo? 12Amalé ’i go, maa dan kɛlɛ lɛ i nɛnɛ va yé we lé i dan a fe lɛ maa dan a paa lɛ i gi. 13Moizi léé: ’A, Mizan, dé é sɔ i lɛ léé, i mian nwunvɔ, bé nwunvɔ. 14Yé Gakelebale bli fli Moizi ma yé é léé: Lévi mi, i bwe Arɔn ’ka ana loo? Maa gi dɔɔ léé, éé we fé é zua. Yeebozen lé ke dana i ’lɛ miɛ; dé é i ye, a gi é dan nana lɛ. 15I dan we fe lɛ a lɛ yé i dan dérenu pa lɛ a ’léé; yé maa dan kɛlɛ lɛ i ’léé valé a ’léé va, yé we lé ka dan a kɛlɛ lɛ, maa dan a paa lɛ ka gi. 16É dan we fe lɛ munu lɛ i lɛ; é dan kɛlɛ lɛ i ’léé nya i lɛ, yé i dan kɛlɛ lɛ Bale nya a lɛ. 17Tawomayili ’ko lé i dan tɔmasenu kɛlɛ lɛ a nya, ’i goan i lee.
Moizi go Éjipiti tɛrɛ la é ziin
(Mt 2:20–21; WP 17:10–14)
18Moizi go; é bɔ é na ti Jétro va aan wo, é lé a lɛ léé: Ilé zanté, ’i zi nɔ an lɛ, an go an bwenu lé ke Éjipiti tɛrɛ la, wo va, yé dé wa é yuɛmaa? yé maa ye. Jétro lé Moizi lɛ léé: ’I go drɔɔ.
19Gakelebale we fe Moizi lɛ Madian tɛrɛ la yé é léé: ’I go, ’i nɔla i pai Éjipiti tɛrɛ la, naa, munu lé é sɔ wo lɛ léé, ’wo i gyɛ, wo faa ga. 20Moizi é na valé é benu si yé é wo nyana sokofalenu ta yé é go Éjipiti tɛrɛ la. É go Kazambale lé tawomayili nya é lee. 21Gakelebale lé Moizi lɛ léé: I a gona Éjipiti tɛrɛ la sin, amalé we blɛnblɛnnu lé maa wo bɛ pa i lee, ’i gi bɔrɔ wo ma; i dan wo kɛlɛ lɛ Faraɔn yuɛ va. Yé maa dan a bli kɛlɛ lɛ plɛplɛ, yé é ’ka dan daan lɛ munu ma wo go lo. 22I dan a fe lɛ Faraɔn lɛ léé: Gakelebale léma: Izraɛl a ’é be nya, ’élé né vininzan nya. 23É lé i lɛ léé, ’i daan ’é be ma yé ’é é bɔ; dé i ’ka daan a ma lo, ’é dan i be, ilé né vininzan gyɛ lɛ.
24Moizi a ta la bléyian va, fɛana lé wo yii, Gakelebale da Moizi va yé é a a va léé, ’é a gyɛ. 25Séfora gɔlɛfén ’lɛzan do si, yé é be gɔnédɔna kɔlɛ kuru bɔi yé é a vuli Moizi gane ma, a fele nya léé: Nyɛ ma lé i kɛlɛ an zana nya. 26Yé Gakelebale daan a ma, yé gane dɔle we ma lé Séfora a fe léé, nyɛ ma lé i kɛlɛ ’é zana nya.
27Gakelebale lé Arɔn lɛ léé: ’I go Moizi va nyéné saa lé fɛna. Arɔn go; wo kee Moizi nya Bale lé gɔ ma, yé é a tuu gyɛ. 28Gakelebale lé é Moizi nwunvɔ, Moizi ’bɛ dére faa fe Arɔn lɛ, ’bɛ valé tɔmasenu faa lé é Moizi bélidɔ léé, ’é wo kɛlɛ wo nya. 29Moizi valé Arɔn go, yé wo Izraɛl lé nénu lé mi segelenu faa zén ékeva. 30Dére faa lé Gakelebale a fe Moizi lɛ, Arɔn a zuo fe wo lɛ, yé é tɔmasenu kɛlɛ munu yuɛ va. 31Yé munu bli vo a lɛ. Wa ’ma léé, Gakelebale da Izraɛl lé nénu va, yé é wolé nyanéblele ye; yé wo ’wuo tua yé wo dia ’wo bli la.
Currently Selected:
Fwile 4: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
