Fwile 28
28
Balelasɔnu kɛlɛbɛ
(Fw 39:2–31; LvS 132:9, 16; Ébr 7:26–28)
1’I bwe Arɔn valé é benu bié i va, yé ’i wo si Izraɛl lé nénu méléna, yé ’i bɛ pla wo ta wo kɛlɛle balebannyanama pazannu nya an ’lɛ we ma; Arɔn valé é benu Nadab koo, Abiu koo, Éléazaa koo, Itamaa koo, woo lé.
2I dan i bwe Arɔn lé balelasɔnu kini lɛ, a segele gɔɔnle valé a ’lɛrɛle we ma. 3I dan we fe lɛ blabozannu lé, maa ’wuoatawe paa wo gi, wo lɛ; yé wo dan Arɔn lé sɔ kini lɛ, i bɛ plale a ta we gi yé é balebannyanama pa an lɛ. 4Sɔnu lé wo dan wo kini lɛ, wo lé ke ’ko: golɛgiweblefɛ koo, éfɔdi koo, varɔ grɔgrɔ koo, varɔ bɛ grɔgrɔ lé pɛɛ ke é gyɛle a ta koo, nɔɔn koo, a bɔn‐in kunsɔ koo, woo lé. Wo dan balelasɔnu kini lɛ i bwe Arɔn valé é benu lɛ, wolé balebannyanama pale an lɛ we gi. 5Wo dan wo kɛlɛ lɛ kyan koo, sɔnu lé wo yuɛɛ ke glayivayou vale galunaa valé sɔɔn nya, wo koo, lɛnsɔ zima koo, wo nya.
6Wo dan éfɔdi kɛlɛ lɛ kyan koo, lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn koo, a nya; wo dan a yuɛ la gɔrɔla lɛ. 7Wo dan a gɔ fié dɔ lɛ a bɛapanu ta, yé ’bɛ é dan éfɔdi kun lɛ é lɔlu fiénu ma; ’bɛ zo lé é dan a kun lɛ. 8Wo dan a bɔn‐in kunsɔ kɛlɛ lɛ éfɔdi kɛlɛbɛ gi, yé wa pa éfɔdi ta; é dan kɛlɛ lɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya. 9I dan ɔnisigɔlɛ fié si lɛ, yé i dan Izraɛl benu tɔ guru vɔ lɛ wo ta, 10tɔ suiɛdo a gɔlɛ do ta yé tɔ suiɛdo a gɔlɛ koɛ ta, wo yaale yɛrama. 11I dan Izraɛl benu tɔnu guru vɔ lɛ gɔlɛfee fié ta, woo guru vɔa gɔlɛnu valé bɛmazéné ta fɛan zo, a zo; i dan kyan vɔ lɛ wo zi. 12I dan gɔlɛfee fié pa lɛ éfɔdi bɛapa gɔ fié ta, Izraɛl benu seledɔmigifɛ nya, yé a sele ’é dɔ mi gi léé, Arɔn éé goo wo tɔ nya Gakelebale ’lɛ, é bɛapa fié ta. 13I dan wo vɔgikyan kɛlɛ lɛ, 14yé i dan gɔgɔbale kénéné fié kɛlɛ lɛ kyan tegele nya, yé i dan wo tan lɛ bale nya, yé gɔgɔbale kénénénu lé bé tan bɛ, i dan a vɔ lɛ wo vɔgikyan ma.
15I dan golɛgiweblefɛ kɛlɛ lɛ, é ta gɔrɔlale nya; i dan a kɛlɛ lɛ éfɔdi kɛlɛbɛ gi, i dan a kɛlɛ lɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya. 16É dan kɛlɛ lɛ é sun nya, é boro nya é pale; a sangi é dan kɛlɛ lɛ bɛlaa do yé a ’wuola é dan kɛlɛ lɛ bɛlaa do. 17I dan a ’lɛrɛ lɛ gɔlɛwezannu nya, é bale ziɛn nya; a bale vininzan a saadɔanegɔlɛ koo, topazegɔlɛ koo, émérodegɔlɛ koo, wo nya; 18a bale fiézan a ɛsikabuklegɔlɛ koo, safiigɔlɛ koo, diamangɔlɛ koo, wo nya; 19a bale yaazan a opalgɔlɛ koo, agategɔlɛ koo, amétisegɔlɛ koo, wo nya. 20A bale ziɛnzan a krisolitegɔlɛ koo, ɔnisigɔlɛ koo, jasipegɔlɛ koo, wo nya. I dan gɔlɛ ’konu vɔ lɛ ’wo vɔgikyan gi. 21Wo dan kɛlɛ lɛ vu ta fié, Izraɛl benu tɔnu yɛrama; i dan wo ta guru vɔ lɛ bélé bɛmazéné zo, bɛn vu ta fié tɔ a wo ta do do ’é guru vɔle nya. 22I dan gɔgɔbale kénénénu kɛlɛ lɛ kyan tegele nya, yé i dan wo tan lɛ bale nya, golɛgiweblefɛ zé nya. 23I dan kyankpɔwɔlɛné fié kɛlɛ lɛ golɛgiweblefɛ zé nya, yé i dan kpɔwɔlɛné fié ’ko vɔ lɛ golɛgiweblefɛ san fié ta. 24I dan kyanbale fié vɔ lɛ kpɔwɔlɛné fié gi golɛgiweblefɛ san fié ta; 25yé i dan kyanbale fié zɔ polu dɔ lɛ wo vɔgifɛ fié lé, bé pla éfɔdi bɛapa gɔ fié ta, wo ma. 26I dan kyankpɔwɔlɛné fié kɛlɛ lɛ é ziin, yé i dan wo vɔ lɛ golɛgiweblefɛ wuozan lé ke éfɔdi ma zia, a sun fié ma. 27Yé i dan kyankpɔwɔlɛné fié kɛlɛ lɛ é ziin, yé i dan wo vɔ lɛ éfɔdi lé bɛapa gɔ fié wuo, a ’lɛ zia, fɛ vɔle é ke ’lééna sɔnɔ, éfɔdi lé bɔn‐in kunsɔ ta loru. 28I dan glayivayou bale polu dɔ lɛ golɛgiweblefɛ lé kpɔwɔlɛnu valé éfɔdi lé kpɔwɔlɛnu ma, golɛgiweblefɛ kɛlɛle éfɔdi lé bɔn‐in kunsɔ ta loru we ma, yé é ’ka sié éfɔdi ta lo. 29Dé Arɔn wɔra fɛna sauun na, ’té éé goo Izraɛl benu tɔnu nya é bli ta, ’té wo guru a é vɔle a golɛgiweblefɛ ta, yé wo kɛlɛ wo sele?-?dɔfɛ nya lɛɛfaama Gakelebale gi. 30I dan urim valé tumim pa lɛ golɛgiweblefɛ ma, yé dé Arɔn go Gakelebale ’lɛ, ’té wa a bli ta. ’Bɛ zo lé, dé Arɔn go Gakelebale ’lɛ, ’té éé goo Izraɛl lé nénu lé weblele nya é bli ta yifaama.
31I dan éfɔdi lé varɔ kini lɛ glayivayou sɔ tegele nya. 32I dan a ’léé pa lɛ a méléna, a ’wuo wɔrale a gi we ma; yé i dan sɔbɛ tanle béé lɛ a lɔlu ’léé, bélé gulidanvarɔ ’léé zo, té varɔ é fia lo we gi. 33Grénadéyili poro foto lé wo yuɛɛ ke glayivayou valé galunaa valé sɔɔn, i dan wo dɔ lɛ varɔ ’léé, ’té i wo vɔɔan kyanpannénu nya; 34kyanpanné do, grénadéyili poro do, kyanpanné do, grénadéyili poro do, bé diri varɔ lɔlu faa zi. 35Dé Arɔn go élé nyanama pa lɛ, é dan varɔ ’ko zén lɛ ’é ta, munu lé kyanpannénu vun ’male we ma; dé é wɔra fɛna sauun na Gakelebale ’lɛ, dé é bɔra ana, ’té wa gi maan; ’bɛ zo lé, Arɔn ’ka gaan lo.
36I dan kyan tegele gyɛ lɛ lɛlɛné, yé i dan a ta guru vɔ lɛ bélé bɛmazéné ta guru vɔle zo, léé, Gakelebale sauun zé lé. 37I dan a yere lɛ glayivayou bale nya nɔɔn ma, é ’lɛ zia. 38É dan kɛlɛ lɛ Arɔn yarapɛla; yé wenyanénu lé Izraɛl lé nénu a kɛlɛ, Arɔn é dan wo faa kɔné si lɛ, wolé saraka sauunnu faa bole nya; kyan lɛlɛné é dan kɛlɛ lɛ a yarapɛla Gakelebale ’lɛ, alé wolé we nyi sile we ma.
39I dan varɔ bɛ grɔgrɔ kɛlɛ lɛ lɛnsɔ zima nya; i dan nɔɔn kɛlɛ lɛ lɛnsɔ zima nya, yé i dan bɔn‐in kunsɔ kɛlɛ lɛ, ’té pɛɛ a a ta é gyɛle.
40Varɔ bɛ grɔgrɔnu koo, bɔn‐in kunsɔnu koo, sɔ koronu koo, i dan wo kɛlɛ lɛ Arɔn benu zé nya, wo segele gɔɔnle valé wo ’lɛrɛle we ma. 41I dan wo zen lɛ i bwe Arɔn valé é benu ta. I dan nyɔnɔ zén lɛ wo nwiin, i dan bɛ pla lɛ wo ta, i dan wo pa lɛ é yɛrama Bale zé nya, yé wo dan kɛlɛ lɛ balebannyanama pazannu nya an lɛ. 42I dan wolé kyɛkoto kini lɛ lɛnsɔ nya, té wo vo é porole lo we gi; é sia wo gyɛn fɔɔ yé é bɔ wo boro yuɛ la. 43Dé Arɔn valé é benu wɔra zén‐ékevasɔkɔn gioo, dé wo bié balebanna ma wolé nyanama pale we gi fɛna sauun naoo, wo dan wo zén lɛ ’wo ta; ’bɛ zo lé we ’ka é dɔle wo nwiin lo, yé wo ’ka gaan lo. We ’ko a bélidɔwe lé a glɛ ’ka lo, a nya, Arɔn valé é kulunu lé wo dan kɛlɛ lɛ a zuo, wozé nya.
Currently Selected:
Fwile 28: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
