Bélidɔwesɛbɛ Fiézan 23
23
Munu lé é a lé wo wo bin munu va
(Lév 21:17–23; Mi N 5:1–4; Néé 13:1–9)
1Mi lé a wuofɛ ’wii koo, mi lé wa ’lɛ bɔi koo, té ’wo wɔra Gakelebale lé zén‐ékeva na lo. 2Té bwɛlané é wɔra Gakelebale lé zén‐ékeva na lo, fɔɔ yé é bɔ wo kulu vuzan ma, té ’wo wɔra ana lo. 3Amɔn mi valé Moab mi, té ’wo wɔra Gakelebale lé zen‐ékeva na lo, wo kulu vuzan‐oo, lɛɛfaama oo, té ’wo wɔra lo; 4dé ka fwi Éjipiti tɛrɛ la bléyian va, dé ka a dana zia, wo ’ka da lɛ ’yi valé fɛ nya ka lɛ lo, bɛwemalé té ’wo wɔra lo. Yé é ziin, Béɔɔ be Balaam lé é si Pétɔɔ, Mézopotami tɛrɛ la, wo gɔɔli nɔ ’bɛ lɛ léé, ’bɛ é bale pa ka ma, ’bɛ we ma é ziin, té ’wo wɔra lo. 5Naa, Gakelebale, kalé Bale ’ka tɔné dɔ lɛ Balaam dére lɛ lo; ka sɔ Gakelebale, kalé Bale lɛ, bɛwemalé é balepale nɔla ka ma drɔɔvole nya. 6Té ka wo kɛlɛle mi nya valé wolé we zin yele gi bɔrɔ pa kalé tɛrɛla faa gi lo, lɛɛfaama a glɛ ’ka lo. 7Té ka léabo Édom mi ma lo, é a ka bwe nya, ’bɛzama; té ka léabo Éjipiti mi ma lo, ka kɛlɛ bɛn nya é vinin alé tɛrɛ la, ’bɛzama; 8wo kulu yaazan é bɔa wɔrale lɛ Gakelebale lé zén‐ékeva na.
Bélidɔwe bɛnu
9Dé ka a gulidanna ka nyanézannu va, ’ka yuɛ pa kabozen va wenaané faa ma. 10Dé gɔné do a ka va, yé é gɔné nyɛ gy’ɛ é béli, bɛwemalé é ’ka tegele lo, é a lé é si fla, té é da fla lo; 11nyanadi bléyi va, ’é zuru yé yiri vɔle zuo é dan da lɛ fla. 12Ka fɛ dona kɛlɛ sɔkɔn dɔna zuo, yé ’bɛna lé ka dan go lɛ vɔ lɛ luva. 13Guruboyili ’é kɛlɛ kalé kɔné va, kalé vɔluvafɛ nya, yé ’ka guru bo yé ’ka bowo a gi yé ka tɛrɛ zén a ta. 14Naa, Gakelebale kalé Bale a tawona ka va, ka takuunle valé ka nyanézannu pale ka lee we gi; bɛwemalé é a lé kalé fla ’é kɛlɛ é zima, té Gakelebale é fɛ tiridɔle do kpen ye ka va lo, dé é da si ka va.
15Dé luu do vlan buru ézan lee yé é da vɔ lɛ i zi, té bé nɔ ézan lɛ lo. 16É dan nyana lɛ ka va, ka méléna, dé fɛana sɔ a lɛ, ana, dé é dɔ a gi léé, kalé fla‐an ke é zima ézé nyaoo, ’é nyana ana. Té ka yaa a ta lo.
17Té Izraɛl le do kpen é kɛlɛ bɔrɔdɛ le nya lo; té Izraɛl gɔné do kpen é kɛlɛ bɔrɔdɛ gɔné nya lo.
18Dé i a bale kunle lɛ sɔɔna, dé bɔrɔdɛ ma gɔɔli léé, dé blen ma gɔɔli léé, ’bɛ gi lé bɔrɔdɛ gɔné, té i da ’bɛ nya Gakelebale, kalé Bale lé kɔn gi lo. Wo fiénu a bélé bo zo Gakelebale, kalé Bale yuɛ gi.
19Dé é a gɔɔli nyaoo, dé é a fɛblele nyaoo, dé é a fɛofɛan nya yé wa drɔn paan mi ma a taa vɔle a zuo we ma, a nyaoo, té bé drɔn pa i bwe ma a taa vɔle a zuo we ma lo. 20A se a i lɛ léé, dé é a bɛn nya, ’bɛ a vɔ zuo i lɛ, naa, té i bwe a taa vɔ a zuo i lɛ lo. Dé ka kɛlɛ a zo, we faa lé ka kɛlɛ, tɛrɛ lé ka dan a si lɛ kazé nya bɛ, a ta, Gakelebale, kalé Bale é dan ka drɔɔ vo lɛ.
21Dé i Gakelebale, kalé Bale kun we do gi, té i mɔn a lɛsɔɔna lo; naa, Gakelebale, kalé Bale é dan a laa lɛ i lee, yé i dan wenyané dɔ lɛ ibo nwiin. 22Naa, dé i ’ka bale kun lɛ lo, ’té we ’ka i nwiin lo. 23Dé i Gakelebale, ilé Bale kun ilé blibɔmale nya, we lé é bɔra i ’léé yé bé fe, ’bé ta tawo yé ’bé lɛ sɔɔ.
24Dé i go i bɔluzan lé dɔrɔféi, a se a i lɛ léé, bé poro ble yé i kan, naa, té bé poro pa kana gi lo. 25Dé i go i bɔluzan lé ’saféi, a se a i lɛ léé, bé nɛnɛ kini i bɛ nya, naa, té i i bɔluzan lé ’sa gyɛ kɔblané nya lo.
Currently Selected:
Bélidɔwesɛbɛ Fiézan 23: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
