2 Timoté 2
2
Kɛlɛle Jézu Krist lé sunya zin nya
(Mt 10:32–33; 1 Kor 9:24–27; Wg 2:10)
1Bɛwemalé, bii anlé né, zin lé ke Jézu Krist gi, ’é i dɔ plɛplɛ ma. 2Yé we lé bé ’ma an ta wenayemunu kiɛre yuɛ va bɛ, ’bé bɛ pa yarapawelazannu lee, munu lé woo bɔa a paale lɛ mi bɛnu gi, wo lee. 3’I nyané ble an va bélé Jézu Krist lé sunya zin zo. 4Sunya ’ka vɔɔma tɛrɛlawenu gi lo, ’té dé é sɔ a lɛ léé, élé we é sɔ é nwiinzan lɛ. 5Dé zakɛlɛzan ’ka za kɛlɛ lɛ é kɛlɛbɛ gi lo, wo ’ka tɔkoro wɔraan a ’wuo ma lo. 6Féipazan lé éé nyanama paan, é a lé yee lé é fɛ si élé féi é vinin. 7We lé maa a fena i lɛ, ’bé bɔrɔ i bɔn‐in, yé Mizan é dan we faa ginin dɔ lɛ i gi.
8Jézu Krist lé wa yaa David kululazan nya, yé é nwa gamunu va Wenéné lé maa alé we fé, a yɛrama, a sele ’é dɔ i gi ma. 9An nyané ble alé we ma fɔɔ yé wo an yere bélé wenyanékɛlɛzan zo. Naa, Kazambale dére ’ka é yerele lo. 10Bɛwemalé an ’wuo dɔa we faa wuo munu lé Bale wo si a va, wolé we ma, léé, sile we gi lé é ke Jézu Krist gi, é valé fua lé é ’ka nyaan lo, wo é ziin, ’wa ye. 11We ’ko a wegɔné nya: dé ko ga a va, ko dan nwa lɛ é ziin é yuɛma a va; 12dé ko yara pa alé we kɛlɛle ta, ko dan pla lɛ munu nwiin a va; dé ko sɔn vɔ a ma, yee é ziin, é dan sɔn vɔ lɛ ko ma. 13Dé ko yuɛgi blan a ma, a yuɛgi ’ka blaan ko ma lo, naa, é ’ka bɔaléé, é sɔn vɔ ébozen ma lo, azama.
Nyanamapazan lé wa gi dan
(Jn 5:19–20; Ti 2:11–15)
14’I we ’ko sele dɔ munu gi, we plale wo lɛ plɛplɛ nya Kazambale yara léé, té wo zavɔ dére gɔ do do ta lo. A tɔnɔ ’ka lo, yé munu lé wa maan, éé wo ’wuo sɛra. 15’I kwa kuli ibo ma dɔle Kazambale ’lɛ we ma, mian wa gi dan, a nya, nyanamapazan lé yara ’ka a gya lo, ’té éé webozen dére fé tegeleee, a nya. 16’I paa tɛrɛla boawenu fele ma, naa, munu lé woo wo fé, wolé Kazambale lé zi sɔnɔwe gi é dan gyɛ lɛ yifaama, 17yé wo dére é dan nwɛɛn lɛ bélé migyɛgyɛ zo. Iméné valé Filɛt a munu ’konu vamunu nya. 18Wo yara si webozen ta, yé wo léé, mi galenu nwa é kwakwa, yé wo mi kenu lé blipale gi sɛrɛ. 19Kazambale lé wegane a é vɔle gligli duowo; naa, a dɔgligli dérenu lé ke ’ko: munu lé wo ke Mizan zé nya, é wo dɔɔ; yé mian éé Mizan tɔ laan, ’é daan weple ma ma.
20Kɔn blɛn gi, kyanbɔ valé gɔɔlifu?-?bɔ saa‐an ke ana lo, naa, yili lé wa nyaa bɔ nya, yee valé tɛrɛbɔ ana é ziin. A kenu a tɔbɔbɔnu nya, yé a pɔnénu a fɛ lɛrɛlɛrɛ zén‐agibɔnu nya. 21Bɛwemalé, wenaanénu lé maa wo zuo fe bɛ, dé mian é wo si é gi yé a gi bɔ, é dan kɛlɛ lɛ bélé tɔbɔbɔ sauun zo, yé azan é dan tɔnɔ ye lɛ a ma, ’té é bɔalɛ léé, é nyanama zin faa pa a nya.
22Wenu lé a lɔrɔ éé pɛniɛnu gya kaii bɛ, té wo lɔrɔ i gyɛ lo. Kɛlɛle tegele koo, blipale koo, sɔlɛle koo, vole drɔɔ koo, munu lé woo Mizan tɔ laan wo bɔn gi fu nya, wa kwa kulina wo yele we ma. ’I pa wo va yé ’ka kwa kuli wo nya. 23Zavɔwe planu lé é ke tavowenu nya bɛ, ’i sɔn vɔ wo ma. Bé gi dɔɔ léé, woo ɛ dan wesialenu nya. 24Naa, té Mizan wuozan é we sia lo. ’É kɛlɛ blidrɔɔzan nya mi faa va ma. É a lé é kɛlɛ mi lé éé we paan munu gi é zua, a nya; a bli ’é kɛlɛ tiéé ma. 25Munu lé woo za vɔa a lɔ ma, é a lé é we pla wo lɛ bli drɔɔ nya, ’té a bli a a lɛ léé, Kazambale é dan wo bli nɔla lɛ yé wo webozen dɔɔ, 26yé dé wo ’wuo dɔ wo ta, yonufaatagɔné lé é wo kun wo plale élé blibɔmawe wuo we ma bɛ, yé wo si alé mikunsannu ’léé.
Currently Selected:
2 Timoté 2: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
