2 Korɛnt Munu 8
8
Blɛ kɛlɛle
(Mk 12:41–44; Kw 11:27–29; Rom 15:25–27)
1Bwenu, zin lé Kazambale a kɛlɛ Masédɔane léglizigimunu lɛ, é sɔ ko lɛ léé, ko a zuo fe ka lɛ. 2Nyanénu lé wa ble, é wo gi dan é baba; naa, duowo, wo gi nana yé é gié é glɛ la, ’té woo blɛ kɛla mi kiɛre lɛ dɔlé ’té nyané wobozen gyɛ. 3Maa wo mawe zin fe ka lɛ léé, wo fɛ nɔ wolé fɛyebɛ yɛrama bli drɔɔ nya yé wa taa pa é ziin, 4yé wo zanté vɔ ko lɛ gɔnɔ kiɛre nya léé, ’ko zi nɔ ’wo lɛ yé blɛ ’ko lé Krétiɛnnu a gona a kɛlɛna Kazambale lé munu lɛ, ’wo ’wozé pa a va. 5Fɛ lé ko bli a wo lɛ léé, wo dan a nɔ lɛ, wa gié ’bɛ la, naa, wo ’wobozen nɔ Mizan lɛ é vinin, yé ’bɛ zuo wo ’wobozen nɔ ko lɛ, Kazambale lé blibɔmawe yɛrama.
6Bɛwemalé, nyanama zima lé Tite a pale sia ka méléna, ko a lɛsɔɔle bɛ pa a lee. 7Ka bli a é pale, ka Bale dére fé é zima, ka we dɔɔ, ka we kɛla ka fuu nya ka ta, ko va sɔlɛle a ka gi blɛn, amalé we kɛlɛle zin ’ko, é a lé ka tɔ é bɔ ’bɛ gi é ziin. 8Maa ’ka ’bɛ fena bélidɔwe nya lo, naa, mi bɛnu lé wo fuu ke wo ta, maa dan kalé sɔlɛle gi dan lɛ wo nya, amalé maa fé. 9Ka Kaazan Jézu Krist lé zin dɔɔ; yee lé ke fuablezan nya, é ’ébozen kɛlɛ nyanégyɛzan nya kalé we ma, léé, alé nyanégyɛle gi ka kɛlɛ fuablezannu nya. 10We ’ko a é zima kazé nya, amalé maa a we ’ko plana ka lɛ é wo. A lɛɛ do lo, é dɔ ka gi léé, ’ka we zin ’ko kɛlɛ, yé ka a pélisia é vinin mi bɛnu ’lɛ. 11Amalé sin, ’ka a lɛ sɔɔ ma. Ka pélisia bli zin nya fɛan zo, ’ka a ’wuo pla a zo, fɛ lé ke ka lee, a yɛrama. 12Dé bli zin a mi gi Bale alé blɛ sié a leefɛ yɛrama. Dé fɛ ’ka mian lee lo, Bale ’ka a fe lɛ léé, ’bɛzan ’é fɛ nɔ lo. 13É ’ka sɔ lɛ an lɛ léé, blɛ kɛlɛle mi bɛnu lɛ lé we ma ka kɛlɛ nyanégyɛzannu nya lo, naa, é sɔ an lɛ léé, kalé fɛnu é bɔ ékema. 14Bléyi ’ko va, fɛ kiɛre a ka lee, amalé ’ka bɔ wo va yé wo we si ’wo ma a nya, yé yi bɛ nya dé fɛ kiɛre a wo lee, yé wo é bɔ ka va yé ka we si ka ma, yé ’bɛ zo lé kalé fɛnu éé bɔa ékema, 15bélé fɛan zo lé wa gyɛ sɛbɛ gi, a zo. Wo léé: Mi lé é a sia kiɛre, éé a nyaan ’kyɛ, yé mi lé é a sia sɛ, éé kaan.
Tite valé é bɔluzannu
(1 Kor 16:1–4)
16Maa Kazambale bɔ vɔ léé, we lé ke an gi ka vazia, Kazambale yee we duo dɔ Tite gi é ziin. 17We lé maa a pla a lɛ, é a nyi si, yé é a gona ka va ébo ’wuoi, é fuu nya é ta. 18Bwe do lé léglizigimunu faa a tɔ zin fé alé Wenéné fele we ma, ko a pana zia é ziin Tite va. 19Léglizinu a si a va léé, ’é kɛlɛ ko bɔavazan nya wezin ’ko kɛlɛle we gi. Ko a we ’ko kɛlɛna Mizan bozen tɔbɔle we ma, é valé ko bli zin nagɔɔnle we ma. 20Ko a kɛlɛna a zo léé, té mi do é we dɔ ko nwiin, blɛ blɛn ’ko lé é ke ko lee, a we ma lo. 21Ko a kwa kulina léé, we lé ke tegele Mizan valé munu yuɛ gi, ko ’bɛ kɛlɛ. 22Ko bwe do lé, ko fuu ye a ta gɔnɔ kiɛre, ko a pana zia wo va, yé a fuu é dan kɛlɛ lɛ a ta we ’ko gi é ziin kaii, a bli a ka lɛ é baba, azama. 23Dé é a Tite nya, é a an bɔluzan valé anlé nyanamapa béé nya, kalé we ma. Dé é a ko bwenu nya, wa léglizinu lé nwunvɔzannu nya, yé wa Krist lé fua nya. 24Amalé ’ka a gɔɔn léglizigimunu lɛ léé, bwenu ’ko, wo sɔ ka lɛ, yé té kobo ze vɔle ka tɔ gi é kɛlɛ boawe nya lo ma.
Currently Selected:
2 Korɛnt Munu 8: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
