2 Korɛnt Munu 6
6
1Ko a Kazambale va nyanamapa béénu nya, bɛwemalé ko we plaan ka lɛ léé, Kazambale lé zin lé ka ye, té é vo ka ma é pla lo. 2Naa, é léé:
Bléyi zin nya maa i dére ’ma,
Yé siéwegi yi nya an bɔ i va.
Bé ye, bléyi zin lé é ke lao ’ko, yé siwegi yi zin lé é ke lao ’ko. 3Ko ’ka misaanwe do kpen kɛla monomono lo, té wo we dɔ Bale va nyanama nwiin lo we gi. 4-5Ko kle ble, fɛ nyaan ko lee, ko nyané ble, wo ko bla, wo ko vɔ bokɔn gi, flamunu nwa ko ma, ko nyanama pa, ko vo é vuole é béli, ko lɔrɔ sɔn. We ’konu faa gi, ko bli kɛlɛ tiéé é baba yé kobo gɔɔn Kazambale wuomunu nya. 6Kobo gɔɔn a nya é ziin, kɛlɛle sauun koo, wedɔɔle koo, bli tiéé koo, wezin kɛlɛle koo, Léli Sauun koo, lɔrɔpale bozen koo, 7webozen dére koo, Kazambale lé plɛplɛ koo, we tegele lé é ke gulidanfɛnu valé mi botakuunfɛnu nya, ’bɛ koo, wo nya. 8Dé wonɔ ko tɔ bɔa, ’té woo yaragyɛwe bɔa ko ma. Dé wonɔ ko tɔ zin fé, ’té woo ko tɔ sɛra; woo ko yé bélé dabli kɛlɛzannu zo, dɔlé ’té ko a wezin fezannu nya; 9woo ko yé bélé wo ’ka ko dɔɔa lo, dɔlé ’té wo ko dɔɔ; woo ko yé bélé ko a gana, dɔlé ’té ko a é yuɛma; woo ko yé bélé ko a welɛdɔgizannu nya, dɔlé ’té wo ’ka tan ko gyɛ lɛ lo; 10woo ko yé bélé ko a bligikyɛdɔzannu nya, dɔlé ’té ko gi a é nanale yifaama; woo ko yé bélé nyanégyɛzannu zo, dɔlé ’té ko fuafɛnu nɔ mi kiɛre lɛ; woo ko yé bélé fɛ do kpen ’ka ko lee lo, dɔlé ’té fɛ faa a ko lee.
11Korɛnt munu, ko we faa fé ka lɛ; ko bli a ka va do. 12Ka va sɔlɛle a ko gi blɛn; kabo bli gi lé ka ke é tunule. 13Maa we fé ka lɛ bélé maa a we fena anlé nénu lɛ fɛan zo, a zo, kanu é ziin, ka bli ’ka kɛla ko va do loo?
Ka a Bale yuɛmale lé kɔn nya
14Munu lé wo bli ’ka é pale lo, ka valé woonu ’ka é bɔle ékema lo. Yili lé ka valé mi ’ka é bɔle ékema a kɔné sina lo, té ka valé ’bɛzan é dɔ a wuo lo. We tegele valé weple éé sɔaa? Fɛna fu valé gunuti éé nanaan? 15Krist valé Bélial dére éé sɔa doo? Mi lé a bli ’ka é pale lo, ’bɛ éé dɔa blipazan lé we gii? 16Kazambale bangikɔn valé miyilinu, ’bɛnu éé nanaan? Naa, ko a Bale yuɛmale lé kɔn nya, bélé fɛan zo lé Kazambale a fe, a zo. É léé: Maa dan nyana lɛ wo va, yé maa dan tawo lɛ wo méléna; maa dan kɛlɛ lɛ wolé Bale nya, yé wo dan kɛlɛ lɛ anlé munu nya. 17Bɛwemalé Mizambale léma:
’Ka si wo méléna; ’ka kini wo nya ékema,
Fɛ lé é ’ka sauun lo, té ka mane a ma lo;
Yé maa dan ka si lɛ.
18Yé maa dan kɛlɛ lɛ ka Ti nya,
Yé ka dan kɛlɛ lɛ an benu valé an lunu nya.
Yee lé Mizambale Plɛplɛfaazan a fe.
Currently Selected:
2 Korɛnt Munu 6: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
