1 Korent munu 4
4
Nwunvɔzannu lé nyanama
(Rom 14:10–12; 2 Kor 6:4–13; Fil 2:19–22)
1Munu ’é ko ye Krist wuozannu valé a bɛgizannu lé wo ke Kazambale lé weyɔɔlenu gi bɔrazannu nya, wo nya ma. 2We lé é sɔ mi lɛ léé, é bɛgizan a kɛlɛ, yee lé ke léé, ’é yara pa we la. 3Maa ’ko, dé é a ka nyaoo, dé é a weblezannu nyaoo, dé ka anlé we ble, ’bɛ ’ka we do nya lo. Maa ’ka anbo lé weblezan nya lo; 4naa, maa ’ka we do yé an saanwe nya an bli gi lo. Bɛwemalé maa a tegelee? Gba! Mizan ɛ anlé we blé. 5Amalé maa léé, té ka we do kpen ble a blebléyi ’lɛ lo, fɔɔ yé Mizan ’é da. Wenu lé é ke é yɔɔle gunutinu va, yee ɛ dan wo bɔra lɛ san va. Yee ɛ dan mi bɔngiwenu bɔra lɛ munu yuɛ va. Yé munu lé wo tɔ zin fe yara lé, Kazambale é dan wo tɔ zin fe lɛ.
6Bwenu, kalé we ma lé maa we ’konu dan maa valé Apolɔs ma, we paale ka gi we ma léé, té ka gié we lé wa gyɛ sɛbɛ gi, a ta lo; té ka kabo kɛlɛ blɛn mi do tɔ gi lo, ’té ka sɔn vɔa mi do ma lo. 7De ɛ i kɛlɛ é yɛrama mi pɔnénu vaa? Mɛ fɛ lé bé ye iboaan? Yé dé mi bɛ a nɔ i lɛ, mɛmalé ibo ze vɔa, bélé fɛan zo lé bé ye iboan, a zoo?
8Ka kan tɛkɛɛ? Ka fua ble tɛkɛɛ? Ko ’ka ka va lo yé ka plale sia munu nwiin? Eɛ, ’ka pla munu nwiin webozen nya ma, ko é ziin, ko plale munu nwiin ka va we gi. 9É dɔ an gi léé, ko lé ko ke nwunvɔzannu nya, Kazambale ko kɛlɛ mi voélazannu nya bélé munu lé wo dan wo gyɛ lɛ, wo zo. Ko kɛlɛ zanagyɛmafɛ nya fɛyuɛmalenu faa yuɛ va, ’bɛ gi léé, lanjenu valé munu yuɛ va. 10Krist lé we ma lé ko a ’tugyɛzannu nya, naa, ka a wedɔɔzannu nya Krist gi. Ko a tɔɔtɔɔ, yé ka a plɛplɛ. Ka a lɛamazannu nya, yé ko a mi boanu nya. 11Fɔɔ bléyi ’ko va, ko vo nyané blena lɔrɔ koo, ’yiminilɔrɔ koo, porole koo, wolé we ma, ’té wo ko blaan, ’té ko nyanana tegele ’ka lo; 12’té ko wɔlɛgi éé nyaan ko ma nyanama pale nya ko bɛ nya. Woo ko sɔnɔan, ’té ko wo drɔɔ voo; woo nyané paan ko ta, ’té ko ’wuo dɔa ’bɛ wuo; 13woo ko tɔ sɛra, ’té ko wo tɔrɔ paan. Ko kɛla bélé tɛrɛ la fɛtiridɔlenu zo, bélé bli zo mi faa yuɛ va fɔɔ kyɔ.
14Maa ’ka we ’konu gyɛna ka lɛ yara nwɛnnwɛnné nya lo; ka a anlé blibɔmanénu nya, amalé maa we plaan ka lɛ. 15Munu lé woo we paan ka gi, dé wo kɛlɛ mi baa soru nyaoo, ka ti a do kpen duowo. Maa ɛ ka yaa Krist gi Wenéné fele nya. 16Bɛwemalé, an zanté vɔ ka lɛ léé, ’ka kɛlɛ an zuosonazannu nya ma. 17Bɛwemalé maa Timoté nwunvɔ ka lɛ, yee ɛ ke anlé blibɔmané nya; é a yarapawelazan nya Mizan gi; anlé Krist gi tawobɛ lé maa paan munu gi léglizinu faa gi, é dan a sele dɔ lɛ ka gi.
18Mi kenu wobo kɛlɛ blɛn, bélé fɛan zo lé maa ’ka dan go lɛ ka va lo, a zo. 19Naa, dé é sɔ Mizan lɛ, an dan go lɛ ka va lao bɛ, yé maa ’ka dan boblɛnzannu dérenu ’ma lɛ lo; wolé plɛplɛ lé maa dan a nagini lɛ. 20Naa, Kazambale plale mi nwiin ’ka mi ’léé dére nya lo; é a plɛplɛ nya. 21Mɛ fɛ ɛ sɔ ka lɛɛ? ’An go ka va plén nya laa, taa, ’an go ka va lɔrɔpale valé bli drɔɔ nyaa?
Currently Selected:
1 Korent munu 4: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
