1 Korent munu 2
2
Krist gyɛle yiliblan ta wefele
(2 Kor 4:5–7)
1An bwenu, dé é a maa nya, dé an go ka va Kazambale lé weyɔɔle fe lɛ ka lɛ, maa ’ka a fe lɛ dére zinnu valé wedɔɔdérenu nya lo. 2Naa, é a an gi é zima léé, bléyian va lé maa ke ka va, Jézu Krist lé wa gyɛ yiliblan ta, maa yee do kpen ɛ dɔɔ, maa ’ka we bɛ dɔɔa lo. 3Maabozen, dé maa a ka va, maa a tɔɔtɔɔ, ’té an kanaan, ’té gligli éé zén‐é an gi é baba. 4Maa ’ka we paa lɛ ka gi yé an Bale dére fe ka lɛ blami lé wedɔɔdére nya lo, naa, maa ka bɔn‐in kini Léli Sauun lé plɛplɛ nagɔɔnle nya, 5léé, té ka bli é vo munu lé wedɔɔle lɛ lo, naa, ka bli é vo Kazambale lé plɛplɛ ɛ lɛ.
Kazambale Léli lé we nagɔɔnle
(Jn 16:13–15; Éf 3:2–11; 1 Jn 2:20, 27)
6Naa, duowo, ko wedɔɔdére fé munu lé wo bɔ baa Bale lé we gi, wo lɛ. É ’ka bléyi ’ko va wedɔɔle nya lo, yé bléyi ’ko va minwiinzannu lé, wolé we é dan nyaa lɛ lao bɛ, é ’ka wolé wedɔɔle nya lo. 7Kazambale lé wedɔɔle lé ke givuruwe yɔɔle nya, ’té Kazambale a ma’lɛrɛ tɛrɛ bɔrale ’lɛ, ko tɔbɔle we ma, yee lé ko fé. 8Tɛrɛ la ’ko minwiinzannu ’ka wedɔɔle ’ko gi ’ma lɛ lo. Dé é vo léé, wa gi ’ma kɔɔn, ’té wo ’ka Fuasanzan gya yiliblan ta lo. 9’Ko zo lé é a é gyɛle Bale lé sɛbɛ gi:
Fɛnu lé mi ’ka tan a ye lɛ é yuɛ nya lo,
Wenu lé mi ’ka tan a ’ma lɛ é tɔné gi lo,
É valé wenu lé mi ’ka tan boenwo é bɔn‐in bɔrɔ lɛ a ma lo,
Woo lé Kazambale wo ma’lɛrɛ, munu lé Kazambale sɔ wo lɛ, wozé nya.
10Naa, Kazambale kaa bɔn‐in kini é Léli nya, yé kaa a dɔɔ. Kazambale Léli éé we faa gi maan. Dé é a Kazambale lé wewɔlɛ ma nyaoo, éé a gi maan. 11Dé é ’ka mibozen léli lé é ke ’é gi, a nya lo, munu va mi kyɛn ɛ mi giwe dɔɔ? A zo duo lé mi do kpen ’ka Kazambale giwe gi maan lo, ’té dé é ’ka Kazambale bozen Léli nya lo.
12Dé é a kaa nya, léli lé kaa a ye, é ’ka tɛrɛlamunu léli nya lo, naa, léli lé éé sié Kazambale va, yee lé kaa a ye, wenu lé Kazambale a nɔ kaa lɛ élé zin lé we ma, wo dɔɔle we ma. 13Ko ’ka a fé tɛrɛlamunu lé wedɔɔdérenu nya lo; naa, dérenu lé Kazambale Léli a paan ko gi, wo nya lé ko fé, ’té ko léliwenu gi fé lélimunu lɛ. 14Naa, blami pla ’ka Kazambale Léli lé wenu gi maan lo, wa a yuɛ gi tavowe nya. Mi éé wo gi maan Bale Léli nya, amalé blami pla ’ka wo gi maan lo. 15Naa, lélimi zé a é yɛrama; éé we faa gi bɔié é bɔina, dɔlé té mi do kpen ’ka léli mi lé we gi bɔina dɔɔa lo. 16Weboen lé Kazambale lé sɛbɛ a fe léé:
De ɛ Mizan lé gibɔrɔle dɔɔ
We paale a gi we maa?
Naa, Krist valé kaanu lé ’wuogibɔrɔ?-?bɛ a do.
Currently Selected:
1 Korent munu 2: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
