1 Korent munu 15
15
Krist nwale
(Mt 28; Mk 16)
1Bwenu, Wenéné ’ko lé maa a fe ka lɛ bɛ, yee lé ka a nyi si, ’té ka a é dɔle a gi gligli, 2’té ka si we gi a nya bɛ, maa a sele dɔa ka gi. Wenéné lé maa a fe ka lɛ bɛ, ka a kɛlɛna a yɛramaa? Dé ’bɛ kaan lo, ’té kalé blipale a we pla nya.
3We bɛnu faa ’lɛ, wean wa paa an gi, yee lé maa a paa ka gi, yee lé ke léé: Krist ga kaalé we ma Bale lé sɛbɛ yɛrama; 4wa pa, yé é nwa gale va a yi yaazan nya, Bale lé sɛbɛ yɛrama; 5yé é bɔra Séfa yuɛ va, ’bɛ zuo yé é bɔra mi vu ta fié yuɛ va. 6’Bɛ zuo yé é bɔra bwenu lé wo ’léé gié mi wuru fié yɔ soru ta, wo yuɛ va bléyi do nya. Wo va mi kiɛre a tan é yuɛma, yé wo va mi kenu ga. 7’Bɛ zuo yé é bɔra Jak yuɛ va; a zuo yé é bɔra nwunvɔzannu faa yuɛ va. 8É voéla é bɔra an yuɛ va dɔlé ’té maa a bélé né lé wo ’ka a yaa lɛ né yaabɛ tegele nya lo, a zo. 9Naa, maa a nwunvɔzannu va mi kiéné nya; an nyané pa Kazambale lé léglizigimunu ta, amalé a yara ’ka an yara léé, wo an laa nwunvɔzan lo. 10Maa ke fɛan nya ’ko, Kazambale lé zin ɛ an kɛlɛ a nya. Yé Kazambale ’ka élé zin sɛrɛ lɛ an ma lo, naa, an nyanama pa é baba, é mini wo faa ta. ’Té é ’ka maabozen nya lo, naa zin lé Kazambale a kɛlɛ an lɛ, yee lé. 11Naa, dé é a maa nyaoo, dé é a wo nyaoo, we lé ko faa a fe, yee lé é ke bɛ; yé ka bli a yee ɛ lɛ.
12Yé dé ko fe léé, Krist nwa gale va, é kɛlɛ kaa yé ka va mi kenu léé, mi ’ka nwaan gale va loo? 13Dé mi ’ka nwaan gale va lo, ’té Krist é ziin, é ’ka nwa lɛ gale va lo. 14Yé dé Krist ’ka nwa lɛ gale va lo, ’té kolé alé we fele kɛlɛ we pla nya; ’té ka bli vole a lɛ kɛlɛ we pla nya é ziin, 15’té ko viéwo Kazambale ma é ziin. Naa, ko we fe léé, Kazambale Krist nwa gale va. Dé gamunu ’ka nwaan lo, ’bɛ gi léé, Krist é ziin, é ’ka nwa lɛ gale va lo. Amalé dé ko fe léé, Kazambale a nwa gale va, ’té vié lé ko a wo Kazambale ma. 16Dé gamunu ’ka nwaan lo, ’té Krist é ziin é ’ka nwa lɛ gale va lo. 17Yé dé Krist ’ka nwa lɛ gale va lo, ’té ka bli vole a lɛ kɛlɛ we pla nya, ’té kalé wenyané a tan ana, 18’té munu lé wo ga Krist gi, ’té wa é sanle é ziin. 19Dé tɛrɛ la ’ko saa lé ko bli ke Krist lɛ, ’té ko a nyanai zénlazannu nya é mini munu faa ta.
Gamunu nwale
(Kw 1:3; 9:1–7)
20Naa, webozen lé, Krist nwa gale va; é a mi vinin lé é nwa gamunu va, a nya. 21Fɛan zo lé mi do lé we ma lé munu éé gaan, a zo duo lé mi do lé we ma lé munu éé nwaan gale va. 22Yé fɛan zo lé Adam da ga nya yé mi faa éé gaan, a zo duo lé Krist da bélile nya yé munu faa é dan béli lɛ, 23naa, wo faa do do é dan nwa lɛ ’wo nwabléyi va. Krist ɛ ke wo vininzan nya; ’bɛ zuo, Krist dabléyi va, munu lé wo ke azé nya, wo dan nwa lɛ. 24Plale mi nwiin faa koo, lɛdɔmale faa koo, plɛplɛ faa koo, dé Krist wo sɛrɛ faa, ’té we faa ’wuo pla sin, yé é dan plale mi nwiin faa bɛ vo lɛ é Ti Bale lee. 25Naa, é a lé é pla mi faa nwiin fɔɔ yé é nyanézannu faa pla é wuo. 26Mi nyanézan voélazan lé é dan si lɛ ana, ga lé. 27Kazambale fɛnu faa pla Krist wuo webozen nya, naa, dé wa fe léé, fɛnu faa a é plale Krist wuo, é a wéiin léé, Kazambale lé é fɛnu faa pla Krist wuo, yeebozen ’ka Krist wuo lo. 28Yé dé fɛ faa a é plale Krist wuo, ’bɛ zuo Kazambale Be bozen é dan pla lɛ Kazambale lé é fɛnu faa pla a wuo, ’bɛ é wuo, Kazambale do kpen kpen vole ana we gi.
29É ziin, wo mi kenu batizéwo mi galenu tɔ gi. Mɛmalé wa kɛlɛɛ? Dé mi galenu ’ka nwaan monomono lo, mɛmalé wa munu batizéwona wo tɔ gii? 30Yé ko, mɛmalé ko bli sié kobo lɛ bléyi faa maa? 31Yi faa do do ma, maa a é bɔrale ga lɛ. Bwenu, maa we ’ko fe ka lɛ webozen nya, ka zevɔmawe lé ke an bli gi Kaazan Jézu Krist gi, a we ma. 32Guli lé maa a dan winu va Éfɛz, dé maa a dan fɛyebli nya an gi bélé munu zé zo, ’té mɛ tɔnɔ lé maa a ye ’bɛ maa? Dé mi galenu ’ka nwaan lo, ’té weboen lé sɛbɛ a fe. É léé:
Kaa gaan tɛlɛ, bɛwemalé kaa fɛ ble ma, yé kaa fɛ mini ma.
33Té ka gi kɛlɛ kabo lɛ lo. Dé mi vɔ misɛrɛzan zuo, éé a kɛlɛwe sɛra. 34Té ka vo ka tanyila lo. ’Ka kɛlɛ tegele; té ka wenyané kɛlɛ lo. Mi kenu ’ka Kazambale dɔɔa lo. Maa fe ka lɛ, yaragyɛwe lé.
Mi kɔlɛ tavɔɔle
(Dan 12:2–3; Fil 3:20–21; 1 Ts 4:13–18)
35Naa, mi do é dan a fe lɛ léé: Mi galenu éé nwaan kaa? Yé kɔlɛ kaa nya lé woo daan? 36’Tugyɛzan, fɛwɔlɛ lé bé vɔa, dé é ’ka zii lɛ yé a gɔn é bɔ yé aboen é sɛrɛ lo, a dɛrɛ ’ka kɛla lo. 37Yé fɛwɔlɛ lé bé vɔa, é valé a vɔnɔ lé éé bɔraan bɛ, wo ’ka do lo. É a fɛwɔlɛ pla nya, dé ’sawɔlɛ léé, dé fɛ bɛ wɔlɛ léé, a nya; 38yé kɔlɛ lé é sɔ Kazambale lɛ, yee lé éé a no fɛwɔlɛ faa do do lɛ, wo dɔbɛ yɛrama.
39Kɔlɛ faa dɔbɛ ’ka do lo, naa, mi zé a é yɛrama, yé wi zé a é yɛrama; miané zé a é yɛrama, yé pɔ zé a é yɛrama. 40Yé lagikɔlɛ a é ziin; yé tɛrɛlakɔlɛ a. Naa, lagikɔlɛ nɔnɔmi a é yɛrama, yé tɛrɛlakɔlɛ zé nɔnɔmi a é yɛrama. 41Yiri bile a é yɛrama, yé moné bile a é yɛrama; yé monéné bile a é yɛrama; yé é ziin monéné kenu bile a é yɛrama wo bɔlunu va.
42A zo duo lé gamunu nwale ke. Vɔnfɛ lé wa paan, ’té éé nwaan fɛ lé é ’ka vɔn‐o lo, a nya. 43Serelebomafɛ lé wa paan, ’té éé nwaan fɛ nɔnɔmi nya. Fɛ tɔɔtɔɔ lé wa paan, ’té éé nwaan fɛ plɛplɛ nya; 44tɛrɛlakɔlɛ lé wa paan, ’té éé nwaan lélikɔlɛ nya. Dé tɛrɛlakɔlɛ a, ’té lagikɔlɛ a é ziin. 45Bɛwemalé é a é gyɛle sɛbɛ gi léé: Mi vininzan Adam a mibozen yuɛmale nya; Adam voélazan a mibéliléli nya. 46Lélimi ’ka bɔra lɛ é vinin lo; tɛrɛlami ɛ bɔra é vinin; lélimi da é voéla. 47Kazambale mi vininzan kɛlɛ tɛrɛ la vun nya. Mi fiézan si la gi. 48Tɛrɛlamunu faa a bélé mi lé wa kɛlɛ vun nya, a zo. Lélimunu a bélé mi lé é si la gi, a zo. 49Yé fɛan zo lé tɛrɛlakɔlɛ a kaa ta, a zo duo lé lagikɔlɛ é dan kɛlɛ lɛ kaa ta é ziin.
50Bwenu, we lé maa a fé, yee lé ke ’ko: mi ’ka bɔa lagi tɔnɔ blele lɛ tɛrɛlakɔlɛ ’ko nya é ta lo; yé vɔnfɛ ’ka bɔa vole lɛ é yuɛma lɛɛfaama lo.
51’Ka tɔné dɔ. An weyɔɔle do fe ka lɛ: kaa faa ’ka dan ga lɛ lo, naa, wo dan kaa faa kɔlɛ tavɔɔ lɛ, 52bléyi do nya, bélé mi yuɛlakɔnɛ gyɛle zo, béli nyaanla fɛnle nya. Dé é we, mi galenu é dan nwa lɛ kɔlɛ lé é ’ka vɔn‐o é dɛrɛ lo, a nya wo ta, yé kaa é ziin, wo dan kaa kɔlɛ tavɔɔ lɛ. 53É a lé vɔnfɛ é kinin fɛan é ’ka vɔn‐o lo, a nya. Yé é a lé gakɔlɛ é kinin kɔlɛ lé é ’ka gaan é dɛrɛ lo, a nya.
54Dé vɔnkɔlɛ ’ko éé kinin‐é kɔlɛ lé é ’ka vɔn‐o lo, a nya, yé dé gakɔlɛ ’ko éé kinin‐é kɔlɛ lé é ’ka gaan lo, a nya, ’té dére lé wa gyɛ Kazambale lé sɛbɛ gi, a lɛ é dan sɔɔ lɛ. Wo léé:
Wo gale kele yé guliwuo vo wo lɛ.
55Oo gale, izé guliwuo a kyɛɛn?
Oo gale, i furu a kyɛɛn?
56Gale furu a wenyané nya, yé wenyané lé plɛplɛ éé sié bélidɔwe va. 57Naa, Kazambale lé éé guliwuo no kaa lɛ Kaazan Jézu Krist gi, ’wa bɔ vɔ ma.
58Bɛwemalé, an sɔlɛbwenu, ’ka dɔ plɛplɛ ma; ’ka dɔ gligli ma; ka a gi dɔɔ léé, kalé nyanama ’ka dan vo lɛ é pla Mizan gi lo, bɛwemalé ’ka yara pa Mizan lé nyanama pale ta é zima ma.
Currently Selected:
1 Korent munu 15: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
