Römer 14
14
Dit 14. Kapitel.
1Nem dânen, diär ön di Glow swak sen, ap, en forwirre di Geweten ek.
2Di jen liwt, dat hi Alles it mai; mar hokken swak es, di et Grenigheid.
3Hokken et, di foragte höm ek, diär ek et; en hokken ek et, di rigte ek aur di, diär et; för Gott hēd höm âpnommen.
4Hokken best dü, dat dü aur en främed Knegt rigtest? Hi stånt, of hi falt sin ein Herr. Hi mai wel âprogt ud, för Gott es magtig, om höm âptörogten.
5Di Jen halt di jen Dai foar beter, di Üder halt alle Dågen lik gud. Ark skel ön sin Mining wes wis.
6Hokken üp di Dagen halt, däd dit om di Herr sin wel.
Di ek diärüp halt, di dädt uk om di Herr sin wel Di diär et, di däd dit tö di Herr sin Iär, en danket Gott. Hokken ek et, di et ek tö di Herr sin Iär, en danket Gott.
7For Nemmen van üs lewwet höm sallew; en Nemmen sterrewt sik sallew.
8Lewwe wü, da lewwe wü di Herr, sterrew wü, da sterrew wü di Herr. Diärom mai wü lewwe of sterrew, da hir wü di Herr tö.
9Diärom es Kristus uk stürwen, en âpstönden, en weder lewendig uden, omdat hi aur di Doaden en Lewendigen Herr es.
10Mar dü, wat rigtest dü aur din Brödher? Of uk dü, wat foragtest dü din Brödher? Wü skel al voar Christus Rigterstöl stelt ud.
11Üs er skrewwen stånt: Sa wår üs ik lewwe, sprakt di Herr, skel alle Knebiner voar mi bögen ud, en alle Tungen skel Gott bekän.
12Sa skel Ark foar sik sallew Rekenskep ofli voar Gott.
13Diärom let üs ek moar rigte aur arküder; mar dit rigtet vul moar, wan Nemmen sin Brödher en Önstōt of Argernis jewt.
14Ik wēt en sen er wes üp ön üs Herr Jesus, dat nönt ünrin es ön sik sallew, sönder diär-t foar ünrin rekent, höm es-t uk ünrin.
15Mar wan din Brödher aur din Spis bedrüwwet ud, da wandelst dü al ek moar na di Lēwde. Fordarwe di ek me din Kost, om huns wel Kristus stürwen es.
16Diärom strewe, dat ju Guds ek forspottet ud.
17For Gottes Könningrik es ek Iten en Drinken, mar Rogtfârdigheid, en Frēd, en Blidheid dör di hellig Geist.
18Hokken Kristus diärön tinet, di håget Gott, en es bi di Mensken welledden.
19Diärom let üs eter dit strewe, wat tö di Frēd tinet, en wat tö Aprogting önder arküder tinet.
20Forstjür ek om dit Iit en Drinks wel Gottes Werk. Alle Dingen sen wel rin, mar hat es ek gud foar di Mensk, diär-t et me en Önstōt foar sin Geweten.
21Hat es beter, nin Flēsk tö iten, en nin Win tö drinken, of likkert wat, hurön din Brödher sik stöt, of ârgert ud, of swak ud.
22Hēst dü di Glow, da hå en bi di sallew voar Gott. Selig es hi, diär höm sallew nin Geweten diärüt måket ön dit, wat hi önnemt.
23Mar hokken diärön twiwelt, en et dag, di es skildjig, aurdat et ek üt di Glow komt. En wat ek üt di Glow komt, dit es Send.
Currently Selected:
Römer 14: NFNT
Highlight
Copy
Compare
Share
Want to have your highlights saved across all your devices? Sign up or sign in
Translated by Peter Michael Clemens (1804-1870)
