Ipenbaring 9
9
Dit 9. Kapitel.
1En di füfst Engel posaunet. En ik såg en Stiar falen van Hemmel üp di Örd, en höm wåd di Kai iwen tö di Soad sönder Gründ.
2Hi ipent di Soad sönder Gründ, en diär kam en Rok üt di Soad âp, üs di Rok van en gurt Auen. Di Sen en di Logt kam ön Junkens dör di Rok üt di Soad.
3Üt di Rok van di Soad kam Gärshüppers üp di Ord, danen Magt iwen wåd, alliküs di Skorpionen üp di Örd Magt hå.
4En diär wåd tö jam said, nogweder dit Gärs üp di Örd, of üders wat Grēns, en gar nin Bōm tö beskådigen, mar bloat di Mensken, welk Gottes Segel#9.4 Weggelassen: ek. ön jar Voarhaud ha.
5En jam wåd di Magt iwen, jam ek doad tö makin, mar füf Mun lung jam tö pinigen, en dös Piniging wiär üs di Piniging van en Skorpion, wan hi en Mensk stat hed.
6En ön disallew Dågen sjuk di Mensken jar Doad, mar ja findj en ek; ja wenske, om tö sterwin, mar ja flögt voar di Doad.
7Di Gärshüppers likket di Hingster, diär tö di Krig ütrost sen, en üp jar Hauder wiär-t üs Kronen van Gold, jar Ansegter wiär di Mensken lik.
8Ja hed Hir üs Hir van Wüfhaud, Ted üs Löwented.
9Ja hed Panser üs irsen Panser, en jar Jükken bruset, üs wan di Wainer rasselt, me vul Hingster bespänt, diär ön di Krig låp.
10Ja ha Störter alliküs Skorpionen, en Protter ön jar Störter, en ja hed di Magt, füf Mun di Mensken tö pinigen.
11Di Engel van di Soad sönder Gründ hed ja aur sik tö en Könning, diär üp Ebräisk Abaddon, en üp Grigisk Apollyon hjit.
12Jen We es er voarbi, betänk, diär kom jit tau Ween moar eter dos.
13En di sogst Engel posaunet. En ik hjert en Stem üt di vjur Hörner van di gold Alter voar Gott.
14Di sprok tö di sogst Engel, diär di Posaune hed: Lise di vjur Engel, welk bi di gurt Weterstrom Eufrates bünden sen.
15En di vjur Engel wåd loas, diär bereit wiär üp jen Stünd, en tö jen Dai, en tö jen Mun, en tö jen Jår, omdat ja di träd Dil van di Mensken doadslå skuld.
16En di Tal ön-t Låger van di Rütteri wiär vuldüsend mal düsend;#9.16 tau höndert Millionen en ik hjert jår Tal.
17En sa såg ik ön di Sjün di Hingster ön-t Gesigt, en danen, welk diärüp set, dat ja fürigroad, en surtblö, en swåwelgül Panser ön hed; en di Hauder van di Hingster likket Löwenhauder, en üt jar Mulen ging Für, Rok en Swåwel.
18Dör dös tri Plagen; nämelk Für, Rok en Swawel, wat üt jar Mulen ging, wad di träd Dil van di Mensken doad maket.
19Di Hingster jar Magt wiär ön jar Mul, en jar Störter wiär di Slangen lik, en hed Hauder, en diärme död ja Skad.
20En dag kirt di üder Mensken, diär van dös Plagen ek tö Doad kjemmen wiär, van di Werken me jår Hunden ek om, omdat ja ek moar di Düweler en di Ofgottsbilder van Gold, en Sölwer, van Köper, en Stin, en Holt, welk nogweder se, of hir, nog gung küd, onbödige skuld.
21Uk bekirt ja sik ek van jar Murdsjugt, Heksenkönst, Hureri en Tiweri.
Currently Selected:
Ipenbaring 9: NFNT
Highlight
Share
Compare
Copy
Want to have your highlights saved across all your devices? Sign up or sign in
Translated by Peter Michael Clemens (1804-1870)
