Ipenbaring 21
21
Dit 21. Kapitel.
1En ik såg en ni Hemmel en en ni Örd. For di jest Hemmel en di jest Örd forging; en di See es ek moar.
2En ik Johannes sag di hellig Stad, dit ni Jerusalem, van Gott üt di Hemmel fåren, klårmåket üs en smükket Brid foar hör Man.
3En ik hjert en gurtem Stem van Hemmel, di said: Betänk, Gotts Tabernakel es bi di Mensken; en hi wel bi jam une, en ja skel sin Volk wis, en Gott sallew me jam, skel jår Gott wis.
4En Gott skel al jår Toaren ofdrügge van jår Ogen, en di Doad skel ek moar wis, nog Sörrig, nog Klagin, nog Wark skel er moar wis; for dit Jest es forgingen.
5En di, diär üp di Tron sēt, sprok: Betänk, ik måke Alles ni. En hi said tö mi: Skriw, for dös Urder sen wårhaftig en tru.
6En hi said tö mi: Hat es sken. Ik sen Alfa en Omega, di Begen en di Jend. Ik wel di Törstigen üt di Soad me Weter tö dit Lewent omsonst#21.6 foriws. iw.
7Hokken aurwent, di skel Alles ârwe; en ik wel sin Gott wis, en hi skel min Seen wis.
8Mar di Forsågten#21.8 Fehlübersetzung für: Forförers?, en Ünglowigen, en Gröggelken, en Murdigers, en Hurern, en Trålen, en Ofgottdiners, en alle Lögners, jar Dil skel wis ön di Pul, diär me Jöld en Swåwel brent, welk es di üder Doad.
9En diär kam Jen van di sowen Engeler tö mi, welk di sowen Kelken vol hed van di sowen lēst Plagen, en sprok me mi, en said: Kom, ik wel di de Wüf wise, dit Lum sin Brid.
10En fört mi hen ön di Geist, üp en gurt en hōg Bârig, en wiset mi en gurt Stad, dit hellig Jerusalem, djälfåren üt di Hemmel van Gott.
11En hi hed Gottes Herrelkheid; en hör Lägt wiär alliküs di bäst Edelstin, en lägt Jaspis.
12En jü hed gurt en hōg Müren, en hed twellew Pōrten, en üp di Pōrten twellew Engeler, en Nomer diärüp skrewwen, welk di Nomer van di twellew Stammer der Biärner Israels sen.
13Van Oasten wiär diär tri Pōrten, van Nuden tri Pōrten, van Süden tri Porten, en van Wästen tri Pōrten.
14En di Mür van di Stad hed twellew Lågen Gründstin, en ön disalwigen di Nomer van di twellew Aposteler bi dit Lum.
15En di, welk me mi sprok, hed en gold Reidstok, omdat hi di Stad, en Porten en Müren met skuld.
16En di Stad lidt vjurkantig, en hör Längte es alliksa gurt üs hör Bredte. En hi mat di Stad me di Reidstok üp twellew düsend Stadien. Di Längte, en di Brēdte, en di Hōgte van di Stad wiär lik gurt.
17En hi mēt hör Müren, höndert vjur en vjärdig Elen, eter di Måt van en Mensk, welk di Engel hed.
18En di Bu van hör Müren wiär van Jaspis, en di Ståd van lutter Gold, alliküs dit rinst Glas.
19En di Gründlagen van di Stad-Müren wiär me allerlei kostbar Edelstiner forsiret. Di jest Gründlag wiär Jaspis, di taust Safirs, di träd Kalcedon, di vjart Smaragd.
20Di füfst Sardonik, di sogst Sardis, di sowenst en Krysolit, di ågst en Beryl, di nigenst en Topis, di tinst en Krysopras, di ellewst en Hyacint, di twellewst en Amathist.
21En di twellew Pōrten wiären sowen#21.21 Fehlübersetzung für twellew. Perlen, en ark Port wiär van jen Perl, en di Gåten van di Stad wiären lutter Gold, üs Gläs, wat dörskintj.
22En ik såg nin Tempel diärön, for di Herr, di almagtig Gott, es jår Tempel, en dit Lum.
23En di Stad hed nogweder Sen of Mun nödig, om diärön tö skinen; for Gottes Herrelkheid måkets lägt, en hör Lägt es dit Lum.
24En di Heiden, welk selig ud, wandele ön dit Lägt. En di Könninger üp di Örd skel jår Herrelkheid en Iär tö jam bring.
25En jår Porten skel ön Daiem ek töslöten ud, for diär skel nin Nagt wis.
26En ja skel di Herrelkheid en di Iär der Volken tö jam bring.
27En nin Ünrogt, of Gröggelkheid, en wat en Grul es ön Lögen, skel diärin kom, mar dânen, diär skrewwen sen ön dit Lum sin Lewents-Bok.
Currently Selected:
Ipenbaring 21: NFNT
Highlight
Share
Compare
Copy
Want to have your highlights saved across all your devices? Sign up or sign in
Translated by Peter Michael Clemens (1804-1870)
