Lɔmukalu 4

Nabi Ibulahima ya misali

1Wo lɔ saa, m'i mindɛ fɔ ka bɛn Nabi Ibulahima ma, min taanin kɛla mɔ bema le ka bɛn mɔɔnivinya ta siya ma? A ka hangili mindɛ le sɔlɔn ka bɛn telenmandeya ma ka taa Ala ma? 2Ni Ibulahima tɛɛ vɛ jate telenmande le ka bɛn a kɛkolu ma, a tɛɛ sene a wasola, kɛɛ a tɛɛ tɛ se wo kɛla Ala ɲakɔlɔ. 3#Galatiyakalu 3.6.Mindɛ le sɛvɛnin kitabu kɔnɔ ka bɛn ko min ma? A vɛɛ: «Ibulahima ka limaniya Ala ma, ado Ala ka a jate telenmande le.» 4Mɔɔ min yi baale kɛla, wo tii sala tɛ jatela sɔlifen ne, mafɔ a hakɛ jateeya. 5Kɛɛ ni mɔɔ min m'a bolomala a kɛkolu ma, mafɔ ka limaniya Ala ma min yi Alaɲasiyanɲɛbali jatela telenmande le, wo tii ma ya limaniya yi jatela telenmandeya le le Ala bolo. 6Hali Nabi Dawuda ka ko kelen wo le fɔ Zabuli kɔnɔ ka bɛn wo tii ma ya duwawudenya ma, Ala yi min jatela telenmande le ka bɔ a kɛkolu kɔ, a vɛɛ:

7«Duwawuden ne mɔɔ wolu le,

minu ya hakɛlu la vɛ ben,

ani minu ya julumbulu lɔ vɛ koto.

8Duwawuden ne mɔɔ wo le,

mɔ Tii tɛ min ya julumbu jatela.»

9Nabi Dawuda na duwawu min ya ko fɔla, jalasa wo dannin mɔɔ makɛnɛkɛninnu le la dein, baa kɛnɛkɛbalilu fana sen yi wo lɔ? Mɔ vɛ ban a fɔla ko Ala na Ibulahima jatela telenmande le ka bɛn aa limaniya le ma. 10Wo kɛnin waate mindɛ? Wo kɛnin jani Ibulahima makɛnɛ tɛɛ kɛ, baa wo kɔla? Tuɲa le, a ma kɛ aa kɛnɛkɛko kɔla, mafɔ aa kɛnɛkɛbaliya waate lɔ. 11A do ka kɛnɛkɛ nɔ tɔɔmase sɔlɔn min k'a jiya ko Ala tɛɛ v'a jate telenmande le aa kɛnɛkɛbaliya lɔ ka bɛn aa limaniya le ma. Wo boloɲa kelen ma, Ibulahima kɛnin mɔɔ bɛ le bema le minu jatenin telenmande le Ala bolo ka bɛn aiya limaniya ma a ma, hali ai ka to kɛnɛkɛbaliya lɔ. 12A do ka kɛ mɔɔ makɛnɛkɛninnu bema le fana, mɔɔ minu ma dan ai makɛnɛkɛko ma dein, mafɔ ai vɛ taamana Ibulahima kɔsiya kan limaniya boloma iwo a tɛɛ a kɛla teme jani a makɛnɛ tɛɛ kɛ.

Ala ya lahedi yi sɔlɔnna limaniya le fɛ

13 # Galatiyakalu 3.29. Ala na lahedi min tala Ibulahima ni a bɔzɔnnu yɛ k'a fɔ ko duukolo kɛtɔ kɛla ai ta le le, wo ma kɛ ka bɛn seliya latelenko ma, mafɔ telenmandeya min yi nala limaniya fɛ. 14#Galatiyakalu 3.18.Ni a ka talan seliya latelenbalu le kɛtɔ Ala ya lahedi taninnu sɔlɔnna, wo vɛ kɛla, limaniya vɛ kɛ kofuun ne wo lɔ, ado Ala ya lahedi vɛ tiɲa. 15Kamasɔlɔn seliya yi nala Ala ya mɔnɛya le le, kɛɛ ni seliya ma kɛ je, seliya tiɲako tɛnala kɛla je.

16 # Galatiyakalu 3.7. Wo le y'a ma, lahedi wo jusiinin limaniya le kɔkan, fɔsa Ibulahima bɔzɔnnu bɛ yi la a la ko ai y'a sɔlɔnne ka bɛn Ala ya nɛɛma ma. A tɛ seliya latelenbalu ta le dein, mafɔ a yi mɔɔlu le ta le minu limaniyanin Ala ma iwo Ibulahima n'a kɛla teme, min yi mɔ bɛ bema le. 17A do sɛvɛnin tan ne kitabu kɔnɔ, ko: «M̀'ɛ i kɛ siboloma siyama bema le.» Ibulahima yi mɔ bema le le Ala ɲakɔlɔ, a limaniyanin tɛɛ min ma, Ala min yi niimaya dila fulenilu ma, ani min yi fennu ladanna minu la tɛɛ ma dan ba. 18Hali foi tɛɛ tɛ je butu k'a fɔ ko Ibulahima tɛɛ a jei sii min na, a ka limaniya k'a jei sii Ala la k'a fɔ ko a kɛtɔ kɛla siboloma siyama le bema le, iwo Ala n'a fɔla a yɛ teme, a vɛɛ: «I bɔzɔnnu walatɔ ten ne.» 19Ala ka wo fɔ waate min nɔ, Ibulahima tɛɛ vɛ kɔlɔya haan fɔɔ san kɛmɛ (100) jate, k'a falikolo masulunya saya la. Hali densɔlɔn waate tɛɛ vɛ timin a moso Salan gbu la. Kɛɛ Ibulahima ma wo foi jate, a dɔ ma bɔ aa limaniya la. 20A do jei ma tɛɛ ka sika Ala ya lahedi ma, mafɔ a dɔ ka to lala aa limaniya kɔkan, a vɛ magbiliyali dila Ala ma. 21A layine tɛɛ a la kosɛvɛ ko a see yi Ala yɛ ka aa lahedi tanin mafa. 22Wo le ka kɛ sabu le, Ala ka Ibulahima jate telenmande le. 23Kɛɛ do, k'a fɔ ko: «Ala k'a jate telenmande le,» wo kuma ma sɛvɛ Ibulahima kelen ya ko lɔ dein. 24Wo sɛvɛnin maa ko le lɔ fana, ǹu minu kɛtɔ jatela telenmande le, ǹu minu limaniyanin Ala ma, min na mɔ Tii Isa lawulila ka bɔ saya lɔ. 25Isa donnin tɛɛ saya bolo ka bɛn maa julumbulu le ma, ka ban k'i wuli kɔtunun fɔsa m'i jate telenmande le Ala ɲakɔlɔ.

Currently Selected:

Lɔmukalu 4: MBT2023

Highlight

Copy