1 Kolɛntikalu 7

Fuluko

1Ài na ɲiningali min kɛla ǹ na àiya lɛtɛlɛ kɔnɔ, ài m'i ɲa kaa wo lɔ, ni a bɛnyine k'a fɔ ko kɛ́ kà moso fulu. 2Ka bɛn kanukɛko ma, a bɛnyine kɛ́ kelenkelenna bɛ y'a jɛlɛkanu moso fulu, ani moso kelenkelenna bɛ fana y'a sii a jɛlɛkanu kɛ́ kun. 3Kɛ́ ka kan k'a moso hakɛ di a ma, moso fana ka kan k'a kɛ́ hakɛ di a ma. 4Kamasɔlɔn moso falikolo tɛ a jɛlɛkanu ta le, mafɔ a kɛ́ ta. Wo boloɲa kelen ma, kɛ́ fana falikolo tɛ a jɛlɛkanu ta le, mafɔ a moso ta. 5Ài k'ài ban ài ɲɔɔ yɛ mafɔ ni ài mɔɔ fila ka bɛn a ma waateni kɔlɔ, fɔsa ài y'ài lɔgbeleya Aladaliko ma. Wo waate da vɛ fala, ài yi seikɔ i ɲɔɔ ma kɔtunun, alako Soitana kana ài manɛɛ ka bɛn àiya jɛlɛlɔminabaliya ma.

6Ǹ'i min fɔla yi ne, wo tɛ jamali le, kɛɛ a yi lailikan ne le ài yɛ. 7Ni kɛ́ bɛ tɛɛ kɛ iwo ǹ ne, wo tɛɛ diyale ǹ yɛ. Kɛɛ Ala ma mɔ bɛ sɔ boloɲa kelen ma. A na ko dɔ see kɛla a dɔ yɛ, k'a dɔgbɛlɛ see kɛ a dɔ yɛ.

8Wo lɔ, mɔɔ minu tɛ fulu kɔnɔ, ani kɛsamosolu, ǹ'a fɔla ài yɛ, ǹ ko, ni ài ka to iwo ǹe, wo yi bɛnne. 9Kɛɛ do, ni ài tɛ se ài jɛlɛ lɔminala, fɔ ài yi fulu le kɛ. Kamasɔlɔn fuluko bɛnyine ài ma jani kafonɲɔɔya lɔɔ yi gba ài la bubale.

10 # Matiyu 5.32; 19.9; Malɛkɛ 10.11, 12; Luka 16.18. Mɔɔ fulunilu koni, ǹ'i jamali min dila wolu le ma ka bɔ mɔ Tii fɛ, ǹ ko, moso man kan ka bɔ a kɛ́ kun. 11Kɛɛ ni a do ka bɔ a kɛ́ kun, fɔ a yi to fulubaliya le lɔ. Niwotɛ, fɔ a yi seikɔ a kɛ́ ma k'ai mɔɔ fila wotɛbɛn. Kɛ́ fana kà a moso bila.

12Ǹ'i min fɔla mɔɔ tɔlu yɛ butu, wo le ǹe gbu ya kuma le, mɔ Tii ta tɛ. Ni moso limaniyabali ka kɛ badenmakɛ dɔ kun, k'a talan moso wo diɲanin ka to a bolo, a kà wo tii bila. 13Ni moso siinin ka kɛ kɛ́ limaniyabali dɔ kun, k'a talan kɛ́ wo diɲanin moso yi sii a kun, a kà bɔ kɛ́ wo kun. 14Kamasɔlɔn kɛ́ limaniyabali vɛ bila a ta fan Ala yɛ ka bɛn a moso ma, ani moso limaniyabali vɛ bila a ta fan Ala yɛ ka bɛn badenmakɛ wo ma. Niwotɛ, ai dennu tɛɛ kɛle Alalɔnbali le, k'a talan ai vɛ bila ai ta fan Ala yɛ. 15Kɛɛ ni limaniyabali dɔ y'a fɛ ka bɔ limaniyamɔɔ dɔ kun, ài y'a to ten, a yi taa. Wo vɛ kɛla, limaniyamɔɔ wo silinin tɛ wo tii ma butu. Kamasɔlɔn Ala n'ài kilila josolajii le kanma. 16Kamasɔlɔn ile moso, i y'a lɔnna di, ni i yi sene i kɛ́ lakisila? Ile kɛ́, i y'a lɔnna di, ni i yi sene i moso lakisila?

Ài yi to iwo ài tɛɛ teme, Ala n'ài kilila waate min nɔ

17Mɔ Tii na ko min latɛɛla mɔɔ kelenkelenna bɛ ma, ani Ala n'ài kilila ko min kanma, ài yi to wo boloɲa kelen ma. Ǹa jamali le wo le limaniyajamalu bɛ yɛ. 18Ni Ala ka kɛ́ dɔ kili k'a talan wo tii makɛnɛkɛnin, wo tii yi to boloɲa wo ma. Ni Ala ka kɛ́ dɔ kili k'a talan wo tii makɛnɛkɛnin tɛ, wo tii kà diɲa kɛnɛkɛko ma. 19Kɛnɛkɛko ni kɛnɛkɛbaliya tɛ ko le, mafɔ Ala ya jamalilu latelenko. 20Ài kelenkelenna bɛ yi to iwo ài tɛɛ teme, Ala n'ài kilila waate min nɔ. 21I tonin jɔnya le lɔ i kilinin Ala bolo? I kà hamin wo le. Kɛɛ ni i yi sene k'i jɛlɛ lafɛlɛ, i yi wo kɛ. 22Ni mɔ Tii ka jɔn min kili, wo tii vɛ kɛ mɔ Tii ya mɔɔ lafɛlɛnin ne. Wo boloɲa kelen ma, ni mɔ Tii ka mɔɔ lafɛlɛnin min kili, wo tii vɛ kɛ Masa Tɔɔmasenin ya jɔn ne. 23Ala vɛ ban ài kunmaka sala dila. Wo lɔ, ài kà kɛ mɔɔ foi ya jɔn ne. 24Wo le y'a ma, m̀ badenmalu, ài kelenkelenna bɛ yi to Ala ɲakɔlɔ iwo ài tɛɛ teme, a n'ài kilila waate min nɔ.

Fulubalilu ni kɛsamosolu ya ko

25Ǹe do ma jamali sɔlɔn mɔ Tii la ka bɛn singbili ni kavelennu ma minu ma fulu kɛ ba bene. Kɛɛ do, ǹ'i m̀ miliya le jiyala ài la, iwo mɔɔ min kɛnin lanande le ka bɛn mɔ Tii ya henandeya ma. 26Ǹ'i waate gbɛlɛn min yena teme, a bɛnyine mɔɔ yi to i kɛɲa ma. 27Ni moso vɛ kɛla i bolo, i kà a bila. Ni moso t'i bolo, i kà dɔ ɲinin. 28Kɛɛ ni i ka fulu kɛ, wo tɛ julumbuko le. Ni do singbili ka fulu, wo tɛ julumbuko le fana. Kɛɛ do, ni mɔɔ minu ka fulu kɛ, wolu kɛtɔ ɲagba siyama le sɔlɔnna dunuɲa, ado ǹ'a fɛ k'ài matanga wo le ma.

29M̀ badenmalu, ǹ kan yi min ma, wo le ne: Dunuɲa laban ma vɛ sulunya. Wo lɔ, ka ta bi ma, kɛ́ mosotiilu yi kɛ iwo moso tɛ ai bolo. 30Mɔɔ minu yi kasila, wolu yi kɛ iwo ai tɛ kasila. Sawa yi mɔɔ minu la, wolu yi kɛ iwo ai sawanin tɛ. Mɔɔ minu yi sanni kɛla, wolu yi kɛ iwo foi tɛ ai bolo. 31Mɔɔ minu yi dunuɲa fennu labaalela, wolu yi kɛ iwo ai mako tɛ wolu la bene. Kamasɔlɔn dunuɲa kɛɲa min tununtɔle ka ban.

32Ǹ'a fɛ ài la yi fɛlɛ ka bɔ haminkolu lɔ. Kɛ́ min ma moso ta, wo yi haminna mɔ Tii ya kolu le le, kamasɔlɔn a a lɔjala ka mɔ Tii ladiyanankolu le kɛ. 33Kɛɛ do, kɛ́ fulunin yi haminna dunuɲakolu le le, kamasɔlɔn a a lɔjala k'a moso ladiyanankolu le kɛ. 34A do miliya lɔtalanin fila le le. Moso fulubalilu ani singbililu, wolu yi haminna mɔ Tii ya kolu le le. Ai do y'ai lɔjala k'ai falikolo ni ai joso bɛ bila a ta fan mɔ Tii le yɛ. Kɛɛ moso fulunin do yi haminna dunuɲakolu le le, kamasɔlɔn a a lɔjala ka a kɛ́ ladiyanankolu le kɛ. 35Ǹ'i min fɔla ka bɛn ài madɛmɛnko le ma. A tɛ k'a fɔ ko ǹ'ài dansiila fuluko le ma, mafɔ ài yi kobɛlɛ kɛ ka bila mɔ Tii kɔ ài josokun bɛ le.

36Ni kɛ́ dɔ k'a mili ko a tɛ kobɛlɛ kɛla aa singbili maminanin la ka bɛn a fuluko matamalako ma, ni do singbili wo lɔɔ y'a minala bubale, wo vɛ kɛla, a a fulu iwo a diyanin a yɛ teme. Wo tɛ julumbuko le. 37Kɛɛ ni kɛ́ min k'a latɛɛ a josokun nɔ ko a tɛnala fulu kɛla, a do tɛ diyanigbeya le a ma, ni a ka se a jɛlɛ lɔminala, wo yi kobɛnnin ne le fana. 38Wo lɔ, mɔɔ min na aa moso maminanin fulula, wo tii na kobɛnnin ne kɛla. Kɛɛ do, kɛ́ min ma fulu kɛ, wo fana na kobɛnnin ne kɛla ka timin dɔ la.

39Moso fulunin siliyine a kɛ́ ma damanda wo y'a nii la. Kɛɛ ni a kɛ́ ka sa, a lafɛlɛyine k'i sii kɛ́ gbɛlɛ kun, min vɛ diyala a yɛ. Kɛɛ do, fɔ kɛ́ wo yi kɛ mɔ Tii malimaniyamɔɔ dɔ le le. 40Ǹe ɲana, ni moso wo ka to fulubaliya lɔ, wo yi hɛlɛ le le a ma. A do yi ǹ kɔnɔ ko Ala Nii Sɛnɛyanin yi ǹe fana fɛ.

Currently Selected:

1 Kolɛntikalu 7: MBT2023

Highlight

Copy