1 Kolɛntikalu 14
14
Nii Sɛnɛyanin ya senkolu lataamaɲa
1Ài y'ài sɛmɛdon kanundeya ma, k'ài nii la Nii Sɛnɛyanin ya senkolu kɔkan, kelayakuma lasenko bɛlɛbɛlɛ le. 2Kamasɔlɔn mɔɔ min yi kumala kan gbɛlɛ lɔ, wo tii tɛ kumala mɔɔlu yɛ, mafɔ Ala. Mɔɔ foi tɛ a kumakan ɲayena, kamasɔlɔn a yi gbonokolu le fɔla Nii Sɛnɛyanin sabu la. 3Kɛɛ mɔɔ min yi kelayakuma lasena, wo tii yi kumala mɔɔlu le yɛ k'ai lasawati, k'ai sɛmɛdon, ani k'ai josolajii. 4Mɔɔ min yi kumala kan gbɛlɛ lɔ, wo tii y'a jɛlɛ le lasawatila. Kɛɛ mɔɔ min yi kelayakuma lasena, wo tii yi limaniyajama le lasawatila. 5A tɛɛ diyale ǹ yɛ, ni ài bɛ tɛɛ kuma kan gbɛlɛlu lɔ, kɛɛ kelayakuma lasenko koni, wo le diyanin ǹ yɛ ka timin dɔ la. Mɔɔ min yi kelayakuma lasena, wo tii fisayayine ka timin mɔɔ min kumala kan gbɛlɛ lɔ, mafɔ ni a kannatiminba ka kɛ je ka bɛn limaniyajama lasawatiko ma.
6M̀ badenmalu, ni ǹ ka taa ài fɛlɔ ka kuma ài yɛ kan gbɛlɛlu lɔ, ài kɛtɔ nafa mindɛ sɔlɔnna wo la? Ǹ tɛnala ài nafala, ni m̀ ma Ala ya ko dɔ lankɛnɛmaya ài yɛ, niwotɛ ka lɔnni di ài ma, niwotɛ ka kelayakuma dɔ lase ài ma, niwotɛ k'ài kalan. 7Hali fɔlifen minu ladannin mɔɔlu bolo iwo fule ni kɔni, ni wolu tɛ kan lɔgbɛnin fɔla, jene yi se a lɔnna dɔngili kelen min yi lala? 8Ni do buulufɛkan lɔ ma gbɛ, jene kɛtɔ a jɛlɛ lɔbɛnna kɛlɛkɛko lɔ? 9Àilu fana, ni àiya kuma ma kɛ kuma lagbɛnin ne, wo kɔlɔ kɛtɔ lɔnna di? Àiya kuma kɛtɔ kɛla kuma fuun ne le wo lɔ!
10Tuɲa le, kan siyama le yi dunuɲa, a bɛ ni a ta kɔlɔ. 11Mɔɔ min vɛ kumala ǹ fɛ, ni ǹ tɛ wo tii kan mɛnna, a kɛtɔ ǹ jatela kɔɔkanmɔɔ le le, ǹe fana kɛtɔ a jatela wo boloɲa kelen ne ma. 12A yi ten ne àilu fana ta fannɔ. Komi ài nii lanin Nii Sɛnɛyanin ya senkolu le kɔkan, wo lɔ, ài y'ài lɔja ka wolu labaale ka bɛn limaniyajama lasawatiko ma.
13Wo le y'a ma, mɔɔ min yi kumala kan gbɛlɛ lɔ, fɔ wo tii yi Ala dali fɔsa kan wo latimin see yi di a ma. 14Kamasɔlɔn ni ǹ ka Ala dali kan gbɛlɛ lɔ, ǹ'i wo kɛla ǹ josokun ne le, kɛɛ ǹ hangili tɛ foi ɲayena. 15Ǹ'i mindɛ le kɛ wo lɔ? Ǹ kɛtɔ Ala dalila ǹ josokun ne ani ǹ hangili le fana, ka baiti la ǹ josokun ne ani ka baiti la ǹ hangili le kɔtunun. 16Niwotɛ, ni i ka kɛ balika bɔla Ala yɛ i josokun ne dein, i lamɛnba minu tɛ i kumakan ɲayena, wolu kɛtɔ sena iya balikabɔ laminala di, k'a fɔ: «Amiina»? 17Hali ni i ka balika bɔ kobɛn, kɛɛ wo tɛnala i mɔɔɲɔɔlu lasawatila.
18Ǹ'i balika bɔla Ala yɛ, kamasɔlɔn ǹ'i kumala kan gbɛlɛlu lɔ ka timin ài bɛ la. 19Kɛɛ wo bɛ n'a kɛ, limaniyajama ya ladɛn nɔ, a diyanin ǹ yɛ ǹ'i kuma loolu fɔ minu yi se ɲayena mɔɔlu bolo ai kalanko lɔ, janin ǹ'i kuma waa tan (10 000) fɔ kan gbɛlɛ lɔ.
20M̀ badenmalu, ài hangili kà kɛ iwo dennilu. Koyon ta fannɔ, ài yi kɛ iwo denɲanin, kɛɛ hangilimaya ta fannɔ, ài yi kɛ kɛmɔbalu le. 21Mɔ Tii n'a fɔla seliya kitabu kɔnɔ, a vɛɛ:
«Ǹ kɛtɔ timinna siboloma gbɛlɛlu fɛ ka kuma jama min yɛ,
ani ka kuma ai fɛ lonalu sabu la.
Wo bɛ n'a kɛ, ai tɛnala ai tolomalɔla ǹ na.»
22Wo lɔ saa, kan gbɛlɛ fɔko tɛ tɔɔmase le limaniyamɔɔlu yɛ, mafɔ limaniyabalilu. Kelaya lasenko koni, wo yi tɔɔmase le limaniyamɔɔlu le yɛ, limaniyabalilu tɛ. 23Wo lɔ, ni limaniyajama lakunnin k'i ladɛn ka kɛ kumala kan gbɛlɛlu lɔ, ni mɔɔ kula ka don ài tɛma, niwotɛ limaniyabali, a a fɔle ko fa le ài lɔ, kɛlɛ? 24Kɛɛ ni limaniyabali niwotɛ mɔɔ kula ka don ài tɛma, k'a talan ài bɛ yi kelayakuma lasena, ài bɛ ya kuma kɛtɔ wo tii kitila k'a lalɔnni aa julumbulu la. 25A do kɔnɔlɔkolu kɛtɔ bɔla gbɛ la. Wo lɔ, a kɛtɔ a mabilinna duu ma ka Ala bato, a vɛɛ: «Tuɲa le, Ala y'ài tɛma!»
Jatesiili limaniyajama lɔ
26M̀ badenmalu, ài ka kan k'a kɛ di wo lɔ? Ni ài vɛ ladɛn kɛla waate min nɔ, ni mɔɔ dɔ y'a fɛ ka baiti la, a a la. Ni kalan y'a dɔgbɛlɛ fɛ, a yi mɔɔlu kalan. Ni ko lankɛnɛmayanin dɔ ka kɛ a dɔgbɛlɛ fɛ ka bɔ Ala fɛ, wo tii y'a fɔ. Ni dɔ y'a fɛ ka kuma kan gbɛlɛ lɔ, a yi kuma. Ni a see yi mɔɔ dɔ yɛ ka kan gbɛlɛ wo latimin, a a latimin. Kɛɛ ko bɛ yi kɛ ka bɛn limaniyajama lasawatiko le ma. 27Ni mɔɔ dɔlu y'a fɛ ka kuma kan gbɛlɛ lɔ, wolu kà timin mɔɔ fila la, niwotɛ mɔɔ sawa. Ai yi kuma kelen kelen ne, ado fɔ kannatiminba yi kɛ je. 28Ni mɔɔ ma sɔlɔn kannatiminko lɔ, mɔɔ wolu yi jeden limaniyajama tɛma. Ai do yi kuma wo fɔ Ala yɛ ai josokun nɔ. 29Kelayakuma lasenba fila niwotɛ sawa yi kuma. Ai do vɛ min fɔla, mɔɔ tɔlu yi wo lakɔlɔsi kobɛn. 30Ni Ala ka ko dɔ lankɛnɛmaya mɔɔ dɔ yɛ min siinin je, mɔɔ min yi kumala kunfɔlɔ le, wo tii yi jeden bene. 31Kamasɔlɔn ài bɛ yi sene kelayakuma lasena kelen kelen ne, fɔsa bɛ yi kalan sɔlɔn ani ka bɛ sɛmɛdon. 32Ka kela to aa kelaya la, a ka kan k'a jɛlɛ lɔmina, 33kamasɔlɔn Ala tɛ koɲaaminin fɛ, mafɔ josolajii.
Iwo a yi kɛla teme mumininnu ya limaniyajamalu bɛ lɔ, 34mosolu jedennin yi to limaniyajama tɛma. A ladaannin tɛ k'a fɔ ko ai yi kuma, mafɔ ai y'ai fanmajii, iwo a sɛvɛnin seliya kitabu kɔnɔ teme. 35Ni ai y'a fɛ ka ko dɔ ɲaye, ai y'ai kɛ́nu maɲininga bon na. Kamasɔlɔn a yi maloyako le le, ni moso ka kuma limaniyajama tɛma.
36A yi di? Ài y'ài milila ko Ala kumakan bɔnin àilu le lɔ? Niwotɛ, a lasenin àilu le ma dein? 37Ni mɔɔ mɔɔ k'a mili ko kela le a le, niwotɛ a vɛ senko dɔ sɔlɔn Nii Sɛnɛyanin bolo, fɔ wo tii y'a ɲaye ko ǹ'i min sɛvɛla ài ma, wo yi mɔ Tii ya jamali le le. 38Ni mɔɔ min tɛ wo jatela, wo tii fana tɛ jatela.
39Wo le y'a ma, m̀ badenmalu, ài y'ài nii la kelayakuma lasenko kɔkan, ài do kà kan gbɛlɛ fɔko dansii. 40Kɛɛ fɔ ko bɛ yi kɛ a kɛɲa ma jatesiili lɔ.
Currently Selected:
1 Kolɛntikalu 14: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
