Nūmela 8
8
Nā Lāmepa e Fitu
1Na vāgana mai te Aliki kia Mohe,#Eho 25.31-40; 37.17-24 2“Tautala kia Alona ma lea vē ki ei, ‘Kāfai e fakatutū e koe nā lāmepa, ke mautinoa ko nā lāmepa e fitu e huhulu ki mua o te tūgālāmepa.’ ”
3Na fai vēnā lava e Alona; na fakatū e ia nā lāmepa ke mumū ki mua o te tūgālāmepa, e vē ko te fakatonuga a te Aliki kia Mohe. 4Na vēnei la te faiga o te tūgālāmepa: na fai i te aulo na tuki—mai tona tūlaga ke pa ki ona tiale teuteu; na fai fakatatau lelei lava ki te fakaataga na fakahino e te Aliki kia Mohe.
Te Fakamamāga ma te Fakapaiaga o nā Tino ha-Levī
5Na vāgana mai ai te Aliki kia Mohe, 6“Vavae kehe nā tino ha-Levi mai tagata Ihalaelu ma fakamamā kilātou. 7E vēnei te fakamamāga o kilātou: Hauhau te vai o te fakamamāga ki nā tino o kilātou, ma lea ki ei ke tafi o lātou tino kātoa, ma ufi o lātou kie. Oi ka mamā ai kilātou i nā tu tau tāpuakiga. 8Oi kaumai ai e kilātou he pōvi poa ko hēki matua ma he tāulaga haito e fai i te falaoa mata e hili te lelei kua palu i te lolo, fakatahi ma hētahi pōvi poa ko hēki matua mo he tāulaga mo nā agahala. 9Oi fakamāopōpo ai te fakapotopotoga kātoa o Ihalaelu ma kaumai ki mua o te Falekie Tapu nā tino ha-Levī. 10Kāfai e kaumai e koe nā tino ha-Levī ki te Aliki, e tatau nā tino Ihalaelu#8.10 nā tino Ihalaelu E hē ko tagata Ihalaelu uma kae ko nā hui o kilātou ke fakaeke o lātou lima ki luga o nā ulu o nā tino ha-Levī, 11oi kaumai ai kilātou e Alona ki mua o te Aliki ke fai ma meālofa fakapitoa mai tagata Ihalaelu, kae ke tāpena ai kilātou ke faia nā gāluega a te Aliki.
12“Oi ka tuku ai nā lima o nā tino ha-Levī ki luga o nā ulu o nā pōvi poa, ma fakaaogā ai tētahi pōvi poa mo he tāulaga mo nā agahala ki te Aliki, ka ko tētahi mo he tāulaga mū, ke fakamamā ai nā tino ha-Levī ma fakalelei ai to lātou vā ma te Aliki. 13Oi ka fakatutū ai e koe nā tino ha-Levī i mua o Alona ma ona ataliki, oi hiki ai ō lima ki luga ma ofo atu kilātou ke fai ma tāulaga fakapitoa mo te Aliki. 14I te faiga tēnei, ka vavae kehe ai e koe nā tino ha-Levī mai iētahi tino Ihalaelu uma, kae ke kavea ai kilātou mo ōku.
15“Kāfai kua uma te fakamamā e koe o kilātou ma ofo mai kilātou ma meālofa fakapitoa kia te au, oi ka ōmamai ai kilātou ke fakatino a lātou gāluega i loto o te Falekie Tapu. 16Ko kilātou ko nā tino Ihalaelu kua fōki kātoatoa mai kia te au. Kua talia e au kilātou ke hui ai nā ataliki ulumatua uma o tagata Ihalaelu. 17#Eho 13.2Auā ko nā ataliki ulumatua uma o nā tino Ihalaelu e āku, e vēnā foki ma nā ulumatua a nā manuvaefa. Na fakatō e au kilātou mo oku i te aho na kō tāmatea ai nā ataliki ulumatua uma o Aikupito. 18Kae i te taimi nei, kua fai mo oku nā tino ha-Levī ke hui ai nā ataliki ulumatua uma o Ihalaelu. 19Mai tagata Ihalaelu uma, kua fōki e au nā tino ha-Levī ma meālofa kia Alona ma ona ataliki ke faia nā gāluega i loto o te Falekie Tapu, e hui ai e kilātou ia tagata Ihalaelu uma, ma ke faia nā tāulaga e fakamamā ai ia tagata kae ke nahe lāvevea kilātou i ni mala, kāfai kilātou e tafapili ātili ki te nofoaga paia.”
20Na fai e Mohe ma Alona ma te fakapotopotoga kātoa o Ihalaelu ki nā tino ha-Levī, e vē lava ko te fakatonuga a te Aliki kia Mohe. 21Na fakamamā e nā tino ha-Levī kilātou lava mai nā agahala ma ufi o lātou kofu. Ma na tuku atu ai kilātou e Alona ma meālofa fakapitoa ki te Aliki. Oi na fai ai e ia he tāulaga ke fakamamā ai kilātou, ma ke fakalelei ai te vā o kilātou ma te Aliki. 22Na kāmata atu ai mai kinā te olo o nā tino ha-Levī ki loto o te Falekie Tapu ke fakatino a lātou tautuaga ma fehoahoani kia Alona ma ona ataliki. Na fai e kilātou ki nā tino ha-Levī e vē lava ko te fakatonuga a te Aliki kia Mohe.
23Na vāgana mai te Aliki kia Mohe, 24“Ko te mea tēnei e fakatatau ki nā tino ha-Levī: Ko tāulelea tau toka tahi uma e tatau ke kāmata tautua i loto o te Falekie Tapu kāfai e kātoa te lua hefulu lima tauhaga pe hili atu to lātou mātutua, 25ma e tatau ke mālōlō mai ana tautuaga kāfai e kātoa tona lima hefulu tauhaga. 26E mafai kilātou ke fehoahoani ki o lātou uho, i te fakatinoga o nā tiute o kilātou i loto o te Falekie Tapu, kae e hē mafai ke kilātou faia te gāluega. Ko tēnā la te faiga e fai e koe ki nā tino ha-Levī, kāfai e tofi e koe ki o lātou tiute.”
Currently Selected:
Nūmela 8: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
