Mataio 6

Akoakoga ke Fehoahoani ki Tagata Mātitiva

1“Ke mautinoa ko autou gāluega lelei, e hē faia i mua o tagata kae ke kilātou kitea ai autou mea e fai. Kāfai e fai vēnā e koutou, ka hēai he koutou taui e maua, mai te koutou Tamana i te lagi.#Mat 23.5

2“Ko te mea ia, kāfai e fōki hau mea mo he tino mativa, nahe fakapihā lele ke iloa e tagata e vē ko faiga a tagata āmio pepelo, e fai i loto o nā hūnako ma i luga o nā auala. E fai e kilātou kae ke maua ai ni o lātou vīkiga. E takutino atu e au kia te koutou, ko tēnā oioti lava to lātou taui ka maua. 3Kae kāfai e kave hau fehoahoani ki he tino mativa, nahe iloa e te lima tauagavale te mea e fai e te lima taumatau, 4kae ke nahe iloa ai e he tino tau fehoahoani kua fai. E kitea e te koutou Tamana nā mea e fai munimuni, ma ka fōki atu e ia he taui mo koe.

Akoakoga e Uiga ki te Tatalo

(Luk 11.2-4)

5“Kāfai koutou e tatalo, ia koutou nā vē ko faiga a nā tino āmio pepelo. E fiafia oi tutū ma tatalo i loto o nā hūnako ma nā auala, kae ke kitea kilātou e tagata. E takutino atu e au kia te koutou, kua uma te kilātou maua o to lātou taui.#Luk 18.10-14 6Kāfai koe e tatalo, fano ki tō potu, tapuni te faitotoka, oi tatalo ai ki tō Tamana. Ko tō Tamana e hē kitea e he tino, kae e kitea e ia au mea e fai munimuni, ma ka ia fōki atua tō taui.

7“Kāfai koutou e tatalo, nahe fakaaogā e koutou ni kupu e lahi e hēai ni uiga e vē ko faiga a tagata nukukehe. E vēakē kāfai e loloa a lātou tatalo, oi ka lagona ai kilātou e o lātou atua. 8Koutou nahe fakatakitaki ki ei. Kua uma te iloa e te Tamana o koutou nā mea e fofou koutou ki ei, ka ko hēki lea atu koutou kia te ia. 9E vēnei la kāfai koutou e tatalo:

‘To mātou Tamana i te lagi:

Ke paia tō igoa.

10Ke pa mai tō Mālō,

ke fai tō loto i te lalolagi

e vē oi faia i te lagi.

11Fōki mai i te aho nei#6.11 Fōki mai i te aho nei pe fōki mai i te aho nei ma tāeao

nā meakai e ola ai kimātou.

12Fakamāgalo o mātou hehē,

e vē oi fakamāgalo e kimātou ia hehē

o iētahi tino kia te kimātou.

13Ma nahe takitakia kimātou

ki nā fakaohōhoga,

kae lāveaki kimātou mai Tē e Kino.’#6.13 Tē e Kino pe Hatani Ko iētahi tuhituhiga e fakaopōpo ki ei: Auā e o koe te mālō ma te mana ma te vīkiga e fakavavau. Amene

14“Auā kāfai e fakamāgalo e koutou ia hehē o iētahi tino kia te koutou, ka vēnā foki oi fakamāgalo nā mea hehē a koutou kua fai, e te koutou Tamana i te lagi. #Mlk 11.25-26 15Kae kāfai e hē fakamāgaloa e koutou ia hehē o iētahi tino kia te koutou, ka vēnā foki oi hē fakamāgaloa nā mea hehē a koutou kua fai, e te koutou Tamana.

Akoakoga e Uiga ki te Fakalāina

16“Kāfai koutou e fakalāina, koutou nahe mata fakanoanoa e vē ko faiga a nā tino āmio pepelo. E hē teuteua fakalelei o lātou fōliga, kae ke matea ai e tagata ko kilātou e fakalāina. E takutino atu e au kia te koutou, kua uma te kilātou maua o to lātou taui. 17Kāfai koe e fakalāina, uku ō mata ma helu tō ulu, 18kae ke nahe iloa e nā tino ko koe e fakalāina—nā ko tō Tamana oioti, e hē kitea e he tino, te ka ia iloa. Ko te koutou Tamana e ia kitea au mea e fai munimuni, ma ka fōki atu e ia tō taui.

Ko nā Koloa i te Lagi

(Luk 12.33-34)

19“Nahe fakaputua ni koloa mo koutou i te lalolagi, te mea e fakakino ai e nā mogamoga ma te palatoki, ma e kave ai e nā tino kaihohoa.#Iak 5.2-3 20Kae fakaputu ni koloa mo koutou i te lagi, te mea e hē fakakinoa ai e nā mogamoga ma te palatoki, ma hē mafai e nā tino ke olo ki ei ma kaihohoa e kilātou. 21Auā ko te mea e iei autou koloa, ka iei ai foki ma outou loto.

Ko te Mōlī mo te Tino

(Luk 11.34-36)

22“Ko nā mata o koe e vē ko he mōlī mo tō tino. Kāfai nā mata o koe e lelei, ko tō tino kātoa ka tumu i te mālama; 23kae kāfai ō mata e kino, ko tō tino kātoa ka i te pōuli. Kāfai la ko te mōlī i loto o koe ko te pōuli, kai te kino lele la o te pōuli ka iei ai!

Ko te Atua ma nā Tupe

(Luk 16.13; 12.22-31)

24“E hēai he tino e mafai ke kaukauna ki ni matai e toka lua; auā ka ita ki tētahi kae alofa ki tētahi; ka fakamāoni ki tētahi kae inoino ki tētahi. E hē mafai koe ke kaukauna uma ki te Atua ma ki nā tupe.

25“Ko te mea ia e lea atu ai au kia te koutou, ia koutou nahe popole ki nā ola o koutou, pe niā te ka kakai ma inu ai koutou; nahe popole foki ki nā tino o koutou, pe niā te ka kokofu ai koutou. Auā e hē hili atu nei te tāua o te ola i lo nā meakai, ma te tino i lo nā kofu? 26Kikila koutou ki nā manulele: e hē kilātou totōa ni fatu haito, pe helehelea, pe fakaputua ki loto o nā fale haito; kae e tauhi pea lava kilātou e te koutou Tamana i te lagi. E hē hili lele atu nei te tāua o koutou i lo nā manulele? 27E iei he tino o koutou e ia mafaia oi fakaopōpo he itūlā e fokotahi ki te loa o tona ola,#6.27 fakaopōpo he… tona ola pe fakaopōpo he kūpita e fokotahi ki tona loa i te popole ki ei?

28“Heā foki te popole ai koutou ki nā kofu? Kikila ki nā tiale o te vao pe ola vēhea; e hē gālulue pe hui ni o lātou kofu. 29Kae e lea atu au kia te koutou, e pa foki lava ki te Tupu ko Holomona ma te lahi o tona tamaokāiga, e hēki ia maua ni kofu mānanaia e vē ko he tiale o nā tiale iēnei.#1 Tup 10.4-7; 2 NT 9.3-6 30Kae kāfai ko te Atua te ia fakakofua te mutia ola vale, tēia e ola i te aho nei kae tāeao e togi ki loto o te ogāumu ke huhunu, ka hē hili atu nei la ona mautinoa ka ia fakakofua koutou? Kai te taigole ātili lele o te fakatuatua o koutou!

31“Ko te mea ia, koutou nahe popole ma lea vē: ‘Ka maua nei i fea ni a mātou mea ke kai? pe ni a mātou mea ke inu? pe ni o mātou kofu?’ 32Auā ko nā mea uma iēnei e popole pea lava ki ei ia tagata nukukehe; ma e iloa e te koutou Tamana i te lagi ko nā mea uma iēnei e manakomia e koutou. 33Kae hakili muamua e koutou te Mālō o te Atua ma nā mea e fofou ia ke koutou faia, oi ka fōki atu ai e ia kia te koutou nā mea uma iēnei. 34Ko te mea ia, koutou nahe popole ki te aho tāeao; auā ka popole lava te aho tāeao kia te ia lava. Kua lava lava nā fakafītāuli o te aho mo te aho tēnā.

Currently Selected:

Mataio 6: TOKU

Highlight

Copy