Mataio 28

Ko te Toetū o Iehu

(Mlk 16.1-10; Luk 24.1-12; Ioa 20.1-10)

1Kua teka te Hāpati ma kua tafa ia ata o te aho Hā, oi na olo ai ia Malia te Makatala ma tētahi Malia, oi kikila ki te tugamau. 2Kae teki lava kua tō te mafuie lahi; auā kua fanaifo he āgelu a te Aliki mai te lagi, kua fēke kehe te fatupae ma na nofo ai i luga. 3Ko ona fōliga e vē ko te napa o te uila, ma ona kofu e paepae e vē ko te kiona. 4Ona ko te mātataku o nā fitafita, na tatapa ai kilātou ma vē ai ni tino kua mamate.

5Oi na lea mai te āgelu ki nā fafine, “Koulua nahe mātataku. E iloa e au ko Iehu tēia na fakahātaulo, te hakili e koulua. 6Kua hē i kinei; kua toe tū mai i te oti e vē lava ko te mea na lea ai ia. Ōmamai oi kikila ki te mea nae takoto ai. 7Olo vave loa oi taku ki ona hoko, ‘Kua toe tū mai ia i te oti, ma ko ia e muamua atu ia te koutou ki Kalilaia; ka koutou kitea ia i kinā.’ Koulua e hē puli i te mea kua lea atu ai au kia te koulua.”

8Oi na olo kehe vave ai loa kilāua mai te tugamau ma te mātataku, kae na fakatumulia foki kilāua i te fiafia lahi, ma na fetutuli ai oi taku ki ona hoko.

9Kae nā lava e teki kua fetaui kilāua ma Iehu, oi na vāgana mai ai ia Iehu, “Ke ia te koulua te fīlēmū.” Ma na olo ai kilāua kia Iehu, kua paki ki ona vae ma ifo atu kia te ia. 10Kua vāgana atu ia Iehu kia te kilāua, “Koulua nahe mātataku. Olo oi lea ki oku uho ke olo ki Kalilaia, ma ka kilātou kitea au i kinā.”

Ko te Līpoti a nā Fitafita na Leoleoa te Tugamau

11Kua olo kehe nā fafine, ka ko iētahi o nā fitafita nae leoleoa te tugamau, kua olo ki te kakai oi taku ki nā ohitāulaga pule nā mea uma na tutupu. 12Oi na olo ai nā ohitāulaga pule ma te kau toeaina kua taupulepule ki te lātou mea ka fai; na fōki ai e kilātou he tupe lahi lele ki nā fitafita 13ma na lea vēnei atu ai ki ei, “Lea ki nā tino, ‘Ko nā hoko o ia na ōmamai i te pō oi kaihohoa tona tino, ka koi momoe kimātou.’ 14Kāfai e iloa e Pilato te mea kua tupu, e kimātou mafaia oi fakamalie ki ei, ma e hēai lele he mea e tatau ke popole ai koutou.”

15Kua kave e nā fitafita te tupe, ma na kilātou faia lava e vē oi fakatonu ai kilātou. Ma ko tēnā te tala kua fakahalalau ki tagata Iutaia, ke pa mai lava ki te aho tēnei.

Kua Fakailoa ia Iehu ki Ona Hoko

(Mlk 16.14-18; Luk 24.36-49; Ioa 20.19-23; Gāl 1.6-8)

16Oi na olo ai nā hoko e toka hefulu tahi ki te mauga i Kalilaia, te mea na poloaki ia Iehu ke olo kilātou ki ei.#Mat 26.32; Mlk 14.28 17I te kilātou kiteaga o Iehu, oi na ifo atu ai kilātou kia te ia, e ui lava nae iei nā tino o kilātou nae māhalohalo. 18Na hōhō atu ia Iehu ki o lātou tafa, oi na vāgana atu ai ki ei, “Ko te pule kātoa i te lagi ma te laukelekele, kua tuku mai kia te au. 19Olo la oi fai ia tagata o mālō uma o te lalolagi ma oku hoko: papatiho atu kia te kilātou i te igoa o te Tamana, te Ataliki ma te Agaga Paia,#Gāl 1.8 20ma akoako kia te kilātou ke mulimuli ki nā mea kua kō fakatonua ai koutou. Ma ko au ka fakatahi pea lava ma koutou, ke pa lava ki te gataga o te olaga.”#28.20 Ko iētahi tuhituhiga tuai e fakaopōpo ki ei Amene

Currently Selected:

Mataio 28: TOKU

Highlight

Copy