Mataio 25

Ko te Talafakatuha o nā Tautiti e toka Hefulu

1“I te taimi tēnā, ko te Mālō o te lagi ka fakatuha vēnei. Nae iei ni tautiti e toka hefulu na kave a lātou lāmepa ma olo ki fafo ke fakafeiloaki ki te tama fakaipoipo.#Luk 12.35 2E toka lima kilātou e vālelea ma toka lima e popoto. 3Ko nā tautiti vālelea kua kave a lātou lāmepa kae kua hē kavea ma ni a lātou huāū fakaleoleo, 4ka ko nā tautiti popoto kua kave a lātou lāmepa ma kave a lātou huāū fakaleoleo i ni hiā. 5Kua tuai mai te tama fakaipoipo, oi na kāmata ai oi tulemomoe nā tautiti ma na iku ai kua momoe.

6“Kua ta te vaeluaga o te pō kae hau loa te kalaga, ‘Tēnei te tama fakaipoipo. Ōmamai ki fafo oi feiloaki ki ei!’ 7Kua āla ki luga nā tautiti e toka hefulu ma kī ki luga a lātou lāmepa. 8Oi na lea atu ai nā tautiti vālelea ki nā tautiti popoto, ‘Kaumai kō ni a mātou huāū, auā a mātou lāmepa ka mamate.’ 9‘E hēai he mea vēnā,’ kua tali mai nā tautiti popoto, ‘E hē lava mo kimātou ma koutou. Olo ki te fale koloa oi fakatau mai ni autou huāū.’ 10Oi na olo ai nā tautiti vālelea oi fakatau mai a lātou huāū; ma i te taimi tēnā na olo ai, kae taunuku mai loa te tama fakaipoipo. Ko nā tautiti e toka lima na nofo hāuni, kua olo ma ia ki loto ki te kaiga o te fakaipoipoga ma na tapuni ai loa te faitotoka.

11“Mulimuli ake, kua taunuku mai iētahi tautiti, ma na tutū ai fafo ma taukālalaga ki te tama fakaipoipo, ‘Te aliki, te aliki, ōatu kō kimātou ki loto!’ #Luk 13.25 12Kae kua tali mai te tama fakaipoipo, ‘E takutino atu e au, e hē kō iloa koutou.’ ”

13Kua fakauma te tautalaga a Iehu, oi na lea vē atu ai, “Koutou la ke mataala, auā e hē koutou iloa te aho pe ko te itūlā.

Ko te Talafakatuha o nā Tāleni

(Luk 19.11-27)

14 # Luk 19.11-27 “I te taimi tēnā ko te Mālō o te lagi ka fakatuha vēnei. Nae iei he tamāloa na hāuni e fano i hana malaga; kua fakamāopōpo mai e ia ana kaukauna ma na tuku atu ai e ia kia te kilātou nā meatōtino a ia ke kikila e kilātou. 15Na tuku atu e ia kia te kilātou tau toka tahi, e fua lava ki te iloa ma te mālamalama o te tino; ki tētahi na tuku atu e ia ki ei te lima tāleni,#25.15 lima tāleni Ko te tāleni e fokotahi e tuha ko te totogi ia o he tino faigāluega mo ni tauhaga e hefulu lima ki tētahi e lua tāleni, ma tētahi e fokotahi te tāleni. Oi na fano ai loa i tana malaga. 16Ko te kaukauna na tuku ki ei nā tāleni e lima, na fano fakavave lele oi fakagalue te tupe, ma na toe maua mai ai iētahi tāleni e lima. 17Na vēnā foki te mea na fai e te kaukauna na tuku ki ei nā tāleni e lua, ma na toe maua mai ai iētahi tāleni e lua. 18Ka ko te kaukauna na tuku ki ei te tāleni e fokotahi, kua fano oi keli he pū i te kelekele ma mumuni ai nā tupe a tona matai.

19“Kua teka atu he taimi mataloa, oi na toe foki mai ai te matai ma kua fia iloa e ia pe niā ta ana kaukauna na fai ki ana tupe. 20Ko te kaukauna na tuku ki ei te lima tāleni, kua hau ki loto ma tuku atu ki tona matai ma hētahi lima tāleni fakaopōpo ma lea vē atu, ‘Toku matai, na tuku mai e koe kia te au nā tāleni e lima. Kikila, iēnei iētahi tāleni e lima.’ 21Kua lea atu ki ei tona matai, ‘Mālō ni, te kaukauna lelei ma te fakamāoni. Kua fakamāoni koe i te kikilaga o nā tamā mea, oi ka kō tōfia ai la koe ke pule i nā mea e lahi. Ulu mai loa ki loto nei, tā fiafia fakatahi ai!’

22“Oi na hau ai ki loto te kaukauna na tuku ki ei nā tāleni e lua ma lea vē mai ki tona matai, ‘Toku matai, na tuku mai e koe kia te au nā tāleni e lua. Kikila, iēnei iētahi tāleni e lua na maua i aku taumafaiga.’ 23Kua lea atu ki ei tona matai, ‘Mālō ni, te kaukauna lelei ma te fakamāoni. Kua fakamāoni koe i te kikilaga o nā tamā mea, oi ka kō tōfia ai la koe ke pule i nā mea e lahi. Ulu mai loa ki loto nei, tā fiafia fakatahi ai!’

24“Oi na hau ai te kaukauna na tuku ki ei te tāleni e fokotahi ma lea vē mai ki tona matai, ‘Toku matai, e iloa e au ko koe he tino faigatā; e tau e koe ia fua o nā lākau fātoaga i te mea e hēki kē totōa, ma helehele e koe te mea e hēki kē lūlūa ai ni fatu haito. 25Ko au na mataku, oi na fano ai au oi mumuni tau tupe i lalo o te kelekele. Kikila, ko te tupe la tēnei a koe.’

26“Kua lea atu tona matai ki ei, ‘Ko koe he kaukauna kino ma te paiē. Oi e kē iloa ni e kō taua nā fua o nā lākau i te mea e hēki kō totōa, ma kō helehelea te mea e hēki kō lūlūa ai ni fatu haito? 27Na tatau lava la ke teu e koe taku tupe i he faletupe, kae ke maua uma ai e au fakatahi ma te ola, kāfai au e toe foki mai. 28Kave kehe loa nei te tupe mai ia te ia, ma fōki ki te tino e hefulu ana tāleni. 29Auā ko ho he tino e iei hana mea, ka toe fakaopōpo ki ei ma ka lahi lele ai ma totoe mo ia; kae ko te tino e hēai hana mea, e pa lava ki he tamā mea a ia, ka kave kehe mai ia te ia.#Mat 13.12; Mlk 4.25; Luk 8.18 30Kae vē la ki te kaukauna kino tēnei—togi ki fafo ki te pōuli; i kinā ka tagi ai ma te katigū o ona nifo.’#Mat 8.12; 12.13; Luk 13.28

Ko te Aho Fakamahino

31“Kāfai te Ataliki o te Tagata e hau i tona mamalu fakatahi ma ana āgelu uma, ka nofo i tona nofoāliki mamalu, #Mat 16.27; 19.28 32ma ka ōmamai ia tagata o mālō uma kia te ia. Oi ka vāevae ai e ia kilātou ki ni vāega e lua, e vē lava oi tuku kehekehe e te leoleomāmoe nā māmoe ma nā oti. 33Ka tuku e ia nā tino e vē ko nā māmoe ki tona itū taumatau, ma tuku nā tino e vē ko nā oti ki tona itū tauagavale. 34Oi ka lea atu ai te Tupu ki nā tino i tona itū taumatau, ‘Ōmamai, koutou iēnā kua fakamanuiagia e toku Tamana! Ōmamai oi fai mo koutou te mālō, kua uma te hāunia mo koutou, mai te kāmataga o te lalolagi. 35Auā, na fia kaia au, oi na fafaga ai au e koutou; na fia inua au, oi na fakainu ai au e koutou; na fai au ma tagata kehe, oi na talia ai au e koutou ki loto o nā fale o koutou, 36na hē lavalavā au, oi na fakakofu ai au e koutou; na tauale au, oi na āhiahi atu ai au e koutou; na falepuipui au, oi na ōatu ai koutou oi āhi au.’

37“Oi ka tali vē mai ai nā tino āmiotonu, ‘Te Aliki, ko anafea nei te na kimātou kitea ai koe e fia kaia, ma na fafaga ai koe e kimātou, pe na fia inua, oi na fōki atu ai e kimātou he vai inu? 38Ko anafea nei te na kimātou kitea ai ko koe he tagata kehe, ma na talia ai koe e kimātou ki loto o nā fale o kimātou, pe na hē lavalavā, ma na fakakofu ai koe? 39Ko anafea nei foki te na kimātou kitea ai koe e tauale pe nae i loto o te falepuipui, oi na ōatu ai kimātou oi āhi atu koe?’ 40Ma ka tali vē atu te Tupu kia te kilātou, ‘E takutino atu e au kia te koutou: ho he taimi lava na koutou faia ai te mea tēnei ki hētahi o kilātou nei oku uho e pito hili te fakaalofa, na koutou faia te mea tēnā kia te au!’

41“Oi ka lea vē atu ai ia ki nā tino i tona itū tauagavale, ‘Olo kehe ma au, koutou nā tino kua fakamālaiagia e te Atua. Olo ki te afi e hē mate kua uma te hāunia mo te tiāpolo ma ana āgelu! 42Auā na fia kaia au, kae na hēki fōki maia e koutou haku mea ke kai; na fia inua au, kae na hēki fakainua au e koutou i ni vai; 43na fai au ma tagata kehe, kae na hēki talia au e koutou i loto o nā fale o koutou; na hē lavalavā au, kae na hēki fakakofua au e koutou; na tauale ma i loto au o te falepuipui, kae na hēki āhiahi atu koutou kia te au.’ 44Oi ka tali mai kilātou kia te ia, ‘Te Aliki, ko anafea nei te na kimātou kitea ai koe e fiakaia pe fia inua, pe he tagata kehe, pe hē lavalavā, pe tauale, pe i te falepuipui, kae e hēki fehoahoani atu kimātou kia te koe?’ 45Ka tali vē atu te Tupu ki ei, ‘E takutino atu e au kia te koutou: ho he taimi lava na hēki fehoahoani ai koutou ki hētahi o kilātou nei e pito hili te fakaalofa, na hēki fehoahoani mai koutou kia te au.’ 46Ko nā tino la iēnei, ka kave ki te fakahalaga e pa ki te fakavavau, ka ko nā tino āmiotonu ka maua e kilātou te ola e fakavavau.” #Tan 12.2

Currently Selected:

Mataio 25: TOKU

Highlight

Copy