Luka 2
2
Ko te Fānau mai o Iehu
(Mat 1.18-25)
1I nā aho iēnā, na fai ai te fakatonuga a te Kaihala Aukuho, ke fai he tuhigā igoa a tagata uma o te lalolagi, nae i lalo o te pūlega a Loma. 2Ko te tuhigā igoa muamua lava tēnei, ma na fakatāunuku i nā aho nae kōvana ai ia Kulenio i Hulia. 3Oi na olo ai nā tino uma lele, kua fano lava te tino ki te kakai na fānau mai ai, ke lehitala ai tona igoa.
4Na vēnā foki la ia Iohefa, na fanatu mai te kakai ko Nahaleta i Kalilaia, ki te kakai ko Peteleema i Iutea, te mea na fānau mai ai te Tupu ko Tavita. Na fano ki ei ona ko ia na tupuga mai ia Tavita. 5Na olo ma Malia, tēia kua uma te fakamau ke fakaipoipo ki ei, ke lehitala o lā igoa. Ko Malia kua faitama. 6Ka koi i Peteleema kilāua kae fakatīgā ia Malia, 7ma na fānau mai ai e ia tana ulumatua, ko he tama. Na āfīfī e ia te pepe i ni meakie, ma na fakatakoto ai ki loto o he kumete fāgaimanu, ona kua hēai he avanoa mo kilātou i te fale talimālō.
Ko nā Leoleomāmoe ma nā Āgelu
8Nae i te kogāfenua foki tēnā ni leoleomāmoe, nae kikila a lātou māmoe i te vao, i te pō tēnā. 9Oi na kitea ai e kilātou he āgelu a te Aliki, ma na hulugia fakatakamilo kilātou i te mamalu o te Aliki. Na mātataku lahi lele kilātou, 10kae na lea vē atu te āgelu kia te kilātou, “Koutou nahe mātataku! Kikila, ko au kua hau ma he tala lelei mo koutou, he tala e maua ai e tagata uma te fiafia lahi. 11Auā ko te aho lava tēnei na fānau mai ai i te kakai o Tavita, te Fakaola o koutou—ko te Mehia te Aliki! 12Ma ko tēnei te mea ka fakamāonia ai kia te koutou: ka maua atu e koutou he pepe e āfīfī i ni meakie, ma e fakatakoto i loto o he kumete fāgaimanu.”
13Kae nā lava e teki, kua iei fakatahi ma te āgelu, he kau āgelu tokalahi mai te lagi, e pepehe i nā vīkiga ki te Atua:
14“Ko te vīkiga ki te Atua
i te lagi e hili te maualuga,
ma te fīlēmū i te lalolagi
mo kilātou kua fiafia ia ki ei!”
15I te olokehega o nā āgelu ma kua toe foki ki te lagi, oi na fakataufai ai nā leoleomāmoe, kua lea vē tētahi ki tētahi, “Tātou olo ki Peteleema oi kikila ki te mea tēnei kua tupu, e vē ona fakailoa mai e te Aliki kia te kitātou.”
16Oi na olo fakavave ai nā leoleomāmoe, ma na kilātou maua atu ia Malia ma Iohefa, ma te pepe nae takoto i loto o te kumete fāgaimanu. 17I te kiteaga e kilātou o te pepe, oi na taku ai e kilātou ki nā tino, te mea na lea ake ai te āgelu kia te kilātou e uiga ki te pepe. 18Ko nā tino uma lele na fakalogo ki ei, na ofo lele ki te mea na lea ake ai nā leoleomāmoe. 19Ka ko Malia, na teu i tona loto nā kupu uma iēnei, ma māfaufau loloto lele ki ei. 20Oi na toe foki ai nā leoleomāmoe ma pepehe i nā vīkiga o te Atua, ona ko nā mea uma lele na fakalogo ma kikila kilātou ki ei, e vē lava ona lea ake ai te āgelu.
Kua Fakaigoa te Pepe kia Iehu
21Kua teka nā aho e valu talu te fānau mai o te pepe, ko te aho ia e pelitome ai, oi na fakaigoa ai kia Iehu, te igoa na fakaigoa ai e te āgelu, ka ko hēki faitama ai ia Malia. #Lev 12.3; Luk 1.31
Kua Tuku atu ia Iehu ke Fakapaia mo te Atua i te Mālumalu.
22Kua pa ki te aho e fakatino ai e Iohefa ma Malia te hāuniga tau ki te fakamamāgia#2.22 hāuniga tau ki te fakamamāgia E vē ona fakatonu mai e te tūlāfono a Mohe, kāfai he mātua Iutaia e fānau maia he pepe tama, ka hē mamā ia i nā tu tau tāpuakiga, ma fakahā ai ke fano ki te Mālumalu. E nofo lava i te fale ke uma te pelitome o tana pepe i te valu o aho (kikila ki te 1.59). Oi toe nofo ai lava i te fale mo hētahi 33 aho, oi ofo atu ai loa he tāulaga ki te Aliki e vē ona fakatonu mai e te Tūlāfono a Mohe. Oi na kave e kilāua te pepe ki Ieluhalema, ke tuku atu ke fakapaia i mua o te Aliki,#Lev 12.6-8 23e vē ona tūhia i te tūlāfono a te Aliki: “Ko nā tamaiti tāne ulumatua uma lele, e fakapaia mo te Aliki.” #Eho 13.2, 12 24Na olo foki oi ofo atu te lā tāulaga, e tuha ai ma te tūlāfono a te Aliki, “ni lupe e lua, pe he luagamata lupe o te itūkāiga taigogole.”
25I te taimi tēnā, nae iei he tino nae igoa kia Himeona nae nofo i Ieluhalema. Ko he tino lelei ma mataku i te Atua, ma nae fakatalitali ke lāveaki e te Atua ia Ihalaelu. Nae fakatahi te Agaga Paia ma ia, 26ma na fakailoa kia te ia e te Agaga Paia, ko ia e hē oti heiloga kua ia kitea te Mehia na folafola e te Aliki. 27Kua tataki ia Himeona e te Agaga Paia, ma na ulu atu ai ki loto o te Mālumalu; ma i te kaumaiga o te pepe ko Iehu e nā mātua ki loto o te Mālumalu, ke fai mo ia nā mea māhani e tuha ai ma te Tūlāfono, 28oi na puke atu ai ia Himeona ki te pepe, kua hiki i ona lima, ma fakafetai ki te Atua:
29“Nei te Aliki, kua tauhi koe ki tau folafolaga,
tuku la tau kaukauna#2.29 I te gagana Eleni pologa ke fano ma te fīlēmū.
30Auā kua kitea e oku mata tau fakaolataga,
31tēia kua kē hāuniagia i mua o tagata:
32He mōlī ke fakamāina ai tō finagalo
ki tagata nukukehe,
ma ke maua ai he vīkiga
mo ō tagata Ihalaelu.”#Iha 42.6; 49.6; 52.10
33Na ofo lele te tamana ma te mātua, ki nā kupu na tautala ai ia Himeona e uiga ki te lā pepe. 34Ma na fakamanuia ai kilātou e Himeona, ma na lea vē atu ai ia kia Malia, te mātua o te pepe, “Kikila, ko te pepe tēnei kua filifilia e te Atua mo te fakatāugāga ma te fakaolataga#2.34 mo te fakatāugāga ma te fakaolataga pe ke pākukū ai ki lalo ma ke fakaeke ai ki luga o te tokalahi o tagata Ihalaelu. Ka kavea ia ma fakailoga mai te Atua e teteke ki ei nā tino e tokalahi, 35kae ke kitea ai o lātou manatu lilo. Ma ko te fakanoanoa, ka vē he pelu kakaha, ka tuia ai lava tō loto.”
36-37Nae iei he pelofeta fafine kua matua lele ko tona igoa ko Anā, he afafine o Fanouelu o te puikāiga o Ahela. E fitu oioti ia tauhaga na nofotāne ai, ma kua valu hefulu fa nei ona tauhaga.#2.36-37 valu hefulu fa nei ona tauhaga pe valu hefulu fa tauhaga talu te oti o tana āvaga Kua hē fano kehe lele ma te Mālumalu; ma nae tatalo ma tāpuaki ki te Atua i te pō ma te ao, ma fakalāina. 38Ko te taimi tonu foki lava tēnā na taunuku atu ai te pelofeta fafine tēnei ki te Mālumalu. Na kāmata ai kua viviki ake ia ki te Atua, ma fakailoa atu e uiga ki te tamaiti,#2.38 Eleni ia ki nā tino nae fakatalitali ki te Atua ke togiola e ia ia Ieluhalema.
Ko te Toe Fokiga ki Nahaleta
39Kua uma te fakatāunuku e Iohefa ma Malia nā mea uma na tatau ke ki lā faia e tuha ai ma te Tūlāfono a te Aliki, oi na toe foki ai ki to lā nuku ko Nahaleta i Kalilaia. #Mat 2.23 40Kua tuputupu ake pea te tamaiti, ma kua mālohi. Na fakatumulia ia i te poto, ma na fakamanuiagia e te Atua.
Ko Iehu i te Mālumalu ka koi Tamaiti ai
41I tauhaga uma, ko nā mātua o Iehu nae olo ki Ieluhalema, mo te Kaiga Fakamanatu o te Pāheka. #Eho 12.1-27; Teu 16.1-8 42Kua kātoa te hefulu lua tauhaga o Iehu, oi na olo ai foki ma ona mātua ki te Kaiga Fakamanatu o te Pāheka, e vē lava ko te mea kua māhani ai kilātou. 43Kua uma te Pāheka, oi na kāmata ai kua toe foki ia tagata ki o lātou kāiga, ka ko te tamaiti ko Iehu kua nofo i Ieluhalema, kae hē iloa e ona mātua. 44Nae vēake lava nā mātua ko Iehu e i loto o te lātou kau malaga. Na kātoa te aho nae faimalaga ai kilātou, kae fātoā kāmata oi hakili ia Iehu e ona mātua ki nā kāiga o kilāua ma a lā uō. 45E hēki ki lā maua te lā tama, oi na toe foki ai kilāua ki Ieluhalema oi hakili. 46I te tolu o aho na maua ai e kilāua ia Iehu i te Mālumalu, e nofo i te mea e iei nā faiākoga, e fakalogologo ki ei, ma fai ki ei ana fehili. 47Na tēteki lele nā tino uma na fakalogo ki fakamatalaga a Iehu, ona ko te poto o ana tali. 48Na ofo lele foki ona mātua i te ki lā kiteaga o Iehu, oi na lea vē atu ai tona mātua ki ei, “Taku tama, heā te kua fai ai e koe te mea tēnei kia te kimāua? Kikila, ko koe nae hakili e kimāua ma tō tamana, ma ko kimāua na popole lele.”
49Ka kua vē atu ki ei tana tali, “Heā te na hakili ai au e koulua? E hē koulua iloa ko au e tatau ke i te fale o toku Tamana?” 50Kae e hēki ki lā hāfia te uiga o tana tali.
51Oi na olo fakatahi ai ia Iehu ma ona mātua ki Nahaleta, ma nae uhitaki lele kia te kilāua. Na teu i te loto o tona mātua nā mea uma iēnei. 52Kua tuputupu ake pea ia Iehu i te tino ma i te poto, ma na alofagia ia e te Atua vēnā ma tagata.#1 Ham 2.26; Alk 3.4
Currently Selected:
Luka 2: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
