Iohua 2
2
Nā Tino na Uga ki Ieliko ke Tautuku Munimuni
1Oi na uga atu ai e Iohua ni tamāloa e toka lua mai Hitimi#2.1 Hitimi kikila ki te Nūm 25.1 ke olo oi tautuku munimuni te fenua ko Kanana, kae maihe lava te kakai ko Ieliko. Oi na olo ai nā tamāloa e toka lua ma tau atu ki te fale o he fafine talitāne e igoa kia Lahapa, oi na momoe ai kilāua i te pō tēnā i kinā.#Epe 11.31; Iak 2.25 2Kua lagona e te tupu o Ieliko e iei ni tamāloa Ihalaelu na ōmamai i te pō tēnā ke tautuku munimuni tona fenua, 3oi na kave ai tana faifekau kia Lahapa e vē, “Ko nā tino i te fale o koe na ōmamai ke tautuku munimuni to tātou fenua kātoa! Kaumai ki fafo kia te kimātou nā tino iēnā!”
4Kae kua kave e te fafine nā tamāloa e toka lua oi mumuni, ma tali vē atu ai, “E hako, e iei nā tamāloa na ōmamai ki toku fale, kae e hē kō iloa pe na ōmamai i fea. 5Na toe olo lava i te afiafipō ka kua tāli tapuni ai te alapupuni o te kakai. E hē kō iloa pe na olo ki fea. Tuliloa vave atu, e maua atu lava e koutou.” 6(Ko te meamoni, ko te toka lua na kave e Lahapa ki luga o te tuāfale o tona fale, ma mumuni i lalo i nā lau peheti#2.6 peheti he lākau e ola i tafa o nā vaitafe, ko ona lau e gaohi ai nā kie, vēnā ma nā kafa ma nā maea nae fakalā i luga.) 7Oi na tuliloa ai e nā fitafita a te tupu nā tamāloa Ihalaelu, ma na teka atu lava kilātou oi tapuni loa foki te alapupuni o te kakai. Kua hakili e kilātou te toka lua ke pa lele ki te koga e aha ai ki tētahi itū o te Iolitana.
8Ka ko hēki momoe nā tamāloa i te pō, ka kua fano ia Lahapa ki ei i luga o te tuāfale 9ma lea vē atu kia te kilāua, “E iloa e au ko te fenua tēnei kua fōki atu e te Aliki mo koutou, ma ko tagata uma o te fenua e gatete i te mātataku ia te koutou. 10Auā kua fakalogo kimātou ki te fakamātūtūga e te Aliki o te Tai Kukula i mua o koutou, i te olo kehega o koutou mai Aikupito; ma ki te tāmatega e koutou o Hihona ma Ogo, nā tupu e toka lua o nā tino ha-Amolī i te itū ki hahae o te Iolitana.#Eho 14.21; Nūm 21.21-35 11I te lagonaga lava e kimātou o te tala tēnei, oi na mātataku lele ai kimātou; kua uma lele to mātou loto totoa ona ko koutou. Auā ko te Aliki te koutou Atua, ko te Atua lava ia o te lagi i luga, ma o te lalolagi. 12Ko te mea la ia, tautō mai nei kia te au i te igoa o te Aliki, ko koulua ka agalelei ki toku kāiga e vē oi agalelei atu au kia te koulua, ma tuku mai he fakailoga ke mautinoa ai e au 13e fakahao e koulua toku tamana ma toku mātua, oku tuagane ma oku uho ma o lātou kāiga uma, ma ka hē koulua tukua kimātou ke tāmate!”
14Kua lea vē mai nā tamāloa ki te fafine, “Ko nā ola o kimāua mo nā ola o koutou! Kāfai e hē kē takua ki he tino nā mea a kimāua e fai, e takutino atu e kimāua, kāfai e fōki mai e te Aliki te fenua tēnei mo kimātou, ka agalelei atu kimāua kia te koutou.”
15Ko Lahapa nae nofo i he fale e fau ki loto o te pāpuipui o te kakai, oi na tukutuku ifo ai e ia nā tāulelea ki lalo i he maea, mai te fāmalama. 16Kua lea vē atu ia Lahapa ki te toka lua, “Olo ki te kogāfenua maugā nā ia koulua e maua e nā fitafita a te tupu. Mumuni i kinā i ni aho e tolu ke toe liliu mai nā fitafita, oi kua olo ai loa i toulua auala.”
17Kua lea atu nā tamāloa ki te fafine, “Ka tauhi e kimāua te takutinoga kua fakatautō ai kimāua e koe; 18ma ko tēnei te mea e tatau ke fai e koe. Kāfai e ohofaki e kimātou te koutou fenua, nonoa te fuhi kukula tēnei ki te fāmalama na tukutuku ai kimāua e koe ki lalo. Fakamāopōpo mai ki loto o te fale te tamana ma te mātua o koe, nā tuagane o koe, ma nā tino uma o te kāiga o tō tamana. 19Kāfai he tino e fano ki fafo o te fale, ko tona mate ka pakū lava ki ona luga. Kae kāfai he tino i loto o te fale ma koe e lavea, ka pakū mai la ki o mā luga te mea tēnā. 20Kae kāfai e taku e koe ki he tino nā mea a kimāua nae fai, oi ka hē toe tauhi la kimāua ki te takutinoga kua fakatautō ai kimāua e koe.” 21Na tali vē mai te fafine, “E tuha ai ma nā kupu kua tautatala mai ai koulua, ka vēnā lava ona fai.” Ma na uga ai loa e ia kilāua ke olo, ma na olokehe ai loa kilāua. Oi na nonoa ai e ia te fuhi kukula ki te fāmalama.
22Kua olo nā tamāloa ki te kogāfenua maugā ma mumuni ai i kinā. E tolu ia aho na hakili ai kilāua e nā fitafita a te tupu, kae e hēki maua e kilātou, ma na toe liliu ai kilātou ki Ieliko. 23Kua ōifo te toka lua ki lalo mai te kogāfenua maugā, kua aha ki tētahi itū o te vaitafe, ki te mea nae iei ai ia Iohua. Oi na taku ai e kilāua kia te ia nā mea uma na pa kilāua ki ei. 24Kua lea vē atu kilāua kia Iohua, “E mautinoa lelei e kimāua ko te fenua kātoa kua fōki mai e te Aliki mo kitātou. Ko tagata uma lele o te fenua e mātataku lele ia te kitātou.”
Bible Society New Zealand Charitable Trust