Ioane 4
4
Ko Iehu ma te Fafine Hamalia
1Ma i te iloaga la e Iehu kua uma te iloa e te kau Falehaio, kua tokalahi atu nā tino kua mulimuli kia te ia ma kua ia papatihoagia i lo Ioane, 2(e ui lava e hēki papatihoa e Iehu he tino kae ko nā hoko o ia te na kilātou papatihoa,) 3oi na fano kehe ai ma Iutea, ma kua toe foki ki Kalilaia. 4I te auala o ia na malaga ai, na kui atu i loto o Hamalia.
5Kua taunuku atu ia Iehu ki Hamalia, ki te kakai nae igoa ko Haika, e hē mamao ma te fenua na fōki e Iakopo ki tona ataliki ko Iohefa.#Ken 33.19; Ioh 24.32 6Nae i kinā te vaikeli o Iakopo, oi na nofo ifo ai ia Iehu ki lalo i tafa o te vaikeli, kua vāivai i te malaga. I te taimi tēnā, pe kua ta te hefulu lua i te aoauli.
7I te hauga o he fafine Hamalia oi ahu vai, oi na vāgana atu ai ki ei ia Iehu, “Fakainu mai ake au.” 8(Ko nā hoko o ia kua olo ki te kakai, oi fakatau mai he lātou mea ke kai.)
9Na tali mai te fafine, “Ko koe ko he Iutaia, ka ko au ko he Hamalia—e vēhea la ona lea mai koe kia te au ke fakainu atu koe?” (E hē mafai e nā tino Iutaia ke fakaaogā e kilātou ni ipuinu ma ni pēhini na fakaaogā e ni tino Hamalia.)#4.9 E hē mafai e nā tino Iutaia ke fakaaogā e kilātou ni ipuinu ma ni pēhini na fakaaogā e ni tino Hamalia pe E hē fai mea fakatahi nā tino Iutaia ma nā tino Hamalia #Ehe 4.1-5; Nem 4.1-2
10Na tali atu ia Iehu, “Ka na he mea na iloa e koe te meālofa a te Atua, ma pe ko ai foki te tino e lea atu kia te koe mo he vai inu, ānei ake kua lea koe ki ei, ma kua ia fōkiatua kia te koe, te vai o te ola.”
11Kua lea mai te fafine, “Te aliki, ko tēnā e hēai hau mea ahuvai, ma ko te vaikeli foki e loloto. Ko fea la te kaumai ai e koe te vai tēnā o te ola? 12Ko te vaikeli tēnei na tuku mai kia te kimātou e to mātou tupuna ko Iakopo. Nae inu ai foki ia Iakopo ma tana fānau, vēnā ma ana lafumanu. Ko tona uiga ko koe e lea mai, e hili atu koe ia Iakopo?”
13Na tali atu ia Iehu, “Ko nā tino e inu ki te vai tēnei, e toe fia inua, 14ka ko nā tino e inu ki te vai e kō fōkia ki ei, e hē toe fia inua lele. Ko te vai e kō fōkia kia te kilātou, e kavea ma vaipuna i loto o kilātou, e puna ake ai pea te vai o te ola mo kilātou, ma maua ai e kilātou te ola e fakavavau.”
15Kua lea mai te fafine kia Iehu, “Te aliki, kaumai kia te au te vai tēnā, kae ke hē toe fia inua lele ai au, ma hē toe hau ai au oi ahu vai.”
16Oi na vāgana atu ai ia Iehu ki ei, “Fano la oi kaumai tau āvaga.”
17“E hēai haku āvaga,” kua tali mai te fafine.
Ma na vāgana atu ai ia Iehu ki ei, “E hako tau lea mai e hēai hau āvaga. 18Kua toka lima ia tamāloa e āvaga koe ki ei, ma ko te tamāloa e nonofo nei koulua, e hē ko he āvaga moni e a koe. Kua taku mai e koe te meamoni.”
19“Te aliki, i taku kikila atu, ko koe ko he pelofeta,” na lea vēnā atu te fafine. 20“Ko nā tupuna o kimātou, nae tāpuaki ki te Atua i luga o te mauga tēnei;#4.20 mauga tēnei Mauga ko Kelihima kae lea mai koutou tagata Iutaia, ko Ieluhalema te mea e tatau ke tāpuaki ai kimātou ki te Atua.”
21Kua vāgana atu ia Iehu, “Te māfine, e talitonu mai koe, e hau te taimi e hē toe tāpuaki ai ia tagata ki te Tamana i luga o te mauga tēnei, pe i Ieluhalema. 22Ko koutou tagata Hamalia, e hē koutou iloa pe ko ai te tāpuaki koutou ki ei; ka ko kimātou tagata Iutaia, e kimātou iloa te tino e tāpuaki kimātou ki ei, auā ko te fakaolataga e auala mai i tagata Iutaia. 23Kae e hau te taimi, ma kua i kinei, ka tāpuaki atu ai ia tagata ki te Tamana, e ala i te mālohi o te Agaga o te Atua, ma kavatu kia te ia te tāpuakiga e moni ma fofou ia ki ei. 24Ko te Atua ko te Agaga, ma ko te mālohi oioti o te Agaga e mafai ai ia tagata ke tāpuaki atu kia te ia, i te tāpuakiga e moni.”
25Na lea vē mai te fafine, “E iloa e au ko te Mehia ka toe hau,” (tē e fakaigoa e kimātou ko Keliho). “Kāfai la e hau, ka ia fakailoa maia kia te kimātou nā mea uma lele.”
26Oi na tali atu ai ia Iehu, “Ko au tēnei e tautala atu kia te koe, ko ia tēnā.”
27I te taimi lava tēnā, na taunuku mai ai nā hoko o Iehu, ma na tēteki lele kilātou ona ko Iehu nae faitala ki he fafine. Kae e hēki iei he tino o kilātou na lea ki te fafine, “Heā te fofou koe ki ei?” pe na fehili foki kia Iehu, “Heā te tautala ai koe ki te fafine?”
28Oi na tuku ai e te fafine tana fagu utuvai, kae kua toe liliu ki te kakai oi lea vē atu ki nā tino, 29“Ōmamai oi kikila ki te tamāloa na ia taku maia kia te au, nā mea uma lele a aku na fai. E hē ko ia nei ko te Mehia?” 30Oi na olo kehe ai loa kilātou mai te kakai, ma kua olo kia Iehu.
31I te taimi tēnā, ko Iehu nae tauānau vēnei atu ki ei ona hoko, “Te Faiākoga, kai kō hau mea!”
32Kae na tali mai ia Iehu, “E iei aku meakai e hē koutou iloa he mea e fokotahi e uiga ki ei.”
33Oi na fakataufai ai te kau hoko, ma kua fehili vē atu tētahi ki tētahi, “Na kave nei ki ei hana meakai e he tino?”
34Na vāgana atu ia Iehu kia te kilātou, “Ko taku meakai, ko te uhitaki ki te mea e fofou ki ei te Atua, ma te fakatinoga o te gāluega na ia tuku maia kia te au ke fai. 35E iei te koutou fakakupuga e vē, ‘Toe fa lava ia māhina oi pa ki te helehelega.’ Kae ko au e lea atu kia te koutou, kikila lelei atu ki nā fātoaga; ko te fuata kua pula ma kua tatau ke helehele! 36Ko te tino e ia helehelea e maua tona totogi, ma e ia fakaputu maia na fua o te fātoaga mo te ola e fakavavau; ma ka fiafia fakatahi ai te tino e ia totōa, ma te tino e ia helehelea. 37Auā e hako lava te fakakupuga, ‘E totō e tētahi tino, kae helehele e tētahi.’ 38Kua uga atu koutou e au ke helehele te fuata i te fātoaga na hēki gālulue ai koutou; nae gālulue ai iētahi tino, ma kua manuia koutou ona ko a lātou gāluega.”
39Na tokalahi nā tino Hamalia i te kakai tēnā na talitonu kia Iehu, ona ko te fafine na lea vē, “Na ia taku maia kia te au, nā mea uma lele a aku na fai.” 40I te ōmamaiga la o tagata Hamalia kia Iehu, na kilātou tauānaua ai ke nonofo kilātou, oi na nofo ai ia Iehu i kinā, mo ni aho e lua.
41Na tokalahi lele foki iētahi tino na talitonu kia Iehu ona ko te fekau na folafola e ia, 42ma na lea vē atu kilātou ki te fafine, “E hē ona ko nā mea na lea mai ai koe te kua talitonu ai kimātou, kae ona na kimātou lagona lelei lava nā mea nae tautala ai ia Iehu, ma kua kimātou mautinoa ai, ko ia lava ko te Fakaola o te lalolagi.”
Kua Fakamālōlō e Iehu te Ataliki o he tino Ōfiha o te Mālō
43Kua kātoa nā aho e lua o Iehu i kinā, oi na fano ai ki Kalilaia. 44Auā ko Iehu lava te na vāgana vē, “E hē mamalu he pelofeta i tona lava nuku.” #Mat 13.57; Mlk 6.4; Luk 4.24 45I te pa atuga o Iehu ki Kalilaia, na talia ma te fiafia e tagata, ona nae i Ieluhalema foki kilātou mo te Kaiga Fakamanatu o te Pāheka, ma na kilātou kitea nā mea uma na fai e Iehu i kinā.#Ioa 2.23
46Oi na toe fano ai ia Iehu ki Kana i Kalilaia, ki te mea na ia fakaliu uaina ai nā vai. Nae i Kapenaumi he tino ōfiha o te mālō, ko tona ataliki nae tauale.#Ioa 2.1-11 47I te ia lagonaga ko Iehu kua fanaifo mai Iutea ki Kalilaia, oi na fano ai kua talohaga ki ei, ke fanake kō ki Kapenaumi oi fakamālōlō tona ataliki kua tāli oti. 48Na vāgana atu ia Iehu ki ei, “E hēai lele he tino o koutou e mafai ke talitonu, heiloga kua kikila muamua koutou ki ni fakailoga ma ni mea ofōfogia.”
49Na tali mai te tino ōfiha, “Te aliki, hau kō tā olo ka ko hēki oti toku ataliki.”
50Oi na vāgana atu ai ia Iehu ki ei, “Fano, ko te ataliki o koe ka ola.”
Na talitonu te tamāloa ki te kupu tēnei a Iehu, ma na fano kehe ai loa. 51Ka koi fanatu ia i te auala ki tona fale, kae na fakafetaui mai kia te ia ana kaukauna, ma na lea vē mai ai kilātou kia te ia, “Ko te ataliki o koe kua mālohi.”
52Kua fehili atu te tino ōfiha kia te kilātou pe ko heā te taimi tonu na kāmata ai oi mālohi tona ataliki, ma na tali mai nā kaukauna, “Ko te tahi i te afiafi ananafi na teka ai tona fiva.” 53Oi na manatua ai e te tamana, ko te taimi tonu foki lava tēnā na lea vē ake ai ia Iehu kia te ia, “Ko te ataliki o koe ka ola.” Oi na talitonu ai loa te tino ōfiha kia Iehu, fakatahi ma tona kau kāiga uma.
54Ko te lua tēnei o fakailoga na fai e Iehu, i te fanaifoga mai Iutea ki Kalilaia.
Currently Selected:
Ioane 4: TOKU
Highlight
Share
Copy
Want to have your highlights saved across all your devices? Sign up or sign in
Bible Society New Zealand Charitable Trust
